އައްޑޫ އިކުއިޓޯރިއަލް ހޮސްޕިޓަލް ސަރަހައްދުގައި އިތުރު ވަސީލަތްތަކެއް ގާއިމް ކުރުމަށް އައްޑޫ ޑިވެލޮޕްމަންޓް ކޮމެޓީ (އޭޑީސީ)އިން ހެލްތް މިނިސްޓަރާ މަޝްވަރާ ކޮށްފިއެވެ.
އޭޑީސީއިން މިއަދު ބޭއްވި ބައްދަލުވުމާ ގުޅިގެން އެ ކޮމިޓީގެ ނާއިބު ރައީސް އަދި ސައިރިކްސް ކޮލެޖުގެ ޗެއާމަން އަހުމަދު ޝަރީފު ވިދާޅުވީ، އޭޑީސީއިން ހެލްތް މިނިސްޓަރު އަބްދުﷲ އަމީން އާ މިއަދު ބައްދަލުކޮށް، އައްޑޫ އިކުއިޓޯރިއަލް ހޮސްޕިޓަލް ހުޅުވާއިރު، އެ ހޮސްޕިޓަލުން ލިބެން ހުންނާނެ ހިދްމަތްތަކާ ބެހޭ މައުލޫމާތު ސާފުކުރައްވާފައި ވާ ކަމަށެވެ. އަދި އެ ހޮސްޕިޓަލް ހިމެނޭ ސަރަހައްދުގައި އިތުރު ވަސީލަތްތަކެއް ގާއިމް ކުރުމާ ބެހޭގޮތުންވެސް މަޝްވަރާ ކުރައްވާފައި ވާކަމަށް އޭނާ ވިދާޅުވިއެވެ.
އައްޑޫ އިކުއިޓޯރިއަލް ހޮސްޕިޓަލަކީ ދެކުނުގެ ސަރަހައްދުގައި ހުރި އެންމެ ރަނގަޅު ސިއްހީ ހިދުމަތް ފޯރުކޮށްދޭ ތަނުގެ ގޮތުގައި ޕްރޮމޯޓްކޮށް ދިނުމަށް އޭޑީސީން މިނިިސްޓަރު އަރިހުގައި ވަނީ އެދިފައެވެ. އެގޮތުން އައްޑޫ ކައިރި ސަރަހައްދުގައި ދިރިއުޅޭ ހުރިހާ ފަރާތްތަކުން ސިއްހީ ފަރުވާ ހޯދަން މާލެއަށް ދިއުމުގެ ބަދަލުގައި، އެ ހޮސްޕިޓަލުން ފަރުވާ ހޯދުމަށް މަގު ފަހިކުރުން މުހިންމުކަން ފާހަގަ ކޮށްފައި ވެއެވެ.
މިއަދުގެ ބައްދަލުވުމުގައި، ހޮސްޕިޓަލް ކައިރި ސަރަހައްދުގައި އެހެެނިހެން ވަސީލަތްތައް ގާއިމް ކުރުމަކީ މުހިންމު ކަމެއް ކަމަށް ހެލްތް މިނިސްޓަރު ފާހަގަ ކުރައްވާފައި ވާކަމަށް އޭޑީސީން ބުނެއެވެ.
އޭޑީސީގެ ޓީމެއް ހެލްތު މިނިސްޓަރާއެކު މާދަމާ އައްޑޫ އިކުއިޓޯރިއަލް ހޮސްޕިޓަލަށް ޒިޔާރަތް ކޮށް އެތަން ބަލާލުމަށް ހަމަޖެހިފައިވާ ކަމަށްވެސް ޝަރީފް ވިދާޅުވިއެވެ.
