މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ ނަޒާހަތްތެރިކަމާއި މިނިވަންކަމާ މެދު އިދިކޮޅުން ސުވާލު އުފައްދައިފިއެވެ.
ކުރީގެ ޑިފެންސް މިނިސްޓަރު އަދި މަޑުއްވަރީ ދާއިރާގެ މެންބަރު އާދަމް ޝަރީފް އުމަރު މިއަދު ކުރެއްވި ޓްވީޓެއްގައި ބްރޯޑްކޮމްގެ ނަޒާހަތްތެރިކަމާއި މިނިވަންކަމާ މެދު ސުވާލު އުފައްދަވާފައި ވަނީ އެ ކޮމިޝަނުގެ ރައީސް މަރިޔަމް ވަހީދާ ސަރުކާރުގެ ޖަލްސާއެއް ހުށަހަޅުއްވައިދެއްވީ ތީއެވެ. ބްރޯޑްކޮމް އަކީ ދައުލަތުގެ މިނިވަން މުއައްސަސާއެއް ކަމުގައި ވާ އިރު، އެ މުއައްސަސާގެ މެންބަރަކު ސަރުކާރުގެ މަސައްކަތެއް ކުރަން އުޅުއްވުމަކީ ނަޒާހަތްތެރިކަމާ މެދު ސުވާލު އުފެދޭނެ ކަމެކެވެ. މަރީ ރޭގައި ހުންނެވީ ޓުއަރިޒަމް މިނިސްޓްރީގެ ޖަލްސާ ހުށަހަޅުއްވައި ދެއްވާށެވެ.
ބްރޯޑްކޮމް މިހާރު ހިނގަނީ މިނިވަން ކަމާއެކު މި ސަރުކާރުގެ ނުފޫޒެއް ނެތިތޯ އާދަމް ޝަރީފް ސުވާލު އުފައްދަވާފައި ވާއިރު އޭނާ ވަނީ މި ސަރުކާރު އިދިކޮޅުގައި އޮތް އިރު، ބްރޯޑްކޮމް ފަދަ މިނިވަން މުއައްސަސާތަކަށް އޭރުގެ ސަރުކާރުން ނުފޫޒު ފޯރުވާ ކަމުގެ ތުހުމަތު ކޮށްފައިވާ ކަން ވެސް ފާހަގަ ކުރައްވާފައެވެ.
ކުރީ ސަރުކާރުގެ ނުފޫޒު ބްރޯޑްކޮމްއަށް އޮތް ކަމަށް ބުނެ މި ސަރުކާރުން ވަނީ ކުރީގެ ބްރޯޑްކޮމްގެ ބައެއް މެންބަރުން އެ މަގާމުން ދުރުކޮށްފައެވެ. ބްރޯޑްކޮމްގެ ކުރީގެ މެންބަރު ޒައިނާ މަގާމުން ދުރުކޮށްފައި ވަނީ ވެސް އެފަދަ މައްސަލައެއްގައެވެ. އެގޮތުން، ކުރީ ސަރުކާރުން ބޭއްވި އިސް ރަށްވެހިންގެ ހަފްލާއެއް އިންތިޒާމް ކުރެއްވުމަށް އޭނާ ބައިވެރިވެފައިވާ ކަމަށް ބުނެ އޭނާއަށް ފާޑުކިއުން ވެސް އަމާޒުވެފައިވެއެވެ.
މަރީއަކީ ޖަލްސާތައް ހުށަހަޅުއްވައި ދެއްވުމުގައި ފާހަގަ ކޮށްލެވޭ ފަރާތެކެވެ.
