އާންމުކޮށް ބޭނުންކުރާ މިންވަރަށްވުރެ މަދުން ކީމޯތެރަޕީ ޑްރަގްސް ބޭނުން ކުރުމުންވެސް ޓެސްޓިކިއުލާ ކެންސަރަށް ފަރުވާ ލިބޭ ކަމަށް ޑޮކްޓަރުން ބުނެފިއެވެ.
ސިއްހީ ދާއިރާގެ ލިޔުންތައް ޝާއިއުކުރަމުން އަންނަ ޔޫރަޕިއަން ޔޫރޯލޮޖީ ޖާނަލްގައިވާ ރިޕޯޓް ބުނާ ގޮތުގައި 246 ޕޭޝަންޓަކު ބައިވެރިކޮށްގެން ކުރިއަށް ގެންދިޔަ ދިރާސާގެ ހޯދުންތައް ދައްކާ ގޮތުގައި، އާންމުކޮށް ދެމުންދާ ކީމޯ ތެރަޕީގެ 2 ސައިކަލްގެ ބަދަލުގައި 1 ސައިކަލުން ވެސް ނަތީޖާ ވަނީ ހާސިލުކުރެވިފައެވެ.
ސައިންސްވެރިން ބުނާ ގޮތުގައި ކުރު މުއްދަތެއްގައި ދެވޭ މިފަދަ ފަރުވާއަކީ، ކެންސަރު ބަލީގެ ޕޭޝަންޓުންނަށް ދެން ކުރިމަތިލާންޖެހޭ އިތުރު ސައިޑް-އިފެކްޓްތައް އިންތިހާއަށް ކުޑަކޮށްދެނިވި ކަމަކަށް ވެގެންދާނެއެވެ. ތަޖުރިބާކާރުން ބުރަވާ ގޮތުގައި ކީމޯ ތެރަޕީ ނަގާ މިންވަރު މަދުވުމަކީ، އެކަމުގެ ސަބަބުން އެމީހެއްގެ ދިރިއުޅުމަށް އުޖާލާ ބަދަލުތަކެއް ގެނެސްދިނުމަށް އެހީވެދޭނެ ކަމެކެވެ.
އުމުރުން 15 އަހަރާ 49 އަހަރާ ދެމެދު ގެ ކެންސާ ޕޭޝަންޓުންގެ ތެރޭގައި އެންމެ އާންމު ކެންސަރަކީ ޓެސްޓިކިއުލާ ކެންސަރަށް ވެފައިވާއިރު، މިއީ އާދަޔާ ހިލާފު ކަމެކެވެ. ޓެސްޓިކިއުލާ ކެންސަރަށް ޕޮޒިޓިވްވާ މީހުންގެ ތެރެއިން 98 ޕަސެންޓް މީހުންނަކީ ބަލި ދެނެގަނެވޭ ފުރަތަމަ ހިސާބުން ފެށިގެން ގާތްގަނޑަކަށް 10 އަހަރުގެ މުއްދަތަކަށް ދުނިޔޭގައި ހުރުމުގެ ފުރުސަތު އޮންނަ ބައެއް ކަމަށް ސިއްހީ ރިޕޯޓްތައް ބުނެއެވެ.
ޅަ އުމުރުގައި ކެންސަރަށް ފަރުވާ ކުރުމަކީ އޭގެ ސައިޑް-އިފެކްޓްތައް އުމުރުގެ ބޮޑު ބަޔަކަށް ދެމިގެންދިއުމުގެ ފުރުސަތުވެސް ފަހިކުރާ ކަމެކެވެ.
