މޯލްޑިވިއަން އައިޑޮލްއިން މަޝްހޫރުކަން ހޯދި ލަވަކިޔުންތެރިޔާ މަރިޔަމް މައިޝާ (ރާޅު މަރިޔަނބު) ކެފޭއެއްގެ ތެރޭގައި ލަވަކިޔަން އިންދާ މީހަކު ގޮސް އޭނާގެ މައިކުގައި ހިފާ ދުރައްލީ މައްސަލަ ބަލައިދިނުމަށް ހެރިޓޭޖް މިނިސްޓާ ޔުމްނާ މައުމޫން ގޮވާލައްވައިފިއެވެ.
މައިޝާ ކުރި ޓްވީޓަށް ރައްދުދެއްވާ ޔުމްނާ ވިދާޅުވީ އެއްވެސް މީހަކަށް ގެއްލުމެއް ދިނުމާއި އެމީހެއްގެ ތަކެއްޗަށް ގެއްލުމެއް ދިނުމަކީ ކުރެވޭނެ ކަމެއް ނޫން ކަމަށާއި އެ ހާދިސާ ތަހުގީގު ކުރަން ޖެހޭ ކަމަށެވެ.
މިނިސްޓަރު ޔުމްނާގެ އިތުރުން މައިޝާގެ އެ ޓްވީޓާ ގުޅިގެން ޔޫތު މިނިސްޓަރު އަހުމަދު މަހުލޫފުވެސް ވަނީ އެއަށް ރައްދު ދެއްވާފައެވެ. މަހުލޫމާ ވިދާޅުވީ، ލަވަކިޔުންތެރިޔަކު ލަވަކިޔަ ކިޔައި ހުއްޓާ ހުއްޓުވުމަކީ ބަލައިގަނެވޭނެ ކަމެއް ނޫން ކަމަށާއި ގާނޫނު އަސާސީއާ ހިލާފު ނުވާ ކޮންމެ ކަމެއް ކުރުމުގެ ހައްގު ދިވެހި ކޮންމެ ރައްޔިތަކަށް ލިބިގެން ވާކަމަށެވެ.
މައުލޫމާތު ލިބިފައިވާ ގޮތުގައި އެ ހާދިސާ ހިނގީ މާފަންނުގައި ހުންނަ ކޮފީ ސްޓޭޓް ކެފޭގައި ރޭ މައިޝާ ލަވަކިޔަން އިންދައެވެ. އެ މަންޒަރު ފެންނަ ވީޑިއޯއެއް އޭނާ ވަނީ ޓްވީޓުކޮށްފައެވެ. އެ ވީޑިއޯއިން ފެންނަނީ މެދު އުމުރުގެ މީހަކު ގޮސް މައިޝާގެ މައިކު ދުރަށްޖައްސައި މަންޒަރެވެ.
އެ ވީޑިއޯއާ އެކު ޓްވިޓާގައި މައިޝާ ބުނެފައި ވަނީ އޭނާގެ މައިކު ދުރުކުރީ ލަވަކިޔާތީ އުނދަގޫވެގެން އުޅޭ އަވަށްޓެރިއެއް ކަމަށެވެ. އަދި ލަވަކިޔުމަކީ އޭނާގެ އާއިލާއަށް އާމްދަނީ ހީދައިދީ ދިރިއުޅުމަށް ކުރާ މަސައްކަތް ކަމަށާއި އެކަމާ ބަޔަކު ހިތްހަމަ ނުޖެހުނަސް ފަރުވާލެއް ނެތް ކަމަށެވެ. ލަވަކިޔަކިޔައި އިންދާ މައިކު ދުރައްޖައްސައި އޭނާ ހުއްޓުވި ނަމަވެސް ފަހުން މައިޝާ އޭނާގެ ޝޯ ކުރިއަށް ގެންގޮސް ވަނީ ނިންމާފައެވެ.
މައިޝާގެ އެ ޓްވީޓާ ގުޅިގެން ގިނަ ބަޔަކު އެމީހާ އެ ކުރި އަމަލަށް ފާޑު ކިޔާފައި ވާއިރު، ބުނެފައިވަނީ އެމީހާގެ އަމަލު ބަލައިނުގަނެވޭ ކަމަށާއި އެމީހާއަށް ފިޔަވަޅު އަޅަން ޖެހޭނެ ކަމަށެވެ.
