މިހާރު ކަން ހިނގަމުންދާ ގޮތަށް ކުރިއަށްދާ ކަމުގައި ވަނީނަމަ، ކުރިއަށް އޮތް 20 އަހަރު ދުވަހުގެ ތެރޭގައި ދުނިޔޭގެ އެކި ކަންކޮޅުތަކުން ކެންސަރު ޖެހިގެން ރިޕޯޓްކުރާ ކޭސްތަކުގެ އަދަދު 60 ޕަސެންޓް އިތުރުވާނެ ކަމުގެ އިންޒާރު، ދުނިޔޭގެ ސިއްހަތު ޖަމިއްޔާ (ޑަބްލިއު.އެޗް.އޯ)އިން ދީފިއެވެ.
ބައިނަލްއަގުވާމީ ފެންވަރުގައި މިއަދު ފާހަގަކުރަމުންދާ ދުނިޔޭގެ ކެންސަރު ބަލީގެ ދުވަހާ ގުޅިގެން އެޖަމިއްޔާއިންވަނީ، ކެންސަރު ބައްޔާ ގުޅުންހުރި އެކި ކަންކަމުގައި، ދަށް އަދި މެދު ފަންތީގެ އާމްދަނީ ލިބޭ ގައުމުތަކުން މިހާރަށްވުރެ ގިނަ މަސައްކަތްތަކެއް ކުރަން ކޮންމެހެން ޖެހިފައިވާކަން ފާހަގަކޮށްފައެވެ.
ދަށް އަދި މެދުފަންތީގެ ގައުމުތަކުގައި ކެންސަރު ބަލީގެ ޝިކާރައަކަށްވާ މީހުންނަށް ދުޅަހެޔޮ ދިގު އުމުރެއް ލިބުމަކީ ނާދިރު ކަމަކަށްވާއިރު، މިހާރު ކަން ކުރަމުންދާ ގޮތަށް އެދެވޭ ބަދަލުތަކެއް ނުގެނެސްފިނަމަ، މި ފަންތީގެ ގައުމުތަކުން ކެންސަރު ބަލީގެ ކޭސްތައް ފެންނަ މިންވަރު 81 ޕަސެންޓް އިތުރުވެދާނެ ކަމަށްވެސް ޑަބްލިއު.އެޗް.އޯއިންވަނީ ލަފާކޮށްފައެވެ.
ނިމިދިޔަ 2019 ވަނަ އަހަރަށް ބަލާއިރު، އާންމު ސިއްހަތުގެ ނިޒާމުގެ ތެރެއިން، ކެންސަރު ބަލީގެ މީހުންނަށްވެސް އެކަށީގެންވާ ފަރުވާތަކެއް ފޯރުކޮށްދެމުންދާކަމަށް މުއްސަނދި ގައުމުތަކުގެ ތެރެއިން 90 ޕަސެންޓް ގައުމުން ރިޕޯޓްކޮށްފައިވާއިރު، ދަށް ފަންތީގެ އާމްދަނީ ލިބޭ ގައުމުތަކުގައި މި ނިސްބަތް އުޅެނީ އެންމެ 15 ޕަސެންޓްގައެވެ.
ގައިންގަޔަށް އަރާ ބައްޔާ، ނާރާ ބަލިތަކާ ޔުނިވާސަލް ހެލްތް ކަވަރޭޖްއާ ބެހޭ ޑަބްލިއު.އެޗް.އޯގެ އެސިސްޓަންޓް ޑައިރެކްޓާ ޖެނެރަލް ޑރ ރެން މިންގޫއީ ވިދާޅުވީ، މި ފަރަގަކީ "ނިދާފައި" ތިބި ބަޔަކު ހޭލައްވަން އެޅި އެލާމެއް ކަމަށާ، ކެންސަރު ބައްޔާ ގުޅުންހުރި ކަންކަމުގައި ފަގީރު އަދި މުއްސަނދި ގައުމުތަކާ ދެމެދު އޮތް ފަރަގަކީ ބަލައިގަނެވޭނެ ފަރަގެއް ނޫންކަމަށެވެ.
