2020 ވަނަ އަހަރު ރާއްޖޭގައި މަސައްކަތް ކުރަން އެންމެ ރަނގަޅު ކުންފުންޏަކަށް އުރީދޫ މޯލްޑިވްސް ހޮވިއްޖެއެވެ.
ބޭރުގެ ވިޔަފާރި ހަބަރުތަށް ގެނެސްދޭ "ބިޒްނަސް ވަޔާ" އިން އާންމުކުރި ރިޕޯޓެއްގައި ބުނާގޮތުން މިއަހަރު އުރީދޫއަކީ ރާއްޖޭގައި މަސައްކަތް ކުރަން އެންމެ ރަނގަޅު ކުންފުނިތަކުގެ ތެރެެގައި ހިމެނޭ ކުންފުންޏެކެވެ.
އެ ރިޕޯޓު ބުނާގޮތުން އެންމެ ރަނގަޅު ކުންފުންޏަކަށް ހޮވޭ ފަރާތްތަކަށް ސެޓްފިކެޓް ލިބޭނީ މުވައްޒަފުންގެ މަސައްކަތުގެ މާހައުލުގައި ހިތްހަމަ ޖެހިގެން އުޅުމާއި މުވައްޒަފުންގެ ކުރިއެރުމާއި ތަރައްގީއަށް ބެލުމަށް ފަހެވެ.
ކުންފުނީގެ މަސައްކަތުގެ މާހައުލަށް ބަލާ، އެކި ދާއިރާތަކުން ވަނީ އުރީދޫއަށް އެހެން ކުނފުނިތަކާ އަޅާބަލާއިރު ލިބިފައިވާ މާކްސްއަ ށްވުރެ މަތިން މާކްސް ލިބިފައި ކަމަށް އެ ރިޕޯޓުގައި ބުނެއެވެ.
މިކަމާ ގުޅިގެން އުރީދޫގެ ސީއީއޯ ނަޖީބު ހާން ވިދާޅުވީ އެކުންފުނީގެ ލަނޑުދަނޑި ތަކަކީ އުރީދޫ ހިންގުމާ ސަގާފަތާ ވަރަށް ބޮޑަށް ގުޅިލާމެހިފައިވާ ކަންކަން ކަމަށާއި އެ ކުންފުނީގެ މައިނާރު ބިނާވެފައި އޮންނަނީ ތިން ލަނޑުދަނޑިއެއްގެ މައްޗަށް ކަމަށެވެ. އަދި އެއީ އުރީދޫގެ މަސައްކަތުގެ ރޫހާ ގުޅިފައިވާ އަދި އޭގެ އިތުރުން ކަސްޓަމަރުންނާއި އެ ކުންފުންޏާ ދެމެދު ހަރުދަނާ ގުޅުމެއް ގާއިމުކުރުމަށް އެހީލިބޭ ކަންކަމެއް ކަމަށެވެ. އަދި އޭނާ ގަބޫލުކުރައްވާ ގޮތުގައި އުރީދޫގެ ކޮންމެ މުވައްޒަފަކީވެސް އުރީދޫގެ ކުރިއެރުމުގައި ވަރަށް މުހިންމު ދައުރެއް އަދާ ކުރާ ފަރާތްތެއް ކަމަށްވެސް ވިދާޅުވެފައިވެއެވެ.
މިކަމާ ގުޅިގެން އުރީދޫގެ އެޗް.އާރު ޑިރެކްޓަރު ފަޒްނާ މަންސޫރު ވިދާޅުވީ އުރީދޫގެ ހުރިހާވެސް ކާމިޔާބަކާ ކުރިއެރުމެއްގެ ތައުރީފު ހައްގުވަނީ އުރީދޫގެ ގާބިލު، ތަމްރީނު ލިބިފައިވާ އަދި ކުޅަދާނަ މުވައްޒަފުންނަށް ކަމަށެވެ.
މީގެ އިތުރުން މިކަމާ ހުޅިގެން އުރީދޫގެ ޕްރޮގްރާމް މެނޭޖަރު ހަމްޒާ އިދްރީސީ ވިދާޅުވެފައި ވަނީ އުރީދޫ ވަނީ ވަޒީފާގެ މާހައުލަށް ނިކުންނަ ފަރާތްތަކަށް އެންމެ ބޮޑަށް އިހުތިޔާރު ކުރެވޭ ކުންފުންޏެއްގެ ގޮތުގައި ފައިތިލަ ސާބިތުކޮށް އެހެން ކުންފުނިތަކަށް އޮތް މިސާލެއްގެ ގޮތުގައި ވެފައި ކަމަށެވެ. އަދި އުރީދޫ އަކީ، ކުންފުނީގައި ހިމެނޭ މުވައްޒަފުންގެ ވަޒީފާއާއި ކުރިމަގު އެމީހުން ހިތްހަމަޖެހޭ ފަދަ މަގުތަކުން އެމީހުން އަމިއްލައަށް އިހުތިޔާރު ކުރުމަށް އިސްކަންދޭ ކުންފުންޏެއް ކަމަށްވެސް ހަމްޒާ ވިދާޅުވެފައިވެއެވެ.
2020 ވަނަ އަހަރު ރާއްޖޭގައި މަސައްކަތް ކުރަން އެންމެ ރަނގަޅު ކުންފުންޏަކަށް އުރީދޫ ހޮވިފައިވާއިރު މިދިޔަ އަހަރުގެ "ބިޒްނަސް އޮފް ދަ އިޔާ" އެވޯޑްވެސް ލިބިފައިވަނީ އުރީދޫއަށެވެ. އަހަރުގެ އެންމެ މޮޅު ކުންފުނީގެ އެވޯޑު އުރީދޫއިން ކާމިޔާބު ކުރި އިރު، އެކުންފުނިން ވަނީ 2018 ވަނަ އަހަރުގެ ބިޒްނަސް އެވޯޑްސްގައި ކާމިޔާބުކުރި ދެ އެވޯޑެއް މިދިޔަ އަހަރުވެސް ހޯދާފައެވެ.
އެއީ "ފޮރިން ޑައިރެކްޓް އިންވެސްޓްމަންޓް އޮފް ދި އިޔާ" އެވޯޑާއި "އެކްސެލެންސް އިން އިންފޮމޭޝަން އެންޑް ކޮމިއުނިކޭޝަން" އެވޯޑެވެ.
