ދެމަފިރިއަކު ނިދާފައި އޮއްވާ ކޮޓަރިއަށް ވަން މީހަކު އަނބިމީހާއަށް ޖިންސީގޯނާ ކޮށްފިއެވެ.
މިކަމާ ގުޅިގެން ފުލުހުން ބުނީ، މިއަދު ހެނދުނު 6:20 ހާއިރު މެދުރާއްޖެތެރޭގެ ރަށެއްގައި ދެމަފިރިއަކު ނިދާފައި އޮއްވާ އެގެއަށް ގޮތް ނޭނގޭ ފިރިހެނަކު ވަދެ އަންހެން މީހާއަށް ޖިންސީ ގޯނާ ކޮށްފައިވާ ކަމުގެ މައުލޫމާތު ފުލުހުންނަށް ލިބިފައިވާ ކަމަށެވެ.
މި މައްސަލައާ ގުޅޭ އިތުރު ތަފްސީލެއް ފުލުހުން ހާމަކޮށްފައި ނުވާއިރު، ފުލުހުން ދަނީ މި މައްސަލަ ތަހުގީގު ކުރަމުންނެވެ.
މީގެ އިތުރުން ފުލުހުން ބުނީ، މެދުރާއްޖެތެރޭގެ ރަށެއްގައި އިއްޔެގެ ވަގުތެއްގައި 38 އަހަރުގެ ދިވެހި އަންހެނަކާމެދު 52 އަހަރުގެ ދިވެހި ފިރިހެނަކު ޖިންސީ ގޯނާ ކުރަން އުޅުނު ކަމުގެ މައްސަލައެއް ފުލުހުންނަށް ހުށަހަޅާފައިވާ ކަމަށެވެ.
މި މައްސަލައާ ގުޅިގެން ވެސް ފުލުހުން އިތުރު ތަފްސީލެއް ހާމަކޮށްފައި ނުވާއިރު، މި މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ބުނެއެވެ.
މިހާރަކަށް އައިސް ޖިންސީ ގޯނާގެ މައްސަލަތައް ފެންމަތިވާލެއް އަންނަނީ އިތުރުވަމުންނެވެ. އަދި މިފަދަ މައްސަލަތަކާ ގުޅިގެން ކަމާ ބެހޭ މުއައްސަސާތަކުން އަޅާ ފިޔަވަޅުތައް ހަރުދަނާ ކުރުމަށް ވެސް ގިނަ ފަރާތްތަކަކުން ދަނީ ގޮވާލަމުންނެވެ.
