އިލެކްޝަންސް ކޮމިޝަން (އީސީ)ގެ ނައިބު ރައީސް ކަމަށް އެ ކޮމިޝަނުގެ މެންބަރު އަހްމަދު އަކްރަމް އިންތިހާބު ކޮށްފިއެވެ.
އީސީން ބުނީ ނައިބު ރައީސްކަމުގެ މަގާމަށް އަކްރަމް އިންތިހާބު ކޮށްފައި ވަނީ އެ ކޮމިޝަނާ އަލަށް ގުޅިވަޑައިގެންނެވި މެންބަރު ފުވާދު ތައުފީގަށް މަރުހަބާ ދެންނެވުމަށާއި، އެ ކޮމިޝަނަށް ނައިބު ރައީސަކު ހޮވުމަށް މިއަދު ބޭއްވި 16 ވަނަ ކުއްލި ޖަލްސާއިން ކަމަށެވެ.
އީސީގެ ނައިބް ރައީސް ކަމަށް އަކްރަމް މިއަދު އިންތިހާބު ކޮށްފައި ވާއިރު، ކުރިން އެ މަގާމުގައި ހުންނެވި އަމްޖަދު މުސްތަފާގެ ދައުރު ވަނީ ހަމަވެފައެވެ.
އީސީގެ މެންބަރު ކަމަށް ދާދި ފަހުން ފުއާދު އައްޔަން ކޮށްފައި ވަނީ އިލެކްޝަންސް ކޮމިޝަނުގެ މެންބަރެއްގެ ދައުރު ހަމަވާތީ، ރައީސް އޮފީހުން ކުރި އިއުލާނަކާއި ގުޅިގެން އެ މަގާމަށް އޭނާ ކުރިމަތިލެއްވުމުންނެވެ. އިލެކްޝަންސް ކޮމިޝަންގެ މެންބަރު ކަމަށް އައްޔަން ކުރުމަށް ރައީސް އިބްރާހީމް މުހައްމަދު ސޯލިހު، ރައްޔިތުންގެ މަޖިލީހަށް ހުށަހެޅުއްވި ނަންތަކުގެ ތެރެއިން، ކޮމެޓީން ދިރާސާ ކުރުމަށް ފަހު، ނަންތައް ތަރުތީބު ކުރިއިރު، ވެސް ފުރަތަމަ ނަމަކަށް ކޮމެޓީން ފާސްކޮށްފައި ވަނީ ފުއާދު ތައުފީގުގެ ނަމެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމެޓީން އެ ބޭފުޅުންނާ އިންޓަވިއުކޮށް، ދިރާސާ ކުރުމަށްފަހު، ކޮމެޓީން ފާސްކޮށްފައި ވަނީ ފުއާދު ތައުފީގު ގެ އިތުރުން، އަމުޖަދު މުސްތަފާއި ހަނީފާ ހާލިދެވެ. ކޮމެޓީންވެސް ވަނީ އިސްކަންދޭ ތަރުތީބުން ފުރަތަމަ ބޭފުޅަކަށް ފުއާދުގެ ނަން ވަނީ ފާސްކޮށްފައެވެ. ފުއާދު ތައުފީގަކީ މީގެކުރިން އިލެކްޝަންސް ކޮމިޝަނުގެ ރައީސްކަން ވެސް ކުރައްވާފައިވާ ބޭފުޅެކެވެ.
