މިހާތަނަށް ދުނިޔޭގައި އުފެއްދި އެންމެ ބޮޑު ޓްވިން-އިންޖީން ޖެޓް، ބޮއިންގް 777 އެކްސްގެ ފުރަތަމަ ޓެސްޓް ފްލައިޓް ދަތުރު ކާމިޔާބު ކަމާއެކު ފުރިހަމަކޮށްފިއެވެ.
ކާމިޔާބު ކަމާއެކު 777 އެކްސްގެ ޓެސްޓް ފްލައިޓް ފުރިހަމަކޮށްފައިވާ މި ދަނޑިވަޅަކީ، 737 މެކްސް މަތިންދާ ބޯޓާ ގުޅުންހުރި 2 ހާދިސާއެއްގައި 346 މީހެއްގެ ފުރާނަ ގެއްލި، ބޮއިންގް ކުންފުންޏަށް ބޮޑެތި ފާޑުކިއުންތަކެއް އަމާޒުވެފައިވާ ދަނޑިވަޅެކެވެ.
ދިމާވި އެކި ކަހަލަ ޓެކްނިކަލް މައްސަލަތަކާއެކު މި ބޯޓު ލޯންޗުކުރުން ވަނީ، މީގެ ކުރިން އެތައް ފަހަރެއްގެ މަތިން ފަސްކޮށްފައެވެ.
ބޮއިންގް ކުންފުނިން ފަރުމާކޮށްފައިވާ 777 އެކްސް މޮޑެލްގެ މަތިންދާ ބޯޓުގެ ފުރަތަމަ ޓެސްޓް ފްލައިޓް ދަތުރު ފަށާފައިވަނީ ސިއޭޓަލްއިންނެވެ. އޭގެ ކުރިން، ވައި ގަދަވެގެން، 2 ފަހަރެއްގެ މަތިން ދަތުރު ފަސްކުރިއެވެ. ފުރަތަމަ ޓެސްޓް ފްލައިޓް ދަތުރުގައި ބޮއިންގް 777 އެކްސް މަތިންދާބޯޓު ވަނީ 4 ގަޑިއިރު ވަންދެން އުދުހިފައެވެ.
މަޝްހޫރު އެއާލައިންސް އެމިރޭޓްސްގެ ފްލީޓާ 2021 ވަނަ އަހަރު ގުޅޭ ބޮއިންގް 777 އެކްސް މޮޑެލްގެ މި ބޯޓުގެ އިތުރު ޓެސްޓްތަކެއް އަދިވެސް ކުރުމަށް ވަނީ ހަމަޖެހިފައެވެ.
ދިގު މިނުގައި 252 ފޫޓު ހުންނަ ބޮއިންގް 777 އެކްސް މަތިންދާ ބޯޓަކީ، ބޮއިންގް ކުންފުނީގެ އެންމެ ކާމިޔާބު، އަދި މިހާތަނަށް ނެރެފައިވާ އެންމެ ބޮޑެތި ބޯޓުތަކުގެ ތެރޭގައި ހިމެނޭ 777 މިނީ-ޖަމްބޯއަށްވުރެވެސް ބޮޑު ބޯޓެކެވެ.
777 އެކްސް މޮޑެލްގެ އެންމެ ހާއްސަ ސިފަޔަކީ، އެ ބޯޓަށް ލިބިފައިވާ ފަތްޖަހާލެވޭ، މާސިންގާ ފިޔަގަނޑެވެ. މީގެ އިތުރުން މިމޮޑެލްގައި ބޭނުންކުރާ އިންޖީނުތަކަކީ، ކޮމާޝަލް ފްލައިޓެއްގައި ބޭނުން ކުރާ އެންމެ ބޮޑު އިންޖީނުވެސްމެއެވެ. ބޮއިންގް ކުންފުނީގެ މާކެޓިންގް ޑައިރެކްޓަރ ވޭންޑޯ ސޯވާޒް ބުނާ ގޮތުގައި މި ބޯޓުގެ ބިޔަކަން ރަމްޒުކޮށްދެނީ ކުންފުންޏެއްގެ ހައިސިއްޔަތުން ބޮއިންގް ކުންފުންޏަށް ހާސިލުކުރެވޭނެ ބޮޑެތި އަމާޒުތައް ކަމަށެވެ.
442 މިލިއަން ޑޮލަރުގެ އަގު ހުރި ބޮއިންގް 777 އެކްސް މޮޑެލްގެ 309 މަތިންދާ ބޯޓެއް މިހާރުވެސް ވިކިފައިވާކަމަށް ބޮއިންގް ކުންފުނިން މައުލޫމާތު ދެއެވެ.
ބޮއިންގް 777 އެކްސް މަތިންދާ ބޯޓަކީ، ވިލާތުގެ އެއާބަސް ކުންފުނީގެ 360 ފަސެންޖަރުންގެ ޖާގައިގެ އޭ350-1000 މޮޑެލްގެ މަތިންދާ ބޯޓާ ވާދަކުރުމަށް ބޮއިންގް ކުންފުނި ތައާރަފުކުރި ބޯޓެކެވެ.
