ޖިނާއީ ކުށެއް ސާބިތުވެގެން ރައީސްކަން ކުރައްވާފައިވާ ފަރާތްތަކަށް އިއްވާ ހުކުމް ތަންފީޒުކޮށް ނިމުމުން، އިނާޔަތާއި ރައްކާތެރިކަން އަނެއްކާވެސް ދިނުމަށް ރައްޔިތުންގެ މަޖިލީހުން ފާސްކުރި އިސްލާހު ރައީސް ސޯލިހު ތަސްދީގު ކޮށްފިއެވެ.
އެ އިސްލާހު މަޖިލީހުން ފާސްވީ 58 މެންބަރުންގެ ވޯޓާއެކުއެވެ. ކުރިން އެ ގާނޫނުގައި ބުނެފައިވަނީ ރައީސުލްޖުމްހޫރިއްޔާކަން ކޮށްފައިވާ މީހަކު، އެ މަޤާމުގައި ހުރިއިރު، ޖިނާއީ ކުށެއް ކުރިކަން ޝަރީއަތަށް ސާބިތުވެފައިވާނަމަ، އޭނާއާ އޭނާގެ އަނބިމީހާއަށް ނުވަތަ ފިރިމީހާއަށް ގާނޫނުގެ ދަށުން ލިބިދޭ ރައްކާތެރިކަމާއި އިނާޔަތް ނުލިބޭނެ ކަމަށެވެ.
ނަމަވެސް ގާނޫނަށް ގެނެވުނު އިސްލާހުގައި ބުނެފައިވަނީ ރައީސްކަން ކޮށްފައިވާ ފަރާތަކަށް ޖިނާއީ ކުށެއް ސާބިތުވި ނަމަވެސް އެ ހުކުމް ތަންފީޒްކޮށް ނިމުމުން އިނާޔަތާއި ރައްކާތެރިކަން އަލުން ލިބެން ފަށާނެ ކަމަށެވެ. ރައީސްކަން ކޮށްފައިވާ މީހަކަށް ދޭންޖެހޭ ރައްކާތެރިކަމާއި އިނާޔަތްތަކާބެހޭ ބިލު ރައީސް ތަސްދީގު ކުރެއްވުމާ ގުޅިގެން، މިއަދު ވަނީ ދިވެހި ސަރުކާރުގެ ގެޒެޓްގައި އެ ގާނޫނު ޝާއިއުކޮށްފަ އެވެ.
