އިދިކޮޅު ޕީޕީއެމް އަދި ޕީއެންސީ ދެ ޕާޓީއެއްގެ ގޮތުގައި ރަޖިސްޓްރީ ކޮށްފައި އޮތް ނަމަވެސް، އެއީ ހަމަ އެއް ޕާޓީއެކެވެ. ޕީއެންސީގެ ރައީސް ކަން އަބްދުއްރަހީމް އަބްދުﷲ (އަދުރޭ) އަދި ޕީޕީއެމްގެ ރައީސްކަން، ކުރީގެ ރައީސް އަބްދުﷲ ޔާމީން ކުރައްވަމުން ގެންދެވިއަސް އިދިކޮޅު މި ކޯލިޝަނުގެ ލީޑަރުގެ ގޮތުގައި ބަލައިގެންފައިވަނީ ރައީސް ޔާމީނެވެ. އެކަމަކު، މަނީ ލޯންޑާ ކުރުމުގެ ކުށް އެމަނިކުފާނުގެ މައްޗަށް ސާބިތުވެ، އެމަނިކުފާނު ޖަލު ގޮޅީގައި ބަންދުވުމާ އެކު ގާނޫނީ ގޮތުން ޕީޕީއެމްގެ ރައީސްކަން ވެސް އެމަނިކުފާނަށް ގެއްލުނީއެވެ.
މިގޮތަށް ހަމަޖެހިގެން ދިޔައީ ވެސް ޖަލުތަކާއި ޕެރޯލްގެ ގާނޫނަށް ރައީސް ޔާމީންގެ ދައުރުގައި ގެނައި އިސްލާހެއްގެ ސަބަބުންނެވެ. އެކަން އޭރު މަޖިލީހުން ކުރީ އިދިކޮޅު ސިޔާސީ ބައެއް ބޭފުޅުންނަށް އަމާޒުކޮށެވެ.
ސުވާލަކީ މި އެވެ؛ މިހާރު އިދިކޮޅު ލީޑަރަކީ ކޮން ބޭފުޅެއް ހެއްޔެވެ؟
ރައީސް ޔާމީން ޖަލަށް ލިޔަސް، ޕީޕީއެމް/ ޕީއެންސީން ގަބޫލު ކުރަނީ އިދިކޮޅު ލީޑަރަކީ އަދިވެސް ޔާމީން ކަމަށެވެ. އިދިކޮޅުން އެގޮތަށް ގަބޫލު ކުރުމަށް ދައްކާ ހުއްޖަތަކީ ރައީސް ޔާމީނަށް ކޮށްފައިވާ ހުކުމަކީ ސިޔާސީ ހުކުމަކަށް ވުމެވެ. އެހެންވެ، އިދިކޮޅުން ތިބީ އެހެން ލީޑަރަކު ނެރުމަށް ތައްޔާރުވެގެނެއް ނޫނެވެ.
އެކަމަކު އެހެން އެކަން ވާކަށް ވެސް ނެތެވެ؛ އިދިކޮޅު ލީޑަރަކު އާންމުންނަށް ނެރެން އެބަ ޖެެހެ އެވެ. އެއީ އިދިކޮޅުން ކުރަން ޖެހޭ ކަމެކެވެ. އެކަމަކު އެއަށް ވުރެ ބޮޑަށް އިދިކޮޅު ލީޑަރަކު ލީޑަރަކު ނެރެން މަސައްކަތް ފަށައިފި ނަމަ އިދިކޮޅުގައި ބައިބައިވުން ވެސް އެކަށީގެންވާތީ އެކަން އެއީ ނުދައްކާ ވާހަކައަކަށް ހަދައިގެން ތިބެނީ ކަމަށް ސިޔާސީ ބައެއް ތަޖުރިބާކާރުން ގަބޫލުކުރެ އެވެ.
ރައީސް ޔާމީނަށް ހުކުމް އިއްވި ދުވަހުގެ ރޭ ނޫސްވެރިން ވަނީ މި ސުވާލު ޕީއެންސީގެ ރައީސް އަދުރޭއަށް އަމާޒުކޮށްފައެވެ. ނަމަވެސް އަދުރޭގެ ރާގު ހުރީ މުޅިން ތަފާތުކޮށެވެ. އަދިވެސް ހުރީ އެހެންނެވެ. އަދުރޭ ވިދާޅުވަނީ ޕީޕީއެމްގެ ރައީސަކީ އަދިވެސް ރައީސް ޔާމީން ކަމަށެވެ.
