ފަހުގެ ތާރީހެއްގައި ހިންގި އެންމެ ބޮޑު ހިޔާނާތް، އެމްއެމްޕީއާރްސީގެ ހިޔާނާތުގެ މައްސަލާގައި ޖުވެނައިލް ކޯޓުގެ ގާޒީ އަބްދުލްބާރީ ޔޫސުފްގެ މައްޗަށް ޖިނާއީ ތަހުގީގު ހިންގަން ފަށައިފިއެވެ.
ޖޭއެސްސީން ބުނީ، އެމްއެމްޕީއާރްސީ މެދުވެރިކޮށް ހިޔާނާތްތެރިވި ފައިސާއިން މާލީ މަންފާ ލިބިފައިވާ ފަނޑިޔާރުންގެ ތެރެއިން ގާޒީ ބާރީގެ މައްޗަށް ތަހުގީގެއް ހިންގޭ ވަރަށް މައުލޫމާތު ލިބިފައިވާ ކަމަށެވެ. އެހެންކަމުން އެ މައްސަލަ ތަހުގީގު ކުރަމުންދާ ކަމަށް ބުނެ މޯލްޑިވްސް ޕޮލިސް ސާވިސް އިން އެ ކޮމިޝަނަށް ސިޓީ ފޮނުވާފައިވާ ކަމަށް ޖޭއެސްސީން ބުނެއެވެ.
ޖޭއެސްސީން މިއަދު ނެރުނު ނޫސްބަޔާނުުގައި ބުނީ، ގާޒީ ބާރީގެ މައްސަލަ ފުލުހުން ބަލަމުން ދާތީ އޭނާގެ ސުލޫކީ މައްސަލައެއް ބެލުމަށާއި، އޭނާ ސަސްޕެންޑް ކުރުމަށް މިއަދު ބޭއްވި ކޮމިޝަނުގެ ބައްދަލުވުމުން ނިންމާފައިވާ ކަމަށެވެ.
އެމްއެމްޕީއާރްސީ ހިޔާނާތުގެ ފައިސާއިން ގާޒީ ބާރީއަށް މަންފާ ވެފައިވާ ކަމަށް ތުހުމަތު ކޮށްފައި ވާއިރު، މި ހިޔާނާތުން ފަނޑިޔާރުންނަށް މަންފާ ވެފައިވާ ކަމަށް ކަމާ ބެހޭ މުއައްސަސާތަކުން ވަނީ މީގެ ކުރިން ބުނެފައެވެ. އެމްއެމްޕީއާރުސީގެ ހިޔާނާތުން މަންފާ ލިބުނު ކަމަށް 267 ފަރާތަކަށް ތުހުމަތު ކޮށްފައި ވާއިރު، އޭގެ ތެރޭގައި 8 ފަނޑިޔާރަކާއި، މިހާރުގެ ސަރުކާރުގައި ތިއްބެވި 7 ބޭފުޅަކާއި، 18 ވަނަ މަޖިލީހުގެ 44 މެންބަރުންނާއި 19 ވަނަ މަޖިލީހުގެ 16 މެންބަރެއް ހިމެނެއެވެ. މި ހިޔާނާތުން މަންފާ ލިބުނު ފަރާތްތަކުގެ އަދަދަކީ 155 ކަމަށް ކުރިން ބުނެފައިވީ ނަމަވެސް، މިހާރު މި އަދަދު ވަނީ 267 އަށް އިތުރުވެފައެވެ.
