ކުލި ކޮންޓްރޯލް ކުރަން ގޮވާލައި ޕެޓިޝަނެއް، ކެންދޫ ދާއިރާގެ މެންބަރު އަލީ ހުސެއިން ރައްޔިތުންގެ މަޖިލީހަށް ހުށަހަޅުއްވައިފިއެވެ.
އަލީ ހުސައިން މަޖިލީހަށް ހުށަހެޅުއްވި މި ޕެޓިޝަނަކީ މާލޭގައި ކުއްޔަށް އުޅޭ މީހުންގެ ޖަމިއްޔާ ނުވަތަ މާލެ ޓެނަންޓްސް ޔުނިއަން (އެމްޓީޔޫ) އިން އިސްނަގައިގެން ތައްޔާރުކުރި ޕެޓިޝަނެކެވެ. އެ ޕެޓިޝަންގައި ސޮއިކުރުމުގެ މަސައްކަތް ފެށީ މިދިޔަ ޑިސެމްބަރު މަހުގެ ތެރޭގައެވެ. މަޖިލީހަށް އެ ޕެޓިޝަން ހުށަހަޅާފައި މިވަނީ 800 މީހުންގެ ސޮއިއާ އެކުގައެވެ.
މަޖިލީހަށް ކުލި ކޮންޓްރޯލް ކުރާ ޕެޓިޝަނެއް ހުށަހެޅި އިރު އަލީ ހުސައިން އަކީ އެންމެ ގިނައިން ސޯޝަލް މީޑިއާގައި ވެސް ކުލި ކޮންޓްރޯލްއާ ކުރުމާއި ގުޅިގެން ވާހަކަދައްކަވާ އެއް މެންބަރެވެ.
އެމްޓީޔޫ ޖަމިއްޔާއިން ބުނީ ރައްޔިތުންގެ މަޖިލީހަށް ޕެޓިޝަނެއް ހުށަހެޅީ ކުލީގެ މައްސަލައަކީ ރައްޔިތުންގެ މަޖިލީހާއި ސަރުކާރުން ވަގުތުން ފިޔަވަޅު އަޅަންޖެހޭ މައްސަލައެއް ކަމަށްވާތީ ކަމަށެވެ. އަދި މާލޭގައި ގިނަބަޔަކު ދިރިއުޅެމުން ދަނީ ލިބޭ އާމްދަނީއާ ނުބައްދަލު އަދަދެއް ކުއްޔަށް ދައްކައިގެން ކަމަށް އެ ޖަމިއްޔާއިން ބުނެއެވެ.
