ޕިކަޕަކާއި ސައިކަލެއް ޖެހި ހިނގި އެކްސިޑެންޓެއްގައި 2 އަންހެނުންނަށް އަނިޔާވެއްޖެއެވެ.
މިކަމާ ގުޅިގެން ފުލުހުން ބުނީ، މިއަދު ހަވީރު 4:40 ހާއިރު ސ. މަރަދޫގައި އެކްސިޑެންޓެއް ހިނގާފައިވާ ކަމުގެ މައްސަލައެއް ރިޕޯޓް ކޮށްފައިވާ ކަމަށެވެ. އަދި މި އެކްސިޑެންޓުގައި ދެ އަންހެނުންނަށް އަނިޔާވެފައިވާއިރު، އެ ދެ މީހުންނަށް ވެސް ފަރުވާ ދިނުމަށް ވަނީ ހިތަދޫ ރީޖަނަލް ހޮސްޕިޓަލަށް ގެންގޮސްފައި ކަމަށް ފުލުހުން މައުލޫމާތު ދެއެވެ.
ފުލުހުން ބުނީ މި އެކްސިޑެންޓް ހިނގާފައިވަނީ މަރަދޫ އިން ހިތަދޫއާ ދިމާލަށް ދެކުނުން އުތުރަށް ދުއްވާފައި ދިޔަ ޕިކަޕެއް މަރަދޫ ޖަސްޓް-ޓީ ކެފޭ ކުރިމަތިން ލިންކް ރޯޑުގައި ކުއްލިއަކަށް މަޑުކުރުމުން، ފަހަތުން އައި ސައިކަލެއް ޕިކަޕުގެ ފަހަތުގައި ޖެހިގެން ކަމަށެވެ.
މި އެކްސިޑެންޓްގައި ޕިކަޕުގައި އިނީ އުމުރުން 40 އަހަރުގެ ދިވެހި ފިރިހެނެއް ކަމަށާއި، އޭނާ އަތުގައި އެއްގަމު އުޅަނދު ދުއްވުމުގެ ލައިސެންސް އޮންނަ ކަމަށް ފުލުހުން ބުނެއެވެ. މި އެކްސިޑެންޓުގައި މި އޭނާއަށް އަނިޔާއެއް ވެފައި ނުވާއިރު، ޕިކަޕުގެ ވާތްފަޅީ ފަހަތު އިންޑިކޭޓަރު ވަނީ ތަޅައިގެން ގޮސްފައެވެ.
މި އެކްސިޑެންޓުގައި ސައިކަލުގައި އުމުރުން 35 އަހަރާއި 34 އަހަރުގެ ދެ އަންހެނުން ތިބި އިރު، ސައިކަލު ދުއްވަން އިން މީހާގެ އަތުގައި ވެސް އެއްގަމު އުޅަނދު ދުއްވުމުގެ ލައިސެންސް އޮވެއެވެ. މި އެކްސިޑެންޓުގައި ސައިކަލު ދުއްވަން އިން 35 އަންހެން މީހާގެ ބޮލަށް އެކިވަރުގެ އަނިޔާ ލިބި، ވާތުލޯ ކައިރުން ފަޅައިގެން ގޮސްފައިވާއިރު ސައިކަލުގެ ފަހަތުގައި އިން 34 އަހަރުގެ އަންހެން މީހާގެ ވާތު ލޯ ކައިރިން ފަޅާއިގެން ގޮސް އޭނަގެ ބޮލަށް ވެސް ވަނީ އަނިޔާ ވެފައެވެ. މި ދެމީހުންގެ ހަށިގަނޑުގެ އެކި ތަންތަން މަށައިގެން ގޮސް، އެކި އަނިޔާވެފައިވާއިރު، އެމީހުން ދުއްވި ސައިކަލަށް ވެސް ވަނީ އެކިވަރުގެ ގެއްލުން ލިބިފައެވެ.
ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
