ގަވާއިދާ ހިލާފަށް ރާޢްޖޭގެ ސަރަހައްދުގައި މަސްވެރިކަން ކުރަން އުޅެނިކޮށް އަތުލައިގަތް ލަންކާގެ 7 މަސް ބޯޓު ކޯސްޓްގާޑް ޝިޕް ޝަހީދު އަލީ ބެލުމުގެ ދަށުން ރޭ ފަތިހު ހުޅުމާލެއަށް ގެނެސްފިއެވެ.
އެމްއެންޑީއެފުން ބުނީ މި ބޯޓުތައް އަތުލީ މާލޭގެ އިރުން 175 މޭލު ބޭރުން ކަމަށެވެ. މި ބޯޓުތައް އަތުލި އިރު މީގެ ތެރެއިން ދެ ބޯޓު އޮތީ ދާ އަޅައިގެން މަސްވެރިކަން ކުރަން ކަމަށްވެސް ކޯސްޓްގާޑާ ހަވާލާދީ އެމްއެންޑީއެފުން ބުނެއެވެ.
ރާއްޖޭގެ އިގްތިސޯދީ ކަނޑުގެ ސަރަޙައްދަށް ގަވާއިދާ ހިލާފަށް ވަދެއުޅުނު ލަންކާގެ ހަތް މަސް ބޯޓެއް އެމްއެންޑީއެފުން އަތުލައިގެންފައިވާއިރު، މިދިޔަ މާޗް މަހު ވެސް އެމްއެންޑީއެފުން ވަނީ ހއ ކެލާގެ އިރު އުތުރުން ރާއްޖޭގެ އީއީޒެޑްގައި މަސްވެރިކަން ކުރަމުން ދިޔަ ސްރީލަންކާގެ 4 މަސްބޯޓެއް އަތުލައިގެންފައެވެ.
އޭރު ކެލާގެ އިރު އުތުރުން 103 ނޯޓިކަލް މޭލުން މަސްވެރިކަން ކުރަން އުޅެނިކޮށް ފުރަތަމަ ފެނުނީ ދެބޯޓު ކަމަށާއި، ކޯސްޓްގާޑުގައި އޮންނަ އެންމެ ބޮޑު ބޯޓް "ހުރަވީ" އިން އެ ދެބޯޓު ހިފަހައްޓާ ހދ ކުޅުދުއްފުށްޓަށް ގެނައުމަށް މިސްރާބު ޖަހާފައި ވަނިކޮށް އަނެއްކާ އިތުރު 2 ބޯޓު ފެނިގެން އަތުލި ކަމަށް ކޯސްޓްގާޑުން ވަނީ ބުނެފައެވެ. މި މަސްބޯޓު ތަކުން ހައްޔަރު ކުރި 21 މީހުން ލަންކާ ބޮޑު ވަޒީރު ރަނިލް ވިކްރަމް ސިންހާއާ ރާއްޖޭގެ ސަރުކާރުގެ އިސް ފަރާތްތާކައި ކުރެވުނު މަޝްވަރާތަކަށް ފަހު ވަނީ ލަންކާއަށް އަނބުރާ ފޮނުވާލާފައެވެ.
ރާއްޖެއަކީ ކަނޑުގެ މަސްވެރިކަމަށް މަގުބޫލު މަންޒިލެކެވެ. ރާއްޖޭގެ ކަނޑުގެ ސަރަހައްދު ބޮޑު ކަމާ ވަސީލަތްތަކުގެ މަދުކަމުން ރާއްޖޭގެ ކަނޑުން ވަގަށް މަސްވެރިކަން ކުރި ނަމަވެސް ހޯދައިގަތުމަކީ ކުރިން އޮތް ގޮންޖެހުމެކެވެ. ނަމަވެސް ކޯސްޓްގާޑުން ދަނީ ރާއްޖޭގެ ސަރަހައްދު ބަލަހައްޓަމުންނެވެ. އެގޮތުން ރާއްޖޭގެ ކަނޑުގެ ސަރަހައްދަށް ގަވާއިދާ ހިލާފަށް ވަންނަ އުޅަނދުތައް ކޯޓްގާޑުން އަތުލަމުންދާއިރު، އާންމުކޮށް އަތުލައިގަންނަ މި ބާވަތުގެ އުޅަނދުތައް އިތުރަށް ބާލާ ފާސް ކުރާ އިރު މަސްތުވާތަކެތި ފެންނަ ނިސްބަތްވެސް މަދެއް ނޫނެވެ.
