ރައްޔިތުންގެ މަޖިލީހުގެ ތިން ވަނަ ދައުރު އަންނަ ހޮނިހިރު ދުވަހާ ހަމައަށް ދިގުކުރަން މަޖިލީހުން ފާސްކޮށްފިއެވެ.
މީގެ ކުރިން މަޖިލީހުގެ ދައުރު މިމަހުގެ ފަސް ވަނަ ދުވަހާ ހަމައަށް ވަނީ ދިގުކޮށްފައެވެ. މަޖިލީހުގެ ގަވައިދު ބުނާގޮތުން މަޖިލީހުގެ މި ދައުރު ނޮވެމްބަރުގެ މަހުގެ ނިޔަލަށް ނިމޭނެއެވެ. އިތުރު ދުވަސްތަކަކަށް ދައުރު ދަންމާލާނަމަ މަޖިލީހުގެ މެންބަރުންގެ އަޣުލަބިއްޔަތުން ވޯޓު ދީގެން އެ ގޮތަށް ފާސް ކުރަން ޖެހެއެވެ.
ނަމަވެސް މުހިންމު ބިލްތަކާއި މައްސަލަތަކެއް ނިންމަން ހުރުމުން ރިޔާސަތުން ވަނީ ދައުރު އަނެއްކާވެސް ދިގު ކުރަން ނިންމާފައެވެ.
މި ދައުރަށް ދެ ދުވަސް އިތުރުކުރަން ފާސްކުރީ މިއަދުގެ ޖަލްސާގައި އެ ކަމަށް ނެގި ވޯޓުގައި ބައިވެރިވެވަޑައިގެންނެވި 61 މެމްބަރުންގެ އަޣުލަބިއްޔަތުންނެވެ. ދައުރު އިތުރު ކުރަން ނުފެންނަ ކަމަށް ދެ މެންބަރަކު ވޯޓު ދެއްވިއެވެ. އަދި ވަކި ކޮޅަކަށް ވޯޓު ދެއްވަން އެއް މެންބަރަކު ބޭނުންނުވިއެވެ.
މަޖިލީހުގެ ތިންވަނަ ދައުރު އަނެއްކާވެސް ދިގު ކުރުމަށް މިއަދު މެންބަރުން ފާސްކުރެއްވި އިރު، މި މަޖިލީހުގެ ފުރަތަމަ ދައުރުވެސް ވެސް ދިގުކުރިއެވެ.
މަޖިލީހުގެ ދައުރު ހޮނިހިރު ދުވަހާ ހަމައަށް ދިގުކޮށްފައި ވާއިރު، ގިނަ މަސައްކަތްތަކެއް ނުނިމި މަޖިލީހުގައި އެބަހުއްޓެވެ. އެގޮތުން ސުޕްރީމް ކޯޓަށް އައްޔަން ކުރުމަށް ރައީސް އިބްރާޙިމް މުހައްމަދު ސޯލިހް ފޮނުއްވާފައިވާ ފަނޑިޔާރުންނަށް ރުހުން ދިނުމާއި، ޕްރޮސެކިއުޓަ ޖެނެރަލްގެ މަގާމަށް ރައީސް ފޮނުއްވާފައިވާ ބޭފުޅާއަށް ރުހުން ދިނުން ހިމެނެއެވެ. އަދި 2020 ވަނަ އަހަރަށް ލަފާކޮށް ދައުލަތުން ހުށަހެޅި ބަޖެޓް ފާސް ކުރުމުގެ މައްސަލަވެސް މަޖިލީހުގައި އެބައޮތެވެ.
