ޕްރޮސިއުޓާ ޖެނެރަލް (ޕީޖީ) ގެ މަގާމަށް ކުރިމަތިލުމުގެ ފުރުސަތު ހުޅުވާލައިފިއެވެ.
ޕީޖީގެ މަގާމަށް ބޭފުޅަކު އައްޔަން ކުރުމަށް، އެ މަގާމަށް ޝައުގުވެރިވާ ފަރާތްތަކަށް ރައީސް އޮފީހުން އެ ފުރުސަތު ހުޅުވާލާފައިވަނީ އެ މަގާމުގައި އިންނެވި އައިޝަތު ބިޝާމް މިއަދު އެ މަގާމުން އިސްތިއުފާ ދެއްވާފައިވާތީއެވެ.
ޕީޖީގެ މަގާމަށް ކުރިމަތިލުމަށް މިއަދު ހުޅުވާލި ފުރުސަތުގެ ސުންގަޑިއަކީ، އަންނަ އާދީއްތަ ދުވަހުގެ 14:00 އެވެ. މި މަގާމަށް ކުރިމަތިލުމަށް އެދޭ ފޯމު ރައީސް އޮފީހުގެ ވެބްސައިޓުން ޑައުންލޯޑް ކުރެއްވޭނެއެވެ.
ޕީޖީގެ މަގާމުގައި އިންނެވި ބިޝާމް އިސްތިއުފާ ދެއްވާފައި ވަނީ މިއަދު ހެނދުނުގެ ވަގުތެއްގައި ކަމަށް ވިދާޅުވެ ރައީސް އިބްރާހިމް މުހައްމަދު ސޯލިހު ވަނީ ޓްވީޓެއް ކުރައްވާފައެވެ. ރާއްޖޭގެ ޕްރޮސެކިއުޓާ ޖެނެރަލްގެ މަގާމުގައި ހުންނަވައިގެން ކޮށްދެއްވި ހިދުމަތަށް ރައީސް ވަނީ އެޓްވީޓުގައި ޝުކުރު ދަންނަވާފައެވެ.
ބިޝާމް އިސްތިއުފާ ދެއްވަމުން ވަނީ ޕީޖީގެ މުވައްޒަފުންނަށް، މެސެޖެއްވެސް ފޮނުއްވާފައެވެ. އެ މެސެޖުގައި ބިޝާމް ވިދާޅުވެފައި ވަނީ ވޭތުވެދިޔަ 4 އަހަރު ދުވަހު ޕީޖީގެ މުވައްޒަފުންނާއެކު މަސައްކަތް ކުރެއްވުނު މުއްދަތަކީ ތަޖުރިބާއިން ފުރިގެންވާ، ފިލާވަޅުތަކެއް ލިބިވަޑައިގެން ދުވަސްތަކެއް ކަމަށެވެ. ތަނުގެ މުވައްޒަފުންގެ ފަރާތުން ލިބުނު ފުރިހަމަ އެއްބާރުލުމަށްޓަކައި ޝުކުރު ދަންނަވާ ކަމަށް ވިދާޅުވެ ބިޝާމް ވަނީ ވަރަށް ބޮޑެތި ގޮންޖެހުންތަކާއެކު މުވައްޒަފުން ކުރާ މަސައްކަތްތަކަކީ އަބަދުވެސް ފަހުރުވެރިވެ ވަޑައިގަންނަވާ މަސައްކަތްތަކެއް ކަމަށް ފާހަގަ ކުރައްވާފައެވެ. އަދި މަސައްކަތުގައި ގައުމު އިސްކުރުމަށާއި، އިހުލާސްތެރި ވުމަށާއި، ފަރުވާތެރި ވުމާއި، އަހުލާގު އިސްކުރުމަށް ބިޝާމް ނަސޭހަތްތެރިވެ ވަޑައިގެންފައި ވެއެވެ. އަދި މުވައްޒަފަކު ހިތުގައި ޖެހޭ ކަމެއް ކުރެއްވިފައި ވާނަމަ އެކަމަށްޓަކައި މައާފަށް އެދިވަޑައިގަންނަވާ ކަމަށްވެސް ވިދާޅުވިއެވެ.
މި މަހުގެ 20ވަނަ ދުވަހު ބޭއްވި މަޖިލީހުގެ ޖަލްސާގައި ވާހަކަދައްކަވަމުން ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ޕީޖީ އައިޝަތު ބިޝާމް މަގާމުން ވަކި ކުރުމަށް ރައްޔިތުން މަޖިލީހުގެ ޖުޑީޝަރީ ކޮމެޓީން ނިންމީ، ނޫސްވެރިޔާ އަހުމަދު ރިޟްވާން މަރާލި މައްސަލާގައި މަރު ކޮމިޝަނުން ކުރި ތަހުގީގުގައި ބަޔާންކޮށްފައިވާ ފަރާތްތަކަށް ގާނޫނުގައިވާ ގޮތުގެ މަތިން ދައުވާ ކުރުމުގައި ޕީޖީގެ މަސްއޫލިއްޔަތު އަދާ ކުރައްވަމުން ނުގެންދަވާތީ ކަމަށެވެ.
