ރ. މާކުރަތު ކޯޓުގެ އިސް މެޖިސްޓްރޭޓް އަދުނާނު ހުސައިން އެ މަގާމުން ވަކި ކުރުމުގެ މައްސަލަ ދިރާސާ ކުރުމަށް ރައްޔިތުންގެ މަޖިލީހުގެ ޖުޑިޝަރީ ކޮމެޓީއަށް ފޮނުވައިފިއެވެ.
ޖުޑީޝަލް ސާވިސް ކޮމިޝަން އިން އަދުނާނު ވަކި ކުރުމަށް ނިންމާފައިވަނީ ރޭ ބޭއްވި ބައްދަލުވުމުގައެވެ.
މަޖިލީހުގެ މިއަދުގެ ޖަލްސާގައި މެޖިސްޓްރޭޓްގެ މަގާމުން އަދުނާނު ވަކިކުރުމުގެ މައްސަލަ ވަނީ ޖުޑިޝަރީ ކޮމެޓީއަށް ފޮނުވާފައެވެ.
ޖޭއެސްއީން ރޭ ނެރުނު ބަޔާނެއްގައި ބުނީ އަދުނާނު މެޖިސްޓްރޭޓް ކަމުން ވަކިކޮށްދިނުމަށް އެދި މަޖިލީހަށް ފޮނުވާފައި ވަނީ އޭނާއާ ގުޅޭ ގޮތުން ހުށަހަޅާފައިވާ ސުލޫކީ މައްސަލަތައް ސާބިތު ވެފައި ވާތީ ކަމަށެވެ. އަދި އަދުނާނުގެ ކިބައިގައި ހުރުން ލާޒިމުކުރާ ސުލޫކީ ސިފަތައް ނެތިގެންދާ ފަދަ އަމަލެއް ކޮށްފައިވާ ކަމަށް ކޮމިޝަނަށް އިއްތިފާގުވެފައިވާ ކަމަށްވެސް ބަޔާނުގައިވެއެވެ.
އެހެން ނަމަވެސް އަދުނާނަށް ސާބިތުވީ ކޮން ސުލޫކީ މައްސަލައެއް ކަމަށް އަދި އެކަމުގެ އެއްވެސް ތަފްސީލެއް ޖޭއެސްސީގެ ބަޔާނުގައި ބުނެފައެއް ނުވެއެވެ.
އަދުނާނުގެ އިތުރުން ކުރިމިނަލް ކޯޓްގެ އިސް ގާޒީ އަހުމަދު ހައިލަމް އަދި ކ. ތުލުސްދޫ ކޯޓުގެ މެޖިސްޓްރޭޓް އައިނާނު އަލީ މުހައްމަދުވެސް ވަކި ކުރަން ޖޭއެސްސީ އިން ވަނީ މަޖިލީހަށް ހުށަހަޅާފައެވެ. އެދެމައްސަލަވެސް ދިރާސާ ކުރުމަށް ޖުޑިޝަރީ ކޮމެޓީއަށް ވަނީ ފޮނުވާފައެވެ.
ހައިލަމްއާ ގުޅޭ ގޮތުން ޖޭއެސްސީއިން ބެލީ ނަސްރުގެ ދުވަހާ ގުޅިގެން ކުރިމިނަލް ކޯޓުގެ އިޖުތިމާއީ ކަންކަމުގައި މަޝްވަރާކޮށް ހިޔާލު ބަދަލު ކުރުމަށް ހަދާފައިވާ ވައިބާ ގުރޫޕަށް ހައިލަމް ފޮނުއްވި ތަހުނިޔާގެ މެސެޖާ ގުޅޭ މައްސަލައެވެ.
ވައިބާ ގްރޫޕަކަށް ގަންހިންގުވާ ފޮޓޯއެއް ޝެއާ ކުރެއްވުމުގެ އިތުރުން އޭނާ އަށް ރައްޔިތުންގެ މަޖިލިހުގެ ކުރީގެ މެމްބަރު އަލްހާން ފަހުމީ 200،000ރ. ދެއްވި މައްސަލައެއް ވެސް ޖޭއެސްސީން ބެލި އެވެ. އެކަމުގައި ޖިނާއީ އެއްވެސް ކަމެއް ހިނގާފައި ނޯންނާނެ ކަމަށާއި އަލްހާނަކީ އޭނާގެ ގާތް އެކުވެރިއެއް ކަމަށް ހައިލަމް ވިދާޅުވެފައިވެއެވެ.
