ގެނބުނު ބަޔަކަށް އައިޖީއެމްއެޗުގައި ފަރުވާ ދޭން ފަށައިފިއެވެ.
އައިޖީއެމްއެޗްގެ މީޑިއާ އޮފިޝަލް 'ދަ ޕްރެސް' އަށް މައުލޫމާތު ދެއްވަމުން ވިދާޅުވީ ކަނޑުވެ، ގެނބުނު ބަޔަކަށް އެ ހޮސްޕިޓަލުގައި ފަރުވާ ދެމުންދާ ކަމަށެވެ. އަދި އެމީހުން ހޮސްޕިޓަލަށް ގެނެސްފައި ވަނީ މީގެ 30 ވަރަކަށް މިނިޓު ކުރިން ކަމަށާއި، އެމީހުން ގެނެސްފައި ވަނީ ފުލުހުން ކަމަށް އައިޖީއެމްއެޗުން ބުނެއެވެ.
އައިޖީއެމްއެޗުން ބުނީ، އެ ހޮސްޕިޓަލުގައި ފަރުވާދެމުން ދަނީ 3 ބޭރުމީހުންނާއި ދިވެއްސަކަށް ކަމަށެވެ. އަދި އެ 4 މީހުންނަކީ ވެސް ފިރިހެނުން ކަމަށް އެ ހޮސްޕިޓަލުން މައުލޫމާތުދެއެވެ.
މިކަމާ ގުޅިގެން ފުލުހުން ބުނީ މިއަދު ހެނދުނު 10:30 ހާއިރު އެނބޫދޫ ފިނޮޅު ކައިރީ އޮންނަ އަޑިމަގު ފަޅުތެރެއަށް މަސްވެރިކަން ކުރަން އުޅުނު ދޯންޏެއް އަޑިއަށްދާ ކަމުގެ މައުލޫމާތު ފުލުހުންނަށް ލިބިފައިިވާ ކަމަށެވެ. އަދި މި މައުލޫމާތު ލިބުމާއި އެކު މެރިން ފުލުހުން ވަގުތުން ވަގުތަށް އެ ސަރަހައްދަށް ގޮސްފައިވާ ކަމަށް ފުލުހުން ބުނެއެވެ. ފުލުހުން ބުނީ، އެ ސަރަހައްދަށް ގޮސް، ދޯނީގައި ތިބި 4 މީހުންގެ ތެރެއިން ދެ މީހެއް ނަގައިގެން މާލެ ގެނެސް އައިޖީއެމްއެޗަށް ގެންގޮސްފައިވާ ކަމަށެެވެ. އަދި ދޯނީގައި ތިބި އަނެއް ދެ މީހުންގެ ހާލު ރަނގަޅު ކަމަށާއި އެމީހުންނާއި ފުލުހުން ގުޅިގެން އެ ދޯނި މިހާރު ވަނީ އެނބޫދޫ ފިނޮޅު ކައިރީ ހިއްކަން ފަށާފައިވާ ސަރަހައްދަށް ގެންގޮސްފައި ކަމަށް ފުލުހުން މައުލޫމާތުދެއެވެ.މި ދޯނީގައި ތިބީ ބަންގްލާދޭޝްގެ 3 ފިރިހެނުންނާއި ދިވެއްސެއް ކަމަށް ފުލުހުން ބުނެއެވެެ. އަދި އޭގެ ތެރެއިން ހޮސްޕިޓަލަށް ގެންގޮސްފައި ވަނީ ބަންގްލަދޭޝްގެ ދެ ފިރިހެނުން ކަމަށް ފުލުހުން ވެސް ފުލުހުން ބުނެއެވެ. މީގެ އިތުރުން ފުލުހުން ވަނީ މި ވިއްސާރާގައި ދަތުރުކުރާ ފަތާތްތަކުން ރައްކާތެރިކަމުގެ ފިޔަވަޅު އެޅުމަށް ހާއްސަ ސަމާލުކަމެއް ދިނުމަށް އިލްތިމާސްކޮށްފައެވެ. އަދި ސަލާމަތާއި ރައްކާތެރި ކަމަށްޓަކައި ކޮންމެހެން ކުރަން ޖެހޭ ދަތުރެއް ނޫނީ ނުކުރުމަށް ފުލުހުން ވަނީ އެދިފައެވެ. ފުލުހުން މިހެން ބުނެފައިވާއިރު، މޫސުމާ ބެހޭ އިދާރާއިން ވަނީ ކ. އަތޮޅާއި ލ. އަތޮޅާއި ދެމެދުގެ އަތޮޅުތަކަށް ޔެލޯ އެލާޓް ނެރެފައެވެ. މިއަދު ހަވީރު 3:15އާ ހަމައަށް ނެރެފައިވާ މި އެލާޓުގައި ވަނީ، މި ސަރަހައްދަށްބޯކޮށް ވާރެވެހުމާއި އެކު ގުގުރާނެ ކަމަށެވެ. އަދި ދިޔަވަރު ބޮޑުވާ ގަޑިތަކުގައި ދެކުނާއި މެދުތެރޭގެ ބައެއް ރަށްތަކަށް އުދައިގެ އަސަރު ކުރުން އެކަށީގެން ވާ ކަމަށް ބުނެ އެ އިދާރާއިން ވަނީ މޫސުމަށް ސަމާލުވުމަށް އިލްތިމާސްކޮށްފައެވެ.