އަދުރޭ ވިދާޅުވެފައިވާ ގޮތުގައި ރައީސް ޔާމީން ޖަލަށް ލުމަކީ އަދި އިދިކޮޅަށް ލީޑަރަކު ހޯދަންވީ ސަބަބެއް ނޫނެވެ. އޭނާ ވިދާޅުވީ، ޕީޕީއެމަށް ރައީސަކު ހޮވުމަށް އެ ޕާޓީން ކޮންގްރެސް އެއްވެސް ނުބާއްވާނެ ކަމަށެވެ. އަދި ޕާޓީގެ ލީޑާޝިޕް ފޭރިގަންނަން މަސައްކަތް ކުރައްވާ ފަރާތަކަށް އެ ފުރުސަތު ވެސް ނުދެއްވާނެ ކަމަށް އަދުރޭ ވިދާޅުވިއެވެ. ނުހައްގު ހުކުމަކުން ޖަލަށްލީ ކަމުގައި ވިޔަސް އިދިކޮޅުގެ ލީޑަރަކީ އަދިވެސް ރައީސް ޔާމީން ކަމަށް އަދުރޭ ދަނީ ތަކުރާރުކޮށް ވިދާޅުވަމުންނެވެ.
ޕީޕީއެމްގެ ލީޑާޝިޕް ފޭރިގަތުމަށް މީހަކު މަސައްކަތް ކުރައްވާ ކަމުގެ އިޝާރާތެއް އަދުރޭ ކުރައްވާފައި ވާއިރު، އެމްޑީޕީގެ ޗެއާޕާސަން އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވެސް ވަނީ ހަމަ އެފަދަ މޭރުމަކުން ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދަށް ތުހުމަތު ކުރައްވާފައެވެ. ހަސަން ލަތީފް ވިދާޅުވީ، ޕީޕީއެމްގެ ރައީސް ކަމުގެ މަގާމް ހުސްވެއްޖެ ކަމަށާއި ދެން އޮތީ އެމަގާމާ ހެދި ހިފުން ކަމަށެވެ. އެގޮތުން ޑރ. ޖަމީލް ވެސް އުޅުއްވަނީ އެ މަގާމު ހޯއްދެވުމަށް ކަމަށް ހަސަން ލަތީފް ވިދާޅުވެފައިވެއެވެ.
ރައީސް ޔާމީންގެ މައްޗަށް ކޮށްފައިވާ ހުކުމް އިދިކޮޅުން ބަލައި ނުގަތަސް އެއީ އެ ހުކުމް ބާތިލުވާ ސަބަބެއް ނޫންތާއެވެ. އުސޫލެއްގެ ގޮތުން ބަލާނަމަ، ޕީޕީއެމްގެ ރައީސްކަން ލިބޭނީ އެޕާޓީގެ ނައިބު ރައީސަށެވެ. ޕީޕީއެމްގެ ނައިބު ރައީސުންގެ ތެރޭގައި، ނައިފަރު ދާއިރާގެ މެންބަރުކަން ކުރައްވަމުން ގެންދަވާ އަހްމަދު ޝިޔާމް، ތ. ގުރައިދޫ ދާއިރާގެ މެންބަރުކަން ކުރައްވަމުން ގެންދަވާ މުހައްމަދު ޣައްސާން މައުމޫން އަދި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ވެސް ހިމެނެެއެވެ. އިދިކޮޅުން ވަނީ މީގެ ކުރިން 'ދަ ޕްރެސް' އަށް މައުލޫމާތު ދެމުން، ރައީސް ޔާމީން ނެތް ހާލަތެއްގައި ޕީޕީއެމްގެ ރައީސް ކަމަށް ވަޑައިގަންނަވާނީ ޕީޕީއެމްގެ ނައިބު ރައީސް ޝިޔާމް ކަމަށް އިޝާރާތް ވެސް ކުރައްވައިފަ އެވެ. ނަމަވެސް ރައީސް ޔާމީނަށް ހުކުމްކޮށް، ޖަަލަށް ލުމަށްފަހު ޕީޕީއެމުން ބޭއްވި ފުރަތަމަ ކައުންސިލު ބައްދަލުވުމުގެ ރިޔާސަތު ބެލެހެއްޓެވީ ޣައްސާނެވެ. އެއަށްފަހު ބޭއްވި ބައްދަލުވުމުގެ ރިޔާސަތު ބެލެހެއްޓެވީ މުއިއްޒެވެ.
