ލ.ގަން މަތިމަރަދޫ އިން ސިހުރު ހެދުމަށް ބޭނުންކުރާ ފޮތްތަކެއް ފެނިއްޖެއެވެ.
މިކަމާ ގުޅިގެން ފުލުހުން ބުނީ، ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން މިއަދު 3:00 ހާއިރުު ކޯޓު އަމުރެއްގެ ދަށުން ލ. ގަން މަތިމަރަދޫ ގެއެއް ފާސްކޮށްފައިވާ ކަމަށެވެ.
ކޯޓު އަމުރެއްގެ ދަށުން ބަލާފާސް ކުރި ގެއިން ސިހުރު ހެދުމަށް ބޭނުންކުރާ ޒާތުގެ ފޮތްތަކެއް ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން މައުލޫމާތުދެއެވެ.
ފުލުހުން ބުނީ، މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާކަމަށެވެ. ނަމަވެސް، މި މައްސަލަ ފުލުހުން ތަހުގީގު ކުރަމުންދާ ކަމަށް ފުލުހުން ބުނެއެވެ.
ސިހުރު ހެދުމަށް ބޭނުންކުރާ ޒާތުގެ ފޮތްތަކެއް ލ. އަތޮޅުން މިއަދު ފެނިފައިވާއިރު މިދިޔަ އޮކްޓޯބަރު 4 ވަނަ ދުވަހު، މާފަންމު އާސަހަރާގެ މަހާނައެއްގެ މަތީގައި ކުޑަ ސަންދޯކެއް ވަޅުލައިފައި އޮއްވާ ވެސް ވަނީ ފެނިފައެވެ. އެ ސަންދޯއް ފެނިފައިވަނީ ހުކުރު ނަމާދަށްފަހު މީހަކު އޭނާގެ އާއިލާގެ މީހެއްގެ މަހާނައަށް ޒިޔާރަތް ކުރި އިރު ފަސްގަނޑު ހާވާފައި ހުރުމުން ޖަމާއަތްތެރިންގެ އެހީގައި ބެލި ބެލުމުންނެވެ.
ފޭސްބްކުގައި އޭނާ ކުރި ޕޯސްޓުގައި ބުނެފައިވާ ގޮތުގައިި، ޖަމާއަތްތެރިން މަހާނަ ކުޑަކޮށް ކޮނެލި އިރު ފެނުނު ކުޑަވަރެއްގެ ސަންދޯކުގެ މަތި ނަގާފައި ބެލި އިރު އޭގެ ތެރޭގައި އޮތީ ކަފަ އަޅާ ބަންދު ކޮށްފައި އޮތް ސިހުރެއް ކަމަށެވެ.
ސިހުރު ހާހޫރައަކީ ރާއްޖޭގައި ވަރަށް ބޮޑުވެފައި އޮތް މައްސަލައެކެވެ. ދޭތެރެ ދޭތެރެއިން އެފަދަ މައްސަލަތައް ފެންމަތިވެ، ސިހުރު ހަދަން ގެންގުޅޭ ތަކެތި ފުލުހުން އަތުލާފައިވެސް އެބަހުއްޓެވެ. އަދި ސިހުރު ހަދާކަމަށް ބުނާ ބައެއް މީހުން އާންމު ރައްޔިތުން ނުކުމެ ހިފަހައްޓާ އިއުތިރާފު ކުރުވާފައި ވެސް އެބަހުއްޓެވެ.
