މާލޭގައި އެއްތަނުން އަނެއްތަނަށް ދާން އެހާ ބައިވަރު ކާރު ހުންނަންވީ ސަބަބެއް އެއްގޮތަކަށް ވެސް ހަމަ ބުއްދިއަށް ވިސްނި ވަޑައިނުގަންނަވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި އެއްގަމު ދަތުރުފަތުރުގެ ގާނޫނަށް އިސްލާހު ހުށަހެޅުމުގެ ބިލު އެޖެންޑަ ކޮށްފައިވުމާ ގުޅިގެންނެނެވެ. ނަޝީދު ވިދާޅުވީ، މާލޭގައި އެއްތަނުން އަނެއްތަނަށް ދާން އެހާ ބައިވަރު ކާރު ހުންނަންވީ ސަބަބެއް އެއްގޮތަކަށް ވެސް ހަމަ ބުއްދިއަށް ވިސްނި ވަޑައިނުގަންނަވާ ކަމަށާއި، މާލޭގައި ހިނގާފައި އެއްތަނުން އަނެއްތަނަށް ނުދެވެންވީ ސަބަބެއް ހަމަ އެއްގޮތަކަށް ވެސް އެނގިވަޑައިނުގަންނަވާ ކަމަށެވެ.

ނަޝީދު ވިދާޅުވީ، އެއްތަނުން އަނެއްތަނަށް ދަތުރުކުރުމަށް ކާރާއި، ސައިކަލު ބޭނުން ކުރަނީ ފަހަރެއްގައި ޕޭވްމަންޓުގައި ހިނގަން ފަސޭހަ ނުވާތީ ކަމަށެވެ. ނަމަވެސް އެއީ އެއްވެސް ސަބަބެއް ނޫން ކަމަށް އެމަނިކުފާނު ވިދާޅުވިއެވެ.

ނަޝީދު ވިދާޅުވީ، މީގެ ކުރީގައި އުޅުނީ ފަރުމަތީގައި ހިނގާފައި ކަމަށާއި، މިއަދު ދެން އެ ޕޭވްމަންޓް މަތީގައި ގާކޮޅެއް ހިއްލިފައި އޮންނާތީ، އެއީ ދެން ވަރަށް ގޯސް ކަމަކަށް ވެގެން އެތާ މަތިން ނުހިނގިގެން އުޅެން ޖެހިފައިވާ ކަމަށެވެ. އަދި މާލޭ މަގުމަތީގައި ކަކުލާ ހަމައަށް ޗަކަ އޮތް ކަން އެތައް ބަޔަކުގެ ހަނދާނުގައި ހުންނާނެ ކަމަށާއި، މިއަދު ގާކޮޅެއް ހިއްލިފައި އޮތުމުން އެތާ މަތިން ހިނގާ ނުލެވިގެން އުޅެން ޖެހިފައިވާ ކަމަށް ނަޝީދު ވިދާޅުވިއެވެ.

ނަޝީދު ވިދާޅުވީ، އެމަނިކުފާނަކީ ވެސް މާލޭގައި އުޅޭ، މާލޭ މީހެއް ކަމަށާއި، އުޅުއްވަނީ ޕޭވްމަންޓް މަތީގައި ހިންގަވާފައި ކަމަށެވެ. ނަމަވެސް މަގުމަތިން ހިންގަވާފައި ވަޑައިގަންނަވާއިރު، މަތިން ތަކެތި ވެއްޓުމާއި، ޕޭވްމަންޓް މަތިން އެއްވެސް ކަހަލަ ނުރައްކަލަކާ ކުރިމަތިވެފައި ނުވާ ކަމަށެވެ. މިހެން ވިދާޅުވެ، އެމަނިކުފާނު ވަނީ ވީހާ ވެސް ގިނަ ބަޔަކު ހިނގާފައި އުޅެން ނުވަތަ ބައިސްކަލުގައި އުޅެން އާދަ ކޮށްފި ނަމަ، މާލެގައި ޕާކިން އަދި މަގުމަތީގައިވާ ކާރު ބާރު ފިލައިގެން ދާނެ ކަން ފާހަގަކުރައްވާފައެވެ.

ކޮބާ ކޮންމެ މަގެއްގެ ދެފަރާތުގައި، އެންމެ ހަނިމަގުގެ ވެސް ދެފަރާތުގައި ވެސް ސައިކަލުތައް ބެހެއްޓި ބެހެއްޓީނުން، ކުނި ކެހެނީއެއް ނޫން މަގެއް، އަދި އޭގެ މަގެއްގައި ހިނގަ ބިނގާވެ އުޅެވެނީ އެއްވެސް ނޫން
ނަޝީދު

މީގެ އިތުރުން ނަޝީދު ވިދާޅުވީ، މާލޭގައި ކާރެއް ނުވަތަ ސައިކަލެއް ރަޖިސްޓްރީ ކޮށްދެނީ ކާރެއް ނުވަތަ ސައިކަލެއް ބަހައްޓާނެ ތަނެއް ދެއްކީމަ ކަމަށެވެ. އަދި އެ ގަވާއިދުގެ ދަށުން މިކަން ކުރާ ނަމަ، އެ އުޅަނދު ބަހައްޓާނެ ތަނެއް ނެތި، މަގުމަތީގައި އޮންނަންވީ ސަބަބެއް ނެތް ކަމަށް ނަޝީދު ވިދާޅުވިއެވެ. ނަޝީދު ވިދާޅުވީ، ކަން މިހެން އޮތް ނަމަވެސް އެންމެ ހަނިމަގުގެ ވެސް ދެފަރާތުގައި ސައިކަލުތައް ޕާކްކޮށްފައި ހުންނާތީ މަގުމަތި ކުނި ކެހުމަށާއި، އެ މަގެއްގައި ހިނގާބިނގާވެ އުޅުމަށް ވެސް ދަތިވެފައިވާ ކަމަށެވެ.

ހަބަރު ރައްޔިތުންގެ މަޖިލިސް