ވެކްސިން ނުދޭ ކުދިން ވައްދާ ސްކޫލެއް އައްޑޫގައި ހުރިނަމަ އެކަން ބައްލަވައި ފިޔަވަޅު އަޅުއްވާނެ ކަމަށް އައްޑޫ ސިޓީގެ މޭޔަރު އަބްދުﷲ ސޯދިގު (ސޯބެ) ވިދާޅުވެއްޖެއެވެ.
'ދަ ޕްރެސް' އަށް މައުލޫމާތު ދެއްވަމުން ސޯބެ ވިދާޅުވީ، އުސޫލެއްގެ ގޮތުން ވެކްސިން ނުދޭ ކުދިން ސްކޫލަށް ނުވައްދާ ކަމަށެވެ. އަދި އެފަދަ ކުދިން ސްކޫލަށް ވައްދާނަމަ، އެއީ ގާނޫނާ ހިލާފަށް ކުރަމުންދާ ކަމެއް ކަމަށް އޭނާ ވިދާޅުވިއެވެ. ސޯބެ ވިދާޅުވީ، ގާނޫނާ ހިލާފަށް އެފަދަ ކަމެއް ކުރަމުންދާނަމަ އެކަން ބައްލަވައި ފިޔަވަޅު އަޅުއްވާނެ ކަމަށެވެ. އަދި ކައުންސިލާއި އެޑިއުކޭޝަނާ ގުޅިގެން ވެސް އެކަން ބައްލަވާނެ ކަމަށެވެ.
ނަމަވެސް ވެކްސިން ނުދީ ކުދިން ފޮނުވާ ސްކޫލެއް އައްޑޫގައި ހުންނަ ކަން ކައުންސިލުގެ ސަމާލުކަމަށް އައިސްފައި ނުވާ ކަމަށް ސޯބެ ވިދާޅުވިއެވެ.
ވެކްސިން ނުދޭ ކުދިން ވައްދާ ސްކޫލެއް އައްޑޫގައި ހުންނަ ކަމަށް ތުހުމަތު ކުރެއްވީ، ކުޑަކުދިންގެ ހާއްސަ ޑޮކްޓަރު، ޑރ. އަހްމަދު ފައިސަލްއެވެ. އޭނާ މިފަދައިން ތުހުމަތު ކުރެއްވީ، މާލެ ސަރަހައްދުގައި ދިރިއުޅޭ ތިން އަހަރުގެ ކުއްޖަކު ހިމަބިހި (މީސަލްސް) ޖެހިފައިވާ ކަމަށް ޝައްކުކުރެވުމާ ގުޅިގެން ކުރި ޓެސްޓް ތަކުން އެކުއްޖާ ހިމަބިއްސަށް ޕޮސިޓިވް ވެފައިވާ ކަން ހާމަވެފައި ވަނިކޮށެވެ.
ހިމަބިއްސަށް ކުއްޖަކު ޕޮޒިޓިވް ވެފައި ވާއިރު، އެ ކުއްޖާއަކީ 9 މަހުގަ އާއި 18 މަހުގައި ދޭންޖެހޭ މީސަލްސް ވެކްސިންގެ ދެޑޯޒް ފުރިހަމަ ނުކޮށް ހުރި ކުއްޖެކެވެ.
މިކަމާ ގުޅިގެން، އާންމުން ހޭލުންތެރި ކުރުވުމުގެ ގޮތުން ޑރ ފައިސަލް ވަނީ ވެކްސިން، ތާވަލާ އެއްގޮތަށް ޖަހާފައިވޭތޯ ބަލާ ޔަގީން ކުރުމާއި، ހުމާއެކު ފެން ނުލާ ހުންނަ ބިހި ނަގާނަގަ ހިމަބިއްސަށް ޓެސްޓުކުރުމަށް އާންމުންނަށް އިލްތިމާސް ކުރައްވައިފައެވެ.
