ސުޕްރީމްކޯޓުގެ ފަނޑިޔާރު ކަމަށް ސ.މީދޫ ހަސަންކާރިގެ ހުސްނުއްސުއޫދު އައްޔަން ކުރުމަށް މަޖިލީހުން ފާސްކޮށްފިއެވެ.
ސުޕްރީމްކޯޓުގެ ފަނޑިޔާރު ކަމަށް ކުރީގެ ބަންޑާރަ ނައިބު ހުސްނުއްސުއޫދުގެ އައްޔަން ކުރުމަށް މަޖިލީހުން ފާސްކޮށްފައި ވަނީ 64 މެންބަރުންގެ ވޯޓުންނެވެ. ސުޕްރީމްކޯޓުގެ ފަނޑިޔާރު ކަމަށް ސުއޫދު އައްޔަން ކުރުމާއި ދެކޮޅަށް ވޯޓުދެއްވާފައިވަނީ އެންމެ މެންބަރެކެވެ.
ސުޕްރީމް ކޯޓުގެ ފަނޑިޔާރު ކަމަށް ސުއޫދު އައްޔަން ކުރުމަށް މަޖިލީހުން ރުހުން ދީފައި ވަނީ، އޭނާގެ ޝަކުވާއެއް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާއި، ޖުޑިޝަލް ސާވިސް ކޮމިޝަން (ޖޭއެސްސީ)ގެ ރައީސް ހިސާން ހުސެއިނަށް ހުށަހަޅާފައި ވަނިކޮށެވެ. އެ ޝަކުވާއަކީ، ސުއޫދުގެ މައްޗަށް ކޮރަޕްޝަން ހިންގުމާއި، ރިޝްވަތު ނެގުމުގެ ތުހުމަތު ކުރައްވާ ކާށިދޫ ދާއިރާގެ މެންބަރު އަބދުﷲ ޖާބިރު ހުށަހަޅުއްވާފައިވާ ޝަކުވާއެކެވެ.
އުއްތަމަ ފަނޑިޔާރު ކަމަށާއި، ސުޕްރީމް ކޯޓުގެ ދެ ފަނޑިޔާރެއްގެ މަގާމަށް ބޭފުޅުން އައްޔަން ކުރުމަށް ރައީސް ނަން ފޮނުއްވީ، އެ މަގާމުތައް ދާދި ފަހުން ހުސްވެފައިވުމުގެ ސަބަބުންނެވެ. ސުޕްރީމް ކޯޓުން ތިން މަގާމެއް ހުސްވެފައި ވަނީ އެ ކޯޓުގެ ފަނޑިޔާރުންގެ ގޮތުގައި ތިއްބެވި ދެ ފަނޑިޔާރަކު މަގާމުން ވަކިކޮށް، އެއް ފަނޑިޔާރަކު ރިޓަޔާ ކުރެއްވުމާ ގުޅިގެންނެވެ. އެގޮތުން، ފަނޑިޔާރުކަމުން ވަކި ކުރި ދެ ފަނޑިޔާރުންނަކީ އުއްތަމަ ފަނޑިޔާރު ކަމުގައި ހުންނެވި ޑރ. އަހްމަދު އަބްދުﷲ ދީދީ އާއި ފަނޑިޔާރު ކަމުގައި ހުންނެވި އާދަމް މުހައްމަދު އަބްދުﷲއެވެ.
