އުމުރުން ދުވަސްވީ ދެމަފިރިއެއްގެ ގެއިން ގިނަ އަދަދެއްގެ ފައިސާ ފޭރިއްޖެއެވެ.
ފުލުހުން ބުނީ މިއަދު ފަތިހު 5:30 ހާއިރު ގދ.ގައްދޫ ގައި އުމުރުން ދުވަސްވީ ދެމަފިރިއެއް ދިރިއުޅޭ ގެއެއްގެ ދޮރު ހަލާކުކޮށްލާ ގިނަ އަދަދެއްގެ ފައިސާ ވަގަށް ނަގައިފައި ވާ މައސަލައެއް ފުލުހުންނަށް ހުށަހަޅާފައި ވާ ކަމަށެވެ.
ފުލުހުން ބުނީ އެ ގެއިން ވަގަށް ނަގާފައި ވަނީ 95000 ރުފިޔާއާއި 1000 ޑޮލަރު ކަމަށެވެ.
އަދި މި މައްސަލަ އިތުރަށް ތަހުގީގު ކުރަމުން އަންނަ ކަމަށްވެސް ފުލުހުން މައަުލޫމާތު ދެއެވެ.
މިފަހަކަށް އައިސް ރާއްޖޭގައި ވައްކަމާއި ފޭރުން ދަނީ ދުވަހެއް ދުވަހަކަށް އިތުރު ވަމުންނެވެ. އެގޮތުން، މިމަހުގެ 3 ވަނަ ދުވަހު މަގުމަތިން ހިނގާފައި ދިޔަ މީހެއްގެ އަތުން ފޯނަކާ 2،800 ޑޮލަރު ވަނީ ފޭރި ގަނެފައެވެ. އަދި މިދިޔަ އޮކްޓޯބަރު މަހުގެ 29 ވަނަ ދުވަހު މާލޭ ބޮޑުތަކުރުފާނު މަގުގައި ހުންނަ މަނީ އެކްސްޗޭންޖު ގެ ބިއްލޫރިގަނޑުވެސް ވަނީ ތަޅާލައިފައެވެ.
އަދި އޮގަސްޓް މަހު 16 ވަނަ ދުވަހު ކަރަންކާ މަގުގައި ހުރި ފިހާރައެއްގެ ބިއްލޫރިގަނޑު ތަޅާލައިގެން އެ ފިހާރައިން ވައްކަން ކުރަން އުޅޭ ކަމަށް ފުލުހުންނަށް ރިޕޯޓް ކޮށްފައިވެއެވެ. އެކަން ފުލުހުންނަށް ރިޕޯޓްކުރުމާއި ގުޅިގެން، ފުލުހުން އެ ސަރަހައްދަށް ދިޔައިރު، 4 މީހަކު ދުވެފައި ދަނިކޮށް، ފެނިގެން އެމީހުން ފަހަތުން ގޮސް ހުއްޓުވާފައިވާ ފުލުހުން ވަނީ ހައްޔަރުކޮށްފައެވެ.
