އޮސްޓްރޭލިޔާގެ ޖަންގަލީގެ ރޯވެ ފެތުރެމުންދާ އަލިފާނުގެ ސަބަބުން ލިބެމުންދާ ގެއްލުންތަކާ ގުޅިގެން ރައީސް އިބްރާހީމް މުހައްމަދު ސޯލިހު، އޮސްޓްރޭލިއާގެ ބޮޑުވަޒީރު ސްކޮޓް މޮރިސަންއަށް ހަމްދަރުދީގެ މެސެޖެއް ފޮނުއްވައިފިއެވެ.
ރައީސްގެ މެސެޖްގައި ވިދާޅުވީ އޮސްޓްރޭލިއާގެ ޖަންގަލީގައި ރޯވެ ފެތުރެމުންދާ އަލިފާނުގެ ސަބަބުން އެތައްބައެއްގެ ފުރާނަގެއްލި، ގެދޮރާއި ތަކެއްޗާއި ގުދުރަތީ ދިރުންތަކަށް ލިބެމުންދާ ގެއްލުންތަކަކީ ސިހުން ލިބިވަޑައިގެންނެވި ބޮޑެތި ގެއްލުންތަކެއް ކަމަށެވެ.އޮސްޓްރޭލިއާއަކީ ރާއްޖެއާ ވަރަށް ގާތްރަޙުމަތްތެރި ގުޅުމެއް އޮންނަ، ރާއްޖޭގެ ތަރައްގީގެ ބައިވެރިއެއް ކަމަށެވެ.
"އޮސްޓްރޭލިއާގެ ޖަންގަލީގައި ރޯވެ، ފެތުރެމުންދާ އަލިފާނުގެ ސަބަބުން ދިރިއުޅޭ މާހައުލާއި އަދި ދިރުންތަކަށް ލިބެމުންދާ ގެއްލުންތަކުން ދޭހަކޮށްދެނީ ތިމާވެއްޓާމެދު އިންސާނުންގެ އަމަލުތައް ބެހެއްޓޭ ނުރަނގަޅު ގޮތްތަކުގެ ސަބަބުން މޫސުމަށް އަންނަ ބަދަލުތައް އިތުރަށް ގޯސްވަމުންދާ މިންވަރު، ތިމާވެށީގެ ކުއްލި ހާލަތްތަކުން އަރައިގަތުމަށް ދުނިޔޭގެ ގައުމުތައް ގުޅިގެން ކުރެވޭ މަސައްކަތުގައި ބައިވެރިވެ ކުރިޔަށްދިއުމަށް ރާއްޖެއިން އަބަދުވެސް ތައްޔާރަށް އޮންނާނެ،" ރައީސްގެ މެސެޖްގައި ވިދާޅުވިއެވެ.
ރައީސް ވިދާޅުވީ މިހާރު އޮސްޓްރޭލިއާގެ ޖަންގަލީގައި ރޯވެ ހިނގަމުންދާ އަލިފާނުގެ ހާދިސާތަކުގައި އޮސްޓްރޭލިޔާގެ ރައްޔިތުންނާ އެކުގައި ރާއްޖޭގެ ރައްޔިތުން އެބަތިބި ކަމަށެވެ. އަދި މި ހާދިސާގެ ގެއްލުންތަކުން އަރައިގަތުމަށް ކުރެވެމުންދާ މަސައްކަތުގައި ކާމިޔާބީއަށް އެދިވަޑައިގަންނަވާ ކަމަށްވެސް ރައީސް ވިދާޅުވިއެވެ.
އޮސްޓްރޭލިޔާގެ ޖަންގަލީގައި ރޯވެ ފެތުރެމުންދާ އަލިފާނުގެ ސަބަބުން މިހާތަނަށް 25 މީހެއްގެ ފުރާނަ ގެއްލި، 10 ހެކްޓަރުގެ ސަރަޙައްދެއް ވަނީ އަނދައިގެން ގޮސްފަ އެވެ. އަދި އަލިފާނުގެ ސަބަބުން ހަމައެކަނި ސައުތު ވޭލްސް ސަރަޙައްދުންވެސް ބައި މިލިޔަނަށްވުރެ ގިނަ ޖަނަވާރު މަރުވެގެން ގޮސްފައިވާ ކަމަށް އަންދާޒާ ކުރެވެއެވެ.