ޕީޕީއެމްގެ ރައީސްކަމުގެ މަގާމަށް ޣައްސާން ވަޑައިގެންފި ނަމަ، ސަރުކާރުގެ ކޯލިޝަނުގެ ތެރޭގައި ހިމެނޭ ބައެއް ޕާޓީތައް އިދިކޮޅަށް ބަދަލުވެގެން ދިއުމަކީ ވެސް ވެދާނެ ކަމެއް ކަމަށް ބައެއް ފަރާތްތަކުން ދެކެއެވެ. އެގޮތުން، ޣައްސާންގެ ބައްޕާފުޅު، ކުރީގެ ރައީސް މައުމޫން އަބްދުލްގައްޔޫމްގެ ޕާޓީ، އެމްއާރްއެމް އަދި މާމިގިލި ދާއިރާގެ މެންބަރު ގާސިމް އިބްރާހީމް ލީޑް ކުރައްވާ ޖުމްހޫރީ ޕާޓީ އިދިކޮޅާއި ގުޅުމުގެ ފުރުސަތު ވެސް އެބައޮތެވެ. މިފަދަ ފުރުސަތުތައް އޮތް އިރު، ޣައްސާން އިދިކޮޅު ލީޑް ކުރެއްވުމަކީ ހަރުދަނާ ގޮތެއްގައި އިދިކޮޅު ކޯލިޝަން ކުރިއެރުވޭނެ ގޮތެކެވެ.
ރައީސް ޔާމީނަށް މިވަގުތު ޕާޓީގެ ރައީސްކަން ގެއްލިފައިވީ ނަމަވެސް، ޕީޕީއެމުން އިތުރު ރައީސަކު އިންތިހާބު ނުކުރާ ނަމަ އެމަނިކުފާނުގެ ޖަލު ހުކުމް ތަންފީޒު ކުރެއްވުމަށްފަހު އެނބުރި ވަޑައިގެން ޕީޕީއެމްގެ ރައީސްކަމާ ހަވާލުވެ ވަޑައިގެންނެވޭނެއެވެ. ނަމަވެސް، އެމަނިކުފާނު ޖަކުގައި ހުންނަވާއިރު ޕާޓީގެ ކަންކަމާއި ހަވާލުވެ ވަޑައިގަންނަވާނެ ބޭފުޅަކު ހުންނަން އެބަ ޖެހެއެވެ. ރައީސް ޔާމީން ޖަލުގައި ބަންދު ކުރިތާ ގާތްގަނޑަކަށް ތިން ހަފްތާ ވެފައިވާއިރު އެ ޕާޓީން އަދި މިހާތަނަށް ޕާޓީގެ އިސްވެރިޔަކީ ކާކު ކަން ނިންމައި އިލެކްޝަން ކޮމިޝަނަށް އަންގާފައިނުވާ ކަމަށް އެ ކޮމިޝަނުގެ ނައިބު ރައީސް އަހްމަދު އަކްރަމް ވިދާޅުވެއެވެ. އަކްރަމް ވިދާޅުވީ، ޕީޕީއެމްގެ ރައީސްގެ މަގާމަށް ބޭފުޅަކު އައްޔަން ކުރުމަކީ އެ ޕާޓީގެ އެތެރޭގެ ކަމެއް ކަމަށެވެ.
އިދިކޮޅު ލީޑަރަކީ ކޮބައިކަން އާންމުންނަށް އެބަ ސާފުވާން ޖެހެ އެވެ. އެނގޭހާ ވެސް ކަމަކީ، އިދިކޮޅު ޕާޓީއެއް ނުވަތަ އިދިކޮޅު ކޯލިޝަނެއް އޮންނަން ޖެހޭ ކަމެވެ. އެއީ ޑިމޮކްރެޓިކް ނިޒާމުގައި ކޮންމެހެން ވެސް މުހިންމު ކަމެކެވެ.