މިފަދަ ދަނޑިވަޅެއްގައި، ސްކޫލުތައް އަލުން ހުޅުވުމަކީ ރައްކާތެރިކަމެއްތޯ ބައެއް ފަރާތްތަކުން ސުވާލު އުފެއްދުމުން ޑރ. ފައިސަލް ވިދާޅުވީ، ސުކޫލަށް ވައްދަނީ ވެކްސިން ޖަހާ ހަމަކޮށްފައި ކަމަށާއި، ވެކްސިން ޖަހާފައި ތިބިކުދިންނަށް ހިމަބިހީގެ ނުރައްކަލެއް އަދި އެކުދިންގެ ސަބަބުން އެހެން މީހުންނަކަށް ވެސް ނުރައްކަލެއް ނޯންނާނެ ކަމަށެވެ. އަދި މީގެ މައްސަލައަކީ ވެކްސިން ނުޖަހާ ސުކޫލްތަކަށް ވައްދާތީ ކަމަށާއި، ވެކްސިން ނުޖެހިއަސް ކުދިން ވައްދާ ސްކޫލެއް އައްޑޫގައި ހުންނާނެ ކަމަށެވެ.
3 އަހަރުގެ ކުއްޖަކު ހިމަބިއްސަށް ޕޮޒިޓިވް ވެފައިވާއިރު، ރާއްޖޭގައި މިހާރު ވެކްސިން ނުދީ ގެންގުޅޭ ކުދިން ވެސް އެބަތިއްބެވެ. އެފަދަ ބައެއް ކުދިންނަށް ވެކްސިން ދިނުމަށްޓަކައި، ރާއްޖޭގެ ކަމާ ބެހޭ އިދާރާތަކުން އެ ކުދިންގެ މައިންބަފައިންނަށް ނަސޭހަތްތެރިވެފައި ވެސް ވެއެވެ. ނަމަވެސް، އަދިވެސް ފާޅުގައި ވެކްސިން ނުދޭނެ ކަމަށް ބުނެ އިންކާރުކޮށް، ވެކްސިން ނުދީ ގެންގުޅޭ ކުދިން ރާއްޖޭގެ އެކި ހިސާބުތަކުގައި އެބަ ތިއްބެވެ.
ރާއްޖެއަކީ ހިމަބިހި ނައްތާލެވިފައިވާ ގައުމެއް ކަމުގައި ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން ކަނޑައެޅީ 2017 ވަނަ އަހަރުގެ ޖޫން މަހުގެ 30 ވަނަ ދުވަހުއެވެ. އެއާއެކު، ރާއްޖެ ވެފައި ވަނީ އޭޝިއާ ސަރަހައްދުގައި ވެސް އެންމެ ފުރަތަމަ ހިމަބިހި ނައްތާލެވުނު ދެ ގައުމުގެ ތެރެއިން އެއް ގައުމަށެވެ. ރާއްޖެއާ އެކުގައި ހިމަބިހި ނައްތާލެވިފައިވާ އަނެއް ގައުމަކީ ބޫޓާނެވެ.
ގައިންގަޔަށް އަރާ ބަލިތަކުން ތުއްތުކުދިން ރައްކާތެރި ކުރުމަށް ރާއްޖޭގައި ވެކްސިން ދޭން ފަށާފައި ވަނީ 1976 ވަނަ އަހަރުއެވެ. އަދި ހިމަބިހިން ރައްކާތެރިވުމަށް މީސަލްސް ވެކްސިން ދޭން ފަށާފައި ވަނީ 1983 ވަނަ އަހަރުއެވެ.
ރާއްޖެއިން ހިމަބިހި ނައްތާލެވިފައިވާ ކަމަށް 2017 ވަނަ އަހަރު ކަނޑައަޅާފައިވީ ނަމަވެސް ރާއްޖެއަކީ މީސްލްސް ފަދަ ބަލިތައް އުޅޭ ގައުމުތަކުން ވަރަށް ގިނަ މީހުން ޒިޔާރަތްކުރާ ގައުމެއް ކަމަށާއި ރާއްޖޭގެ މީހުންވެސް މިފަދަބަލިތައް އުޅޭ ގައުމުތަކަށް ޒިޔާރަތް ކުރެއެވެ. އެގޮތުން 2017 އަހަރާއި 2018 ވަނަ އަހަރުވެސް ރާއްޖެއިން ބޭރުން ދެ ދިވެހިންނަށް ހިމަބިހި ޖެހިފައިވާ ކަމަށް އެޗްޕީއޭއިން މައުލޫމާތުދީފައިވެއެވެ.
