ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވެރިކަމަށް ވަޑައިގަތުމަށް ދެކެވަޑައިގަންނަވާ ހުވަފެންތަށް ހަނދާން ނަށްތަވާލައްވަން ޖެހިވަޑައިގަންނަވާ ކަމަށް ވިދާޅުވެ ދީނީ އިލްމުވެރިޔާ ޑރ.މުހައްމަދު އިޔާޒު، ނަޝީދަށް ރައްދު ދެއްވައިފިއެވެ.

އިޔާޒު މިހެން ވިދާޅުވެފައި ވަނީ، އިޔާޒް، ރައީސް ނަޝީދަށް އިސްލާމް ދީނަށް ދައުވަތު ދެއްވަން ޖެހިވަޑައި ނުގަންނަވާނެ ކަމަށް ރައީސް ނަޝީދު މިއަދު ވިދާޅުވެފައިވާ ދަނޑިވަޅެއްގައެވެ. ނަޝީދު މިހެން ވިދާޅުވީ ލ.ގަމު ތުނޑީއަވަށުގެ މީހުންނާ މުހާތަބު ކުރައްވައި ވާހަކަ ދައްކަވަމުންނެވެ.

އެ ހަފްލާގައި ވާހަކަފުޅު ދައްކަވަމުން ނަޝީދު ވިދާޅުވީ ޑރ އިޔާޒަށް އިސްލާމް ދީނަށް ގޮވާލައްވަން ޖެހިވަޑައި ނުގަންނަވާނެ ކަމަށައި މިއީ ސައްތައިން ސައްތަ މުސްލިމް ގައުމެއް ކަމަށެވެ. އަދި އެއްވެސް މީހަކަށް މި ގައުމުގައި އިސްލާމް ދީނަށް ދައުވަތު ދޭން ނުޖެހޭނެ ކަމަށާއި އިސްލާމް ދީނަށް އުޅުމުން، ރާއްޖެ ދާނީ ބިނާ ވަމުން ކަމަށްވެސް ނަޝީދު ގެ ވާހަކަފުޅުގައި ވިދާޅުވިއެވެ.

ނަޝީދުގެ ވާހަކަތަކަށް ރައްދުދެއްވާ އިޔާޒު ވިދާޅުވީ ނަޝީދުގެ "މުޑުދާރު އަމަލުފުޅުތައް" އިތުރަށް ބޭޒާރު ނުވަނީސް ތައުބާވެލައްވަން ޖެހިވަޑައިގަންނަވާ ކަމަށާއި ތައުބާވުން އަވަސް ކުރައްވަން ޖެހިވަޑައިގަންނަވާ ކަމަށެވެ.

އަދި ނަޝީދާ އެންމެ ގުޅެނީ މަގުމަތީގައި ސަކަރާތްޖެހުމާއި މުޒާހަރާކުރުން ކަމަށް ވިދާޅުވެވެސް އިޔާޒު ވަނީ ރައްދު ދެއްވާފައެވެ. އަދި ކޮންމެ މީހަކު ވެސް ކުރިމަތިލާންވާނީ އެމީހަކަށް ކުރެވޭ ވަރުގެ ކަމަކާ ކަމަށާއި އެގޮތުން ވެރިކަން ކުރެއްވުމަކީ ނަޝީދަށް ކުރެއްވޭ ވަރުގެ ކަމެއް ނޫންކަމަށްވެސް އިޔާޒު ވަނީ ވިދާޅުވެފައެވެ.


ޑރ އިޔާޒާއި ނަޝީދާ ދެމެދު މަހުގެ ހަމަލާތައް ބަދަލުވެގެން މިދިޔައީ، ޑރ އަފްރާޝީމް އަލީގެ މަރުގެ ރިޕޯޓު މަޖިލީހުގައި ހާމަ ކުރެއްވި އިރު، ދީނީ ހަރުކަށި ފިކުރުތަކުގެ ވާހަކައާއި، ދީނީ ޖަމްއިއްޔާ، ސަލަފުގެ ވާހަކަ ފާހަގަ ކުރައްވާ ވާހަކަ ދައްކަވާފައި ވާތީއެވެ. ޑރ. އަފްރާޝީމުގެ މަރުގެ ރިޕޯޓު ދިރާސާ ކުރާ މަޖިލީހުގެ ކޮމެޓީ މަރުހަލާގައިވެސް ސަލަފަށް ފިޔަވަޅު އެޅުމުގެ ވާހަކަ ވަނީ ދައްކާފައެވެ.

ހަބަރު މުހައްމަދު ނަޝީދު ޑރ. އިޔާޒް އަބްދުލް ލަތީފް