ރައީސް އިބްރާހިމް މުހައްމަދު ސޯލިހު މިއަދު ލާމު އަތޮޅަށް ވަޑައިގެންފިއެވެ.
ރައީސް އެއަތޮޅު ކައްދޫއަށް ވަޑައިގެންފައި ވަނީ މިއަދު ހެނދުނުގެ ވަގުތެއްގައެވެ. އެމަނިކުފާނަށް ކައްދޫ އެއާޕޯޓުން ވަނީ ހޫނު މަރުހަބާއެއް ކިޔާފައެވެ.
ރައީސްގެ މިދަތުރުފުޅުގައި ހެލްތު މިނިސްޓަރު އަބްދުﷲ އަމީނާއި ފިޝަރީޒް މިނިސްޓަރު ޒަހާ ވަހީދާއި އިކޮނޮމިކް މިނިސްޓަރު ފައްޔާޒު އިސްމާއީލް ވެސް ބައިވެރިވެވަޑައިގަންނަވައެވެ. އަދި ލ. އަތޮޅު ގަމު ދާއިރާގެ މެންބަރު މުހައްމަދު ވިސާމާއި ފޮނަދޫ ދާއިރާގެ މެންބަރު މޫސާ ސިރާޖު ވެސް ބައިވެރިވެވަޑައިގަންނަވައެވެ.
ރައީސް ސޯލިހު ލާމަށް މިއަދު މި ވަޑައިގެންނެވީ، އެ އަތޮޅު ހިތަދޫ ސިއްހީ މަރުކަޒަށް 50 އަހަރު ފުރުމުގެ މުނާސަބަތުގައި ބައިވެރިވެ ވަޑައިގަތުމަށެވެ. އެ ރަސްމިއްޔާތު އޮތީ މިއަދު ހަވީރު ހިތަދޫގައެވެ.
ރައީސްގެ މި ދަތުރުފުޅުގައި އެ އަތޮޅު ގަމާއި، ފޮނަދޫ އާއި ހިތަދޫ އަށް ވަޑައިގަތުމަށް ވަނީ ހަމަޖެހިފައެވެ. ރައީސް ލާމަށް ކުރައްވާ ދަތުރުފުޅު ނިންމާލެއްވުމަށް ފަހު، މިއަދުގެ ވަގުތެއްގައި މާލެ ވަޑައިގަތުމަށް ވަނީ ހަމަޖެހިފައެވެ.
ރައީސް ވަނީ މިދިޔަ ޖެނުއަރީ މަހުވެސް ލާމު އަތޮޅަށް ވަޑައިގެންފައެވެ.