ކެންސަރު ބައްޔަކީ ދުނިޔޭގެ އެއްވެސް ހިސާބެއްގައި، އެއްވެސް މީހެއްގެ މައްޗަށް އިއްވޭ 'މަރުގެ ހުކުމެއް' ކަމުގައި ވެގެން ނުވާނެ ކަމަށްވެސް ޑރ މިންގޫއީ ވިދާޅުވިއެވެ. އަސާސީ ސިއްހީ ނިޒާމުގެ ހިދުމަތް ފޯރުކޮށްދެމުންދާއިރު އެކަމުގެ ތެރެއިން ކެންސަރު ބަލި ދެނެގަނެވި، އެކަމަށް އެކަށީގެންވާ ފަރުވާކޮށް، ބަލި މުޅިން ފަސޭހަ ކުރެވޭ ކަން ޑަބްލިއު.އެޗް.އޯގެ އޮފިޝަލު ވަނީ ފާހަގަކުރައްވާފައެވެ.
ޑަބްލިއު.އެޗް.އޯގެ ޑައިރެކްޓާ ޖެނެރަލް ޑރ ޓެޑްރޯޒް އެޑްނޯމް ގެބްރިޔޭސޫސް ވިދާޅުވާ ގޮތުގައި، ކޮންމެ ގައުމެއްގެ ހާލަތު ވަކިވަކީން ބަލާ، އެގައުމަކަށް އެކަށީގެންވާ އުސޫލުތަކެއް ސައިންސްގެ ތެރެއިން ދެނެގަނެވިއްޖެނަމަ، ކުރިއަށް އޮތް 10 އަހަރު ދުވަހުގެ ތެރޭގައި 7 މިލިއަނެއްހާ މީހުންގެ ފުރާނަ ސަލާމަތް ކުރުމުގެ ފުރުސަތު އެބައޮތެވެ. އަދި މިކަން ކާމިޔާބު ވާން އޮތީ، ހުރިހާ ސްޓޭކްހޯލްޑަރުން އެކުގައި މަސައްކަތްކޮށްގެން ކަމަށްވެސް ޑރ ގެބްރިޔޭސޫސް ވަނީ ފާހަގަކުރައްވާފައެވެ.
ކެންސަރު ބަލީގެ ޝިކާރައަކަށް އަލަށް ވާ މީހުންގެ އަދަދު މަދު ކުރުމަށް އެޅިދާނެ ބައެއް ފިޔަވަޅުތައްވެސް ޑަބްލިއު.އެޗް.އޯއިންވަނީ ފާހަގަކޮށްފައެވެ.
- ދުންފަތް ބޭނުންކުރާ މިންވަރު ކޮންޓްރޯލް ކުރުން (ދުންފަތަކީ ކެންސަރު ބަލީގައި މީހުން މަރުވާން ދިމާވާ ސަބަބުތަކުގެ 25 ޕަސެންޓް ހިއްސާ)
- ލިވާ ކެންސަރާ ދުރުކުރުވުމަށް، ހެޕަޓައިޓިސް ބީއާއި ދެކޮޅަށް ވެކްސިން ދިނުން
- ރަހިމުގެ ދޮރަށް ޖެހޭ ކެންސަރާ ދުރުކުރުވުމަށް އެޗްޕީވީއާ ދެކޮޅަށް ވެކްސިން ދިނުން
- ކެންސަރަށް ސްކްރީން ކުރުމާ ފަރުވާ ދިނުން ފަދަ އުސްއަލިތައް ފާހަގަކުރެވެއެވެ.
ދުނިޔޭގެ ކެންސަރު ބަލީގެ ދުވަހުގެ ޝިއާރެއް ކަމުގައި 2019-2021 އަށް އަހަރަށް ކަނޑައަޅާފައިވާ ޝިއާރަކީ "އައި އޭމް އެންޑް އައި ވިލް" މި ޝިއާރެވެ.
