ގދ. މަޑަވެލީގައި މަސް ހިފަން ދިޔަ މީހަކު ގެއްލިގެން ހޯދަން ފަށައިފިއެވެ.
ގެއްލިގެން ހޯދަމުން ދަނީ ގަމަރީ، މުހައްމަދު ސައީދު 72، އެވެ.
މަޑަވެލި ކައުންސިލުން ކޮށްފައިވާ ފޭސްބުކް ޕޯސްޓެއްގައި ބުނެފައި ވަނީ އެމީހާ މިއަދު މެންދުރުފަހު މަސް ހިފަން ދިޔަ ގޮތަށް ހަބަރެއް ނުވާ ކަމަށެވެ. އަދި އެމީހާގެ ހަބަރެއް ނުވެގެން އާއިލާއިން ކައުންސިލަށް ރިޕޯޓު ކުރުމުން ކައުންސިލުން ވަނީ ފުލުހުންނާއި އެމްއެންޑީއެފްއަށް އެކަމުގެ މައުލޫމާތު ދީފައެވެ.
އޭނާ ހޯދުމަށް އެރަށު ރައްޔިތުން ނިކުމެ މިހާރުވެސް ދަނީ ކުރަމުން ކަމަށް ކައުންސިލުން ވަނީ "ދަ ޕްރެސް" އަށް ކިޔައިދީފައެވެ.
ފުލުހުން ބުނީ އެމީހާ ގެއްލިގެން އުޅޭ ކަމަށް ފުލުހުންނަށް ރިޕޯޓު ކޮށްފައިވާ ކަމަށެވެ. އަދި އޭނާ ހޯދުމުގެ މަސަކަތް ކުރަމުން އަންނަ ކަމަށް ފުލުހުން ބުންޏެވެ.
ފުލުހުން ބުނީ އެމީހާ މަސް ހިފަން ނިކުތީ މަޑަވެލި ފަރުމައްޗަށް ކަމަށާއި މަސް ހިފަން ނިކުތީ އެކަނި ކަމަށެވެ. މަސް ހިފުމަށްޓަކައި ދަލެއް އޭނާ ގެންދިޔަ ކަމަށް ފުލުހުން ބުންޏެވެ.
ދާދިފަހުން ވެސް ރާއްޖޭގެ ރަށަކުން އުމުރުން ދުވަސްވީ މީހެއް ގެއްލިގެން ވަނީ ހޯދާފައެވެ. އެމީހާ ފެނުނީ އެރަށު ވަލުތެރެއިންނެވެ.
