ށ. މާއުނގޫދޫއަށް، ހައްދު ފަހަނައަޅާފައިވާ ޖަމާއަތެއް ކަމަށްވާ އައިސިސްގެ ދިދަ ނަގަިއގެން ދިޔަ ދޯންޏެއްގައި ތިބި ބަޔަކު އެރަށަށް އެރި މައްސަލައެއް ފެންމަތި ވެއްޖެއެވެ.
ފުލުހުން ބުނީ، ށ. މާއުނގޫދޫއަށް އައިސްގެ ދިދަ ނަގައިގެން ދޯންޏެއްގައި ދިޔަ ބަޔަކު އެރަށަށް އެރި ކަމުގެ މައުލޫމާތު ލިބިފައި ނުވާ ކަމަށެވެ. އެރަށުގެ ބައެއް ފާރުތަކުގައި އައިއެސް ލޯގޯ ރަމްޒުވާ ގޮތަށް ސްޕްރޭ ކޮށްފައި ހުރި މައްސަލައެއް ބަލަމުން ދާ ކަމަށެވެ.
ފުލުހުން މިހެން ބުނެފައި ވާއިރު އެރަށަށް އެރީ ކޮންބައެއް ކަމަކާއި އެރީ ކިތައް މީހުންކަން ސާފުވާ ގޮތެއް ނުވިއެވެ.
މާއުނދޫ ކައުންސިލުން މައުލޫމާތު ދޭ ގޮތުގައި އެ ބަޔަކު އެރަށަށް އަރާފައިވަނީ އިއްޔެ ރޭގެ ވަގުތެއްގައެވެ. އެރަށަށް އެރި މީހުން އައިއެސްގެ ދިދައިގެ ޕްރިންޓެއް ފާރުތަކަށް ސްޕްރޭ ކޮށްފައިވެއެވެ. މައުލޫމާތު ލިބިފައިވާ ގޮތުގައި އެރަށަށް އަރާފައި ވަނީ ހުއިފިކަނޑާ ނަގާ ދޯންޏަކުން ކަމަށް މާއުނގޫދޫ މީހަކު މައުލޫމާތު ދީފައި ވެއެވެ.
ބައެއް މީޑިއާތަކުން ރިޕޯޓް ކުރާ ގޮތުގައި އެރަށަށް އެރި މީހުން ފާރުތަަކަށް ސްޕްރޭ ކުރަން ސްޕްރޭ ގަތީވެސް މާއުނގޫދޫގައި ހުރި ފިހާރައަަކުން ކަމަށެވެ. އަދި އެރަށަށް އެރީ ހަތަރު މީހުން ކަމަށާއި، އެމީހުން އެރީ އިއްޔެ ރޭ އިރާކޮޅު ކަމަށް އެމީހުން ސްޕްރޭ ގަތް ފިހާރައިގެ މީހަކު މައުލޫމާތު ދީފައިވާ ކަމަށް ވެއެވެ.
މާއުނގޫދޫއަށް އައިއެ0ސްގެ ދިދަ ނަގައިގެން ބަޔަކު އަރާފައި ވާއިރު، ދިވެހިރާއްޖޭގައި ފުޅާ ދާއިރާއެއްގައި ހަރުކަށި ފިކުރު ފެތުރުމާއި ދިވެހިރާއްޖެއިން ބޭރުގައި ހިނގާ ހަނގުރާމަތަކަށް ދިވެހިން ފޮނުވާ ހަނގުރާމަވެރި ޖަމާއަތްތަކަށް މީހުން ރެކްރޫޓު ކުރުމުގައި އިސްކޮށް ހަރަކާތްތެރިވާ ކަމަށް ތުހުމަތު ކުރެވޭ މީހަކު ހައްޔަރުކޮށްފައި ވަނީ މިދިޔަ އޮކްޓޯބަރު މަހުގެ 23 ވަނަ ދުވަހުގެ ރޭގައެވެ.
އެ ދުވަހު ހައްޔަރު ކޮށްފައި ވަނީ އުމުރުން 35 އަހަރުގެ މުހައްމަދު އަމީނެވެ. އޭނާއަކީ އިންޓަޕޯލް ރެޑް ނޯޓިސްވެސް ނެރެފައިވާ މީހެކެވެ.
