މާލެ ސިޓީ ކައުންސިލްގެ މޭޔަރު ސިފާ މުހައްމަދު ބޮޑުތަނުން ފެއިލްވެފައިވާ ކަމަށް އިދިކޮޅު ޕްރޮގްރެސިވް ކޯލިޝަން، ޕީއެންސީގެ ނާއިބު ރައީސް އަދި ބާރަށު ދާއިރާގެ ކުރީގެ މެންބަރު އިބްރާހީމް ޝުޖާއު ވިދާޅުވެއްޖެއެވެ.
ޝުޖާއު މިފަދައިން ވިދާޅުވީ އޭނާގެ ޓްވީޓާގައި މާލޭގެ މަގުމައްޗަށް ނަޖިސް ފެން ބޭރުވަމުންދާ ވީޑިއޯއެއް ޕޯސްޓު ކުރައްވައެވެ. އެ ވީޑިއޯއިން ފެންނަނީ މާލޭގެ މަގަކަށް ވަރަށް ބޮޑަށް ނަޖިސްފެން ބޭރުވާ މަންޒަރެވެ. ޝުޖާއު ވިދާޅުވީ އެއީ މައްޗަންގޮޅި ނިކަގަސް މަގުގައި ހުންނަ ގެއަކުން ބޭރުވަމުން ދާ ނަޖިސް ފެންތަކެއް ކަމަށެވެ. އޭނާ ވިދާޅުވީ މާލެ ސިޓީ ކައުންސިލް ފެއިލް ވެފައިވާވަރު އެ ވީޑިއޯއިން އެކަނިވެސް ފެނިގެންދާނެ ކަމަށެވެ.
"ސިފާ މުހައްމަދު، ކަމަނާއަށް ހަމަވާ ކަމެއްހެން ވެސް ހީނުވޭ ދެއްތޯ. އެނގިވަޑައިގަންނަވާތޯ، ތިހުންނެވީ ބޮޑުތަނުން ފެއިލްވެފައި،" ޝުޖާއު ވިދާޅުވިއެވެ.
ޝުޖާއު މިފަދައިން ވިދާޅުވިއިރު މާލޭގައި ހުންނަ ދަތުރުވެރިންގެ މާރުކޭޓު ބަންދުކޮށްފައި ހުންނަތާ އަށް މަސްވެފައިވާ ކަމަށާއި އެކަމުގެ ސަބަބުން އެތައް އާއިލާއެއް މަގުމަތިވެފައިވާކަމަށް ބުނެ މާލޭ ސިޓީ މޭޔަރު ސިފާ މުހައްމަދު އިސްތިއުފާ ދެއްވުމަށް އިދިކޮޅު ޕީޕީއެމްގެ ނައިބު ރައީސް އަހުމަދު ޝިޔާމް ވަނީ ދާދިފަހުން ގޮވާލައްވާފައެވެ.
މީގެއިތުރުން މާލެ ސިޓީ ކައުންސިލްގެ މޭޔަރަށް ތަފާތު އެކި ތުހުމަތުތައް އެ ކައުންސިލްގައި ތިއްބަވާ މެންބަރުން އަންނަނީ ކުރައްވަމުންނެވެ. އެގޮތުން ކޮރަޕްޝަނަށް މަގުފަހިވާ ގޮތަށް ތަފާތު އެކި މަސައްކަތްތައް އެކި ފަރާތްތަކާއި ހަވާލު ކުރައްވަމުން ގެންދަވާ ކަމަށްވެސް ސިޓީ ކައުންސިލްގެ ބައެއް މެންބަރުން ވަނީ ތުހުމަތު ކުރައްވާފައެވެ. ނަމަވެސް މޭޔަރު ޝިފާ އަންނަނީ އެ ތުހުމަތުތައް ދޮގު ކުރައްވަމުންނެވެ.
މި ކަންކަން މިހެން ހުއްޓާ ޝިފާގެ އޮފީސް ވަނީ ދާދިފަހުން ބަޔަކު ފަޅާލައފައެވެ.
