މެޖިސްޓްރޭޓުންނަށް ފޯނު އެލެވަންސް ހަމަޖެއްސުމަށް މަޖިލީހަށް ހުށަހަޅަން ޖުޑިޝަލް ސާވިސް ކޮމިޝަން (ޖޭއެސްސީ) އިން ނިންމައިފިއެވެ.
ޖޭއެސްސީން މިއަދު ބޭއްވި އެ ކޮމިޝަނުގެ 84 ވަނަ ބައްދަލުވުމުގައި ވަނީ އެހެން ފަނޑިޔާރުންނެކޭ އެއްފަދައިން މެޖިސްޓްރޭޓުންނަށް ވެސް ފޯނު އެލެވަންސް ހަމަޖެއްސުމަށް ފެންނަ ކަމަށާއި، ފޯނު އެލަވެންސްގެ ގޮތުގައި މަހަކު 500 ރުފިޔާ ހަމަޖެއްސުމަށް މަޖިލީހަށް ހުށަހެޅުމަށް ނިންމާފައެވެ.
ޖޭއެސްސީން މިއަދު ލ. ފޮނަދޫގައު ބޭއްވި ބައްދަލުވުމަކީ އެ ކޮމިޝަނުގެ ތާރީހުގައި ފުރަތަމަ ފަހަރަށް އަތޮޅު ތެރޭގައި ބޭއްވި އެ ކޮމިޝަނުގެ ބައްދަލުވުމެވެ.
މިއަދު ބޭއްވި ބައްދަލުވުމުގައި ޖޭއެސްސީން ވަނީ، ތައުލީމާއި ތަމްރީނު ޕްރޮގްރާމްތަކުގައި ބައިވެރިވެވޭނެ ފުރުސަތު ފަނޑިޔާރުންނަށް ވިހާވެސް ފުޅާގޮތުގައި ހުޅުވާލުމަށްޓަކައި ހަރުދަނާ ސިޔާސަތެއް އެކުލަވާލައި އާންމު ކުރުމަށްޓަކައި ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އަށް ހުށަހެޅުމަށް ނިންމާފައެވެ.
މި ސިޔާސަތު އެކުލަވާލުމުގައި، ދައުލަތުގެ ހަރަދުގައި އަދި ފަނޑިޔާރުންގެ އަމިއްލަ ހަރަދުގައި މިފަދަ ޕްރޮގްރާމްތަކުގައި ބައިވެރިވެވޭނެ ގޮތާއި، މާލީ ގޮތުން ފަސޭހަ ލުއި އަދި ފަހި ސްކީމްތަކެއް ތައާރަފްކުރުމާއި، ތައުލީމާއި ތަމްރީނުތަކުގައި ބައިވެރިވުމަށް ބާރުއެޅޭ ގޮތަށް މި ސިޔާސަތު ބައްޓަން ކުރުމުގެ މުހިންމު ކަމުގެ މައްޗަށް މިއަދު ބޭއްވި ޖޭއެސްސީގެ ބައްދަލުވުމުގައި ވަނީ މެންބަރުން ޝުއޫރު ފާޅުކުރައްވާފައި ކަމަށް ޖޭއެސްސީން ބުނެއެވެ.
