ހުޅުމާލެ ޖެޓީގައި ރޭ މުދާ ބަރުކުރަމުން ދަނިކޮށް އަރިއަޅާލި ލޭންޑިން ކްރާފްޓް މިހާރު ފުންކުރެވިފައި ވާކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
އެމްއެންޑީއެފް އިން ބުނީ މި ބޯޓު ފުން ކުރެވިފައި ވާ ކަމަށާއި، ޕަމްޕް ބޭނުންކޮށްގެން ދިޔަ ހިއްކާ އުޅަނދު ބެލެންސް ނުކުރެވިފައި ވާ ކަމަށް އެމްއެންޑީއެފުން ބުނެއެވެ. އުޅަނދު ދިޔަވާތީ އެމްއެންޑީއެފް މާލެ އޭރިއާ ކޯސްޓް ގާޑް ސްކޮޑްރަން އިން އަންނަނީ ރެއިން ފެށިގެން ހަރަކާތްތެރި ވަމުންނެވެ.
އަރިއަޅާލާފައި ވަނީ "އަމީން ކެރިއާ 2" ނަމަކަށް ކިޔާ ލޭންޑިން ކްރާފްޓެކެވެ. އެ ބޯޓު އަރިއަޅާލައި ދިޔަވާކަމުގެ ރިޕޯޓު އެމްއެންޑީއެފަށް ލިބިފައި ވަނީ ރޭ ދަންވަރު 12:32 ހާއިރު ކަމަވެސް އެމްއެންޑީއެފުން މައުލޫމާތު ދެއެވެ.
މި ލޭންޑިން ކްރާފްޓް އަރިއަޅާލަން ޖެހުނު ސަބަބެއް އަދި ސާފެއް ނުވެއެވެ.
އޮޑި ދޯނި ފަހަރަށް މުދާ އަރުވާ ބޭލުމުގައި ރައްކާތެރި ފިޔަވަޅުތައް އެޅުން މުހިންމެވެ.
