ލަނޑާ ނަގާ ދޯންޏެއްގައި ހިނގި މާރާމާރީއެއްގައި ޒުވާނަކަށް ހަމަލާދީ ކަނޑަށް އެއްލާލި މީހާގެ އަނގަ އޮތީ އިރާލައިފައިކަން ހާމަވެއްޖެއެވެ. އަދި އޭނާ ކަނޑަށް އެއްލައިލީ ބައިއަތު ނުހިފައި ދެކޮޅު ހެދުމުން ހިނގި މާރާމާރީއެއްގައި ކަމަށް "ދަ ޕްރެސް" އަށް އެނގިއްޖެއެވެ.
މިދިޔަ ބުރާސްފަތި ދުވަހުގެ ރޭ ލަނޑާ ނަގާ ދޯންޏެއްގައި ހިނގި މާރާމާރީގައި ޒަހަމް ތަކަކާއެކު ފެނުނު މީހާއަށް އެންމެ ފުރަތަމަ ފަރުވާ ދީފައި ވަނީ އއ. މާޅޮހު ހެލްތް ސެންޓަރުގައެވެ.
އެ ސެންޓަރުގެ އެޑްމިނިސްޓްރޭޓާ ހެލްތު ސާވިސަސް، މުހައްމަދު ރިޒާ "ދަ ޕްރެސް" އަށް ވިދާޅުވީ ޒަހަމް ތަކަކާއެކު ފެނުނު މީހަކަށް ފަރުވާ ދިނުމަށް ފޯން ކޯލެއް އޭނާއަށް އެރޭ ދަންވަރު 2:54 ހާއިރު ލިބުނު ކަމަށެވެ. އަދި ފަސް ވަރަކަށް މިނެޓް ފަހުން ސެންޓަރު ހުޅުވި ކަމަށާއި އޭރު އެމީހާއާއެކު އެރަށު ބަޔަކު ސެންޓަރު ގޯތިތެރޭގައި ތިބި ކަމަށެވެ.
ރިޒާ ވިދާޅުވީ އެމީހާ ގެންގޮސް ވަގުތުން ފަރުވާދޭންފެށި ކަމަށެވެ. އަދި އަނިޔާ ލިބިފައިވާ ގޮތާއި ކިހާ ވަގުތެއް ވިތޯ އެމީހާއާ ސުވާލު ކުރި ކަމަށެވެ.
"އެމީހާ ގެނައިއިރު ރަނގަޅަށް ވާހަކަވެސް ނުދެއްކޭ، އަނގަވެސް އޮތީ އިރާލާފަ، ކޯކަށިގަނޑު އޮތީ ވެއްޓިފަ، ދައްކާ ވާހަކަ ސާފު ނުވާތީ ކޯކަށިގަނޑުގައި ހިފަހައްޓައިގެން އޭނާ ވާހަކަވެސް ދެއްކީ، އޭނާ އެދުނީ ސަލާމަތް ކޮށްދިނުމަށް،" ރިޒާ ބުންޏެވެ.
ރިޒާ ބުނީ އޭނާއަށް އަނިޔާ ލިބުނު ގޮތާއި އެކަން ދިމާވި ގޮތް މަޑުމަޑުން ކިޔައިދިން ކަމަށެވެ. އެގޮތުން އޭނާއަށް އެދޯނީގައި އުޅުނު މީހުން ހަމަލާދީ ކަނޑަށް އެއްލާލީ ކަމަށް ބުނި ކަމަށެވެ. ނަމަވެސް ސީދާ މާރާމާރީ ހިނގަން މެދުވެރިވި ސަބަބު އޭނާ ނުބުނާ ކަމަށްވެސް ރިޒާ ބުންޏެވެ.
