ވިލިމާލެ ފަޅުތެރޭގައި އޮތް ތެޔޮ ބޯޓެއްގައި ރޯވެއްޖެއެވެ.
އެމްއެންޑީއެފްއިން ބުނީ ވިލިމާލެ ފަޅު ތެރޭގައި އަޅާފައި އޮތް ތެޔޮ ބޯޓަކާއި އިތުރު ދޯންޏެއްގައި އަލިފާން ރޯވެގެން އެމްއެންޑީއެފް ފަޔާ އެންޑް ރެސްކިއު ސާވިސް އިން ހަރަކާތްތެރިވަމުން އަންނަ ކަމަށެވެ. އެ ހާދިސާގެ މައުލޫމާތު އެމްއެންޑީއެފްއަށް ލިބިފައިވަނީ މިރޭ 22:40 އެހާކަށްހާއިރު ކަމަށްވެސް އެމްއެންޑީއެފްއިން ބުންޏެވެ.
މި ހާދިސާގައި 6 މީހަކު ފިހިގެން ވިލިމާލެ ހޮސްޕިޓަލަށް ގެންގޮސްފައިވާ ކަމަށް އެމްއެންޑީއެފްއިން ބުންޏެވެ. އަދި ތެޔޮ ބޯޓުން އެކަކު މަދު ކަމަށް އެމްއެންޑީއެފްއަށް ރިޕޯޓު ލިބުމުން އެމީހާ ހޯދުމުގެ މަސައްކަތްވެސް އެމްއެންޑީއެފްއިން ކުރިއެވެ. އެމްއެންޑީއެފްއިން ބުނި ގޮތުގައި އަލިފާންގަނޑު ނިއްވާލެވިފައިވާ ކަމަށާއި އަދި ތެޔޮ ބޯޓުގެ ހުރިހާ އެންމެންވެސް ފެނިފައިވާ ކަމަށެވެ.
މިހާދިސާގައި ފަޔާ ފައިޓަރެއްގެ ބޯ ފަޅާއިގެން ދިޔަ ކަމަށް ވެސް އެމްއެންޑީއެފުން ބުނެއެވެ.
ދާދިފަހުން މާލޭގެ ޓީޖެޓީ ސަރަހައްދުގައި އަޅާފައިވާ ލޯންޗެއްގައި އަލިފާން ރޯވެ އެ ސަރަހައްދުގައި އޮތް ތެޔޮ ބައުޒަރުތަކެއްގައިވެސް ވަނީ އަލިފާން ރޯވެ، އަލިފާނުގެ ބޮޑު ހާދިސާއެއް ހިނގާފައެވެ. އެ ހާދިސާގައިވެސް ބައެއް މީހުންނަށް އަނިޔާވިއެވެ. އަދި އޭގެތެރެއިން އެކަކު ވަނީ އިތުރު ފަރުވާ ހޯދުމަށް ރާއްޖެއިން ބޭރަށްވެސް ގޮސްފައެވެ.
