ކ. ގާފަރު ކައިރިން ކަނޑުމަތިން، ދެ ދޯންޏެއް ޖެހި ހިނގި އެކްސިޑެންޓެއްގައި، އެދެ ދޯންޏަށް އެކިވަރުގެ ގެއްލުންތައް ވެއްޖެއެވެ.
ފުލުހުން ބުނީ ރޭ ފަތިހު 4:20 ހާއިރު، ގާފަރު ހުޅަނގު ފަރާތުން ކަނޑިންމައާ ދިމާލުން ކަނޑުމަތިން ދެ ދޯންޏެއް ޖެހި އެކްސިޑެންޓް ހިނގާފައިވާ ކަމަށެވެ. ނަމަވެސް އެދެ ދޯނީގައި ތިބި އެއްވެސް މީހަކަށް އަނިޔާއެއް ލިބިފައިނުވާ ކަމަށެވެ.
ފުލުހުން ބުނީ މި އެކްސިޑެންޓްގައި އެއް ދޯނީގެ ކުރީކޮޅުގެ ހަ މަޑޫ ހަލާކުވެ، ފަޅައިގެން ގޮސްފައިވާ ކަމަށެވެ. އަދި އަނެއް ދޯނީގެ ކުރިއަށްވެސް ގެއްލުންވެފައިވާ ކަމަށެވެ.
އެމައްސަލައާ ގުޅިގެން ދެ ދޯނީގެ ކައްޕީންގެ ލައިސެންސް ވަނީ ފުލުހުން ހިފަހައްޓާފައެވެ. އަދި ފުލުހުން އަންނަނީ އެމައްސަލަ މިހާރު ތަހުގީގު ކުރަމުންނެވެ.
މިދުވަސްވަރަކީ މޫސުން ގޯސް ދުވަސްވަރެއް ކަމަށް ވުމާއެކު ކަނޑުދަތުރު ކުރާ ފަރާތްތަކުން މޫސުމަށް ބަލައިގެން ދަތުރު ކުރުމަށް ކަމާބެހޭ ފަރާތްތަކުން ދަނީ އިލްތިމާސް ކުރަމުންނެވެ.
