ކުރީގެ ރައީސް އަބުދުﷲ ޔާމީން މިނިވަން ކުރުމަށް ގޮވާލައި އިދިކޮޅު ޕީޕީއެމްގެ މެންބަރުން މަޖިލީހުގައި އިހްތިޖާޖް ކުރަން ފަށައިފިއެވެ.
ރައީސް ޔާމީން ދޫކޮށްލުމަށް ގޮވާލައި އިހްތިޖާޖް ކުރަމުން ގެންދަނީ ހަތަރު މެންބަރެކެވެ. އެމެންބަރުން ތިއްބެވީ ރައީސް ޔާމީން ދޫކޮށްލުމަށް ގޮވާލައި ކަރުދާސްތަކެއް ހިފައިގެނެވެ. އަދި ރައީސް ޔާމީން ވަނީ ގާނޫނުތަކާއި ހިލާފަށް ހައްޔަރުކޮށްފައި ކަމަށްބުނެ އެބޭފުޅުން ދަނީ މަޖިލީހުގައި އަޑުގަދަ ކުރަމުންނެވެ.
ޖަލްސާގައި އިދިކޮޅު މެންބަރުން އިޖްތިޖާޖް ކުރަމުންދާއިރު، މަޖިލިސް ރައީސް، ރައީސް ނަޝީދު ވަނީ އެކަމާ ގުޅިގެން ނިޒާމީ މައްސަލައެއް އެއްވެސް މެންބަރަކަށް ހުށަނާޅާނެ ކަމަށް ވިދާޅުވެފައެވެ. އަދި އިހްތިޖާޖް ކުރާ މެންބަރުން ފިޔަވާ، އެހެން މެންބަރުން އަޑުގަދަ ނުކުރުމަށްވެސް ނަޝީދު ވަނީ އަންގަވާފައެވެ.
"އިހުތިޖާޖު ކުރައްވާ އެއްވެސް މެންބަރުން ފިޔަވާ އެހެން މެންބަރުން އެއްވެސް ވާހަކަ ނުދައްކަވަން ވަރަށް އިލްތިމާސް ކުރައްވަން. ހިނިފުޅުވެސް ނުވެޑުވުން އަޅުގަނޑަށް މަސައްކަތް ކުރެވޭނެ ގޮތަށް ކުރިޔަށް ގެންދަވަން މަސައްކަތް ހާއްސަކޮށް އެމްޑީޕީގެ މެންބަރުން އެއްވެސް ވާހަކައެއް ނުދައްކަވަން އަޅުގަނޑު ވަރަށް ބޮޑަށް އެދެން،" ރައީސް ނަޝީދު ވިދާޅުވިއެވެ.
މިހާރު މަޖިލިސް ކުރިއަށް ގެންދަވަނީ މެންބަރުން ހެޑްސެޓް އަޅުއްވައިގެންނެވެ.
މަޖިލީހުގައި އިދިކޮޅުން އިހްތިޖާޖް ކުރަމުން ގެންދާއިރު، އިދިކޮޅު ފަރާތްތަކުން އަންނަނީ ކޮންމެ ރެއަކު މާލޭގައި މުޒާހަރާ ކުރަމުންނެވެ. މުޒާހަރާތަކުގައި ގޮވާލަމުން ގެންދަނީ ރައީސް ޔާމީން ދޫކޮށްލުމަށެވެ. ރޭވެސް މާލޭގެ އެކި ސަރަހައްދުތަކުގައި ކުރި މުޒާހަރާތަކުގައި ތިން މީހަކު ހައްޔަރުކޮށްފައިވެއެވެ.
އެމްއެމްޕީއާރްސީ މެދުވެރިކޮށް، ގއ. ވޮޑަމުލާ ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު އަމިއްލަފުޅު އެކައުންޓަށް ޖަމާކޮށް އެ ފައިސާ ލޯންޑާ ކުރި ކަމުގެ ދައުވާގެ ކުށް ސާބިތުވެ، ޔާމީނަށް ފަސް އަހަރު ދުވަހުގެ ޖަލު ހުކުމެއް ކްރިމިނަލް ކޯޓުން އިއްވީ މިދިޔަ ބުރާސްފަތި ދުވަހުއެވެ.
ފަސް އަހަރަށް ޖަލަށްލުމުގެ އިތުރުން ފަސް މިލިއަން ޑޮލަރުން ޔާމީން ޖޫރިމަނާ ކުރަން ވެސް ކޯޓުން ވަނީ ހުކުމްކޮށްފައެވެ. އަދި އެ ފައިސާ ހަ މަސް ދުވަހުގެ ތެރޭގައި ދައްކަން ވަނީ އަންގާފައެވެ. މި ހުކުމް ހައިކޯޓުގައި މިހާރުވަނީ އިސްތިއުނާފު ކޮށްފައެވެ. އަދި ކަފާލާތުގެ ދަށުން ޔާމީން މިނިވަން ކޮށްދިނުމަށްވެސް ވަނީ ހުށަހަޅާފައެވެ.