"އަޅުގަނޑު އެވަގުތު ބެލީ އަނިޔާ ލިބިފައިވަނީ ކޮން އެއްޗަކުންތޯ ބެލުމަށް، އޭރަށް ދެއްތޯ ފަރުވާ ކުރެވޭނީ، އޭނާ ކިޔައިދިން ގޮތުގައި އެދޯނީގައި އުޅޭ ފަޅުވެރިންނާއި ހިނގި ދެބަސްވުމެއްގައި އޭނާއަށް ވަޅިން ހަމަލާ ދިނުމަށްފަހު މޫދަށް އެއްލާލީ ކަމަށް، އޭނާ ސެންޓަރަށް ގެނައި މީހުން ކައިރީ ބުނި ކަމަކަށް ބައިއަތު ނުހިފުމުން އުފެދުނު ދެބަސްވުމެއްގައި ހިނގި މާރާމާރީއެއް ކަމަށް، އެމީހުންނަކަށްވެސް ނޭންގެ ކޮންކަމަކާ ބައިއަތު ނުހިފައިގެން ކަމެއް، އަޅުގަނޑުވެސް މާގިނަ ސުވާލުތަކެއް ނުކުރަން، ބެލީ އަވަހަށް ފަރުވާ ދެވޭތޯ،" ރިޒާ ކިޔައި ދިނެވެ.
ރިޒާ ބުނި ގޮތުން، އޭނާއަށް ލިބިފައިވާ އަނިޔާތަކަށް ފަރުވާ ދެވެން ފެށުނީ ގާތްގަނޑަކަށް އެހާދިސާ ހިނގިތާ ގަޑިއެއްހާއިރު ފަހުންނެވެ. އޭނާ ދޯނިން އެއްލާލުމުން އެރަށަށް އެރީ ފަތާފައި ކަމަށާއި ގާތްގަނޑަކަށް ގަޑިއެއްހާއިރު ވާނެ ކަމަށް އެމީހާއާ ހަވާލާދީ ރިޒާ ބުނެފައި ވެއެވެ.
ލިބުނު އަނިޔާތަކާއި ޒަހަމްތައް:
ރިޒާ ބުނީ އޭނާ ބޮލުގެ ފުއްކިބައަށްވެސް ވަޅިން ހަމަލާދީފައިވާ ކަމަށެވެ. އަދި އަތަށާއި ކަރުގެ އިތުރަށް އަނގަވެސް ވަނީ އަތުން ހިފައި އިރާލާފައި ކަމަށް ބެލެވޭ ކަމަށްވެސް އޭނާ ބުންޏެވެ.
"އަނގަމަތި ހުރީ ވަރަށް ބޮޑަށް ހަލާކުވެފަ، އިރާލާފައި ހުރީ، ހީވަނީ އަތުން ހިފައި އަރާލާފަހެން، ކޯކަށިގަނޑުވެސް އޮތީ ވެއްޓިފައި، ބޮލުގެ ފުށްކިބައިން ތަންގަނޑެއް ހުރީ ތޫނު އެއްޗަކުން ހަމަލާދީފައި، ވަރަށް ބޮޑަށް ކަފާލާފައި، ނަމަވެސް އެތަން އެހާ ފުނަކަށް ނޫން ހުރީކީ. ކޯތާފަތުން ކަންފަތް ކައިރިން ފެށިގެން ކަނދުރާއާ ހިސާބަށް ހުރި ވަޅިން އަޅާފަ، އަތްތަލިގައި ވެސް ބޮޑުވާ އިނގިއްޔާއި ޝަހާދަތް އިނގިއްޔާ ދެމެދުގައި ހުރީ ޒަހަމްވެފަ، ބޮޑަށް ހީވަނީ ހަމަލާއިން އެވަގުތު ދިފާއުވާން މަސައްކަތް ކުރަނިކޮށް ވަޅިން އަތުގައި އެޅިފައި ކަމަށް،" ރިޒާ ކިޔައިދިނެވެ.
ރިޒާ ބުނީ އެވަގުތު އައިޖީއެމްއެޗަށް ގުޅައިގެން ކުރިއަށް ގެންދަންޖެހޭ ގޮތް ސާފު ކުރި ކަމަށެވެ. އެގޮތުން ބޮލުގެ ފުއްކިބައިގައި ހަމަލާދީފައިވާތަން ބެއްދުމަށްފަހު މާލެ ފޮނުވި ކަމަށެވެ. އަދި އަނގަމަތިވެސް ފެހި ކަމަށް އޭނާ ބުންޏެވެ.
