ނ. މާފަރުގައި ތަރައްގީކޮށްފައިވާ މާފަރު އިންޓަނޭޝަނަލް އެއާޕޯޓް (އެމްއައިއޭ) އަށް ފުރަތަމަ ކޮމާޝަލް ފްލައިޓު ޖައްސައި، ރަސްމީކޮށް އެއާޕޯޓު ހުޅުވައިފިއެވެ.
މާފަރު އެއާޕޯޓް ހުޅުވުމަށްޓަކައި މިއަދު ބޭއްވި ރަސްމިއްޔާތު ޝަރަފުވެރި ކޮށްދެއްވީ، ޕްލޭނިން މިނިސްޓަރު މުހައްމަދު އަސްލަމެވެ. މާފަރު އެއާޕޯޓަށް ޝެޑިއުލް ދަތުރުތައް މިއަދު ފަށާފައި ވާއިރު، މާލެ އިން މާފަރަށް ދިއުމުގެ އެއްކޮޅު ޓިކެޓެއްގެ އަގަކީ 750 ރުފިޔާއެވެ.
މާފަރު އެއާޕޯޓަށް ފުރަތަމަ ޓެސްޓު ފްލައިޓު، މިދިޔަ އަހަރުގެ ރިޔާސީ އިންތިހާބާ ދިމާކޮށް ޖައްސާފައިވީ ނަމަވެސް ފުރިހަމަ ކުރަންޖެހޭ ބައެއް ކަންތައް ފުރިހަމަ ނުވެ ހުރުމުގެ ސަބަބުން އެ އެއާޕޯޓު ހުޅުވުން އެކިފަހަރު މަތިން ވަނީ ފަސްކޮށްފައެވެ. އަދި އެރަށު އެއާޕޯޓް ހުޅުވުމުގައި ރަސްމީ ކުލަ ޖެހިގެން މި ދިޔައީ މިއަދެވެ.
އެއާބަސް އޭ 320 މަރުކާގެ މަތިންދާބޯޓު ޖެއްސޭގޮތަށް، 2200 މީޓަރުގެ ރަންވޭ އަކާއެކު، ތަރައްގީ ކޮށްފައިވާ މާފަރު އެއާޕޯޓަކީ، ޔުނައިޓެޑް އަރަބް އެމިރޭޓްސް (ޔޫއޭއީ)ގެ އަބޫދާބީ ފަންޑުން ސިންގަޕޫރުގެ 'ޓަފް އޮފްޝޯ' ނަމަކަށް ކިޔާ ކުންފުންޏަކާ ހަވާލުކޮށްގެން ކުރިއަށް ގެންދިޔަ މަޝްރޫއެކެވެ.
މާފަރު އެއާޕޯޓް ހުޅުވުމާ ބެހޭގޮތުން ނޫސްވެރިންނަށް މައުލޫމާތު ދެއްވަމުން އެރަށު ކައުންސިލް ރައީސް، އަބްދުލް މާޖިދު އަލީ ވިދާޅުވީ، އެއާޕޯޓް ތަރައްގީވެ ހުޅުވުމުން ރަށުގެ އެހެނިހެން ކަންކަމަށް ތަރައްގީ އަންނާނެ ކަމަށް އުއްމީދު ކުރައްވާ ކަމަށެވެ. އެގޮތުން ލޯކަލް ޓުއަރިޒަމް ތަރައްގީވެ، ރަށުގައި ވަޒީފާގެ ފުރުސަތު ލިބެން ފެށުމުން، ރަށުން ބޭރަށް ދިޔަ ރަށުގެ ރައްޔިތުން އެނބުރި ރަށަށް އަންނާނެ ކަމަށް ގަބޫލު ކުރައްވާ ކަމަށް ވެސް އޭނާ ވިދާޅުވިއެވެ.
1250 އާބާދީއެއް އޮންނަ މާފަރުގައި މިހާރު ދިރިއުޅެމުން ދަނީ 600 އެއްހާ މީހުންނެވެ. މާފަރުގެ ބަނދަރު ހަދާފައި ވާއިރު، 12 އަހަރުގެ މަސައްކަތުން އަޅާފައިވާ އެރަށުގެ އެއާޕޯޓް ރަސްމީކޮށް ހުޅުވަނީ މިއަދެވެ. ރަށަށް އާމްދަނީ ހޯދަން މީހުން ކުރާ މަސައްކަތަކީ ބޮޑު ކަންނެއްޔަށް ދިއުމެވެ. މާފަރަކީ ދަނޑުވެރިކަން ކުރާ ރަށެއް ނޫނެވެ.
