މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލައި އިންސާފު ހޯދުމަށް އުފެއްދި ރިޔާސީ ކޮމިޝަންގެ މެންބަރު އާދަމް މުހައްމަދު އިސްތިއުފާ ދެއްވައިފި އެވެ.
ރައީސްގެ ތަރުޖަމާން އިބްރާހިމް ހޫދު ވިދާޅުވި ގޮތުގައި އާދަމް އިސްތިއުފާ ހުށަހެޅުއްވީ މި މަހުގެ 8 ވަނަ ދުވަހުގަ އެވެ. މަރު ކޮމިޝަނުން އޭނާ އިސްތިއުފާ ދެއްވުމުން މިހާރު ތިއްބަވަނީ އެ ކޮމިޝަނުގެ މެންބަރު މިސްބާހް އައްބާސް އާއި ފަރީޝާ އަބްދުﷲގެ އިތުރުން އަހްމަދު ނާޝިދެވެ. މަރު ކޮމިޝަނުގެ ރައީސަކަށް ހުންނެވި ކުރީގެ ބަންޑާރަ ނައިބު ހުސްނުއްސުއޫދު، ސުޕްރީމް ކޯޓުގެ ފަނޑިޔާރަކަށް ވެވަޑައިގަތުމަށް އިސްތިއުފާ ދެއްވުމުން އެ މަގާމު މިހާރު އޮތީ ހުސްކޮށެވެ. ސުޕްރީމް ކޯޓުގެ ފަނޑިޔާރުކަމަށް، ހުސްނުއްސުއޫދު އައްޔަންކޮށްފައިވަނީ މިމަހުގެ 8 ވަނަ ދުވަހު އެވެ. ރައީސް އޮފީހުން ބުނީ މަރު ކޮމިޝަނުގެ ރައީސްގެ މަގާމަށް ބޭފުޅަކު ހަމަޖެއްސުމުގެ ކަންކަން ކުރިއަށް ގެންދާކަމަށެވެ.
މަރު ކޮމިޝަން އުފެއްދީ އިންސާފު ނުލިބުނު ގިނަ މައްސަލަތަކެއް އަލުން ތަހުގީގުކޮށް އިންސާފު ގާއިމްކޮށް ދިނުމަށެވެ. އެންމެ އިސްކަމެއް ދީގެން ބެލީ ޑރ. އަފްރާޝީމް އަލީ އަވަހާރަކޮށްލުމާއި ނޫސްވެރިޔާ އަހްމަދު ރިލްވާންގެ އިތުރުން ބްލޮގަރު ޔާމީން ރަޝީދުގެ މަރުގެ މައްސަލަ އެވެ. ކޮމިޝަނަށް ހުށަހަޅާ މައްސަލަތައް ތަހުގީގުކޮށް ނިންމުމަށް ކަނޑައަޅާފައި ވަނީ ދެ އަހަރުގެ މުއްދަތެކެވެ.