އޭނާއަށް ފަރުވާ ދެމުންދިޔަ ވަގުތު، އެދޯނީގެ ފަޅުވެރިން ވަނީ އެމީހާ ހޯދުމަށް އެރަށަށް އަރާފަ އެވެ. އެގޮތުން އެމީހާ ގެއްލިގެން ހޯދާކަމަށް ބުނެ އެރަށް ވަރަށް ބެލި އެވެ. އަދި ރަށުގެ ހޭޅިފަށް ވަރަށް ބޮޑަށް ބެލުމަށްފަހު އެމީހުން ފައިބައިގެންދިޔަ ކަމަށްވެސް ރިޒާ ބުންޏެވެ.
އޭނާ ބުނީ އެހުރިހާ ކަމެއްގެ ތަފްސީލް ފުލުހުންނަށް ވަގުތުން ހިއްސާ ކުރެވުނު ކަމަށެވެ. މިހާރުވެސް އެރަށުގައި ފުލުހުން ހަރަކާތްތެރިވަމުންދާ ކަމަށް ރިޒާ ބުންޏެވެ.
މައުލޫމާތު ލިބިފައިވާ ގޮތުގައި އެމީހާއަކީ ރ. މަޑުއްވަރީއަށް ނިސްބަތްވާ އުމުރުން 26 އަހަރުގެ ފިރިހެނެކެވެ. އެމީހާ އިނދެގެން އުޅެނީ އެރަށު އުމުރުން 13 އަހަރުގެ ކުއްޖަކާ ކަމަށްވެސް މައުލޫމާތު ލިބެއެވެ.
އެމީހާ އިތުރު ފަރުވާއަށް މާލެ ގެނެސްފައިވަނީ އިއްޔެ ހެނދުނުގެ ވަގުތެއްގައިއެވެ. އެމީހާއަށް ފަރުވާ ދެމުންދަނީ އައިޖީއެމްއެޗްގައި އެވެ.
ފުލުހުން މިމައްސަލަ އިތުރަށް ތަހުގީގް ކުރަމުންދާއިރު، މިމައްސަލާގައި އެދޯނީގެ އެއް ފަޅުވެރިއަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
ކީއްވެ އެކަކު ހައްޔަރު ކުރަންވީ؟
ކީއްވެގެންތޯ އެއްފަޅުވެރިއަކު ހައްޔަރުކުރީ؟ ޢެންމެން ހައްޔަރުކުރޭ.ތިކަހަލަ ލާއިންސާނީ އަމަލު ހިންގާމީހުން މުޖުތަމައަށްދޫކޮށްފަ ބައިތިއްބައިފެންނުވާނެ. ޥަގުތުން ހައްޔަރުކުރޭ، ޝަރީއަތްކުރާނީ ފަހުން.
ތޭރަ އަހަރުގެ ކުއްޖާގެ މައިން ބަފައިން ކޮބާ؟ އެމީހުން ގެ ރުހުމުގަ ތާ ތިފަދަ ކައިވެނި ކުރެވޭނީ. އެމީހުނާ ސުވާލުކޮށް ޒިންމާދާރު ކުުރުވެން ވާނެދޯ؟ އަދި އަދަބު ލިބެންވާނެ ކުއްޖާ އަށް އިހުމާލު ވީމަ
ދީނާއި ބީރަށްޓެހި ހައްދުފަހަނައަޅާ މީހުންކައިރީ ޝައިތާނާގެ ބާރު މާ ގަދަފަދައީ ... ޙަލާލް ކަންތައް ހަރާމްކޮށް، ހަރާމް ކަންތައްހަލާލުކޮށް، އިލްމުވެރިން ކާފަރުކޮށް، މީހުންގެ މުދަލާއި އަބުރާއި ފުރާނަޔަކީ އެއްވެސް އެއްޗަކަށްނުވީމަ އެއީ އިސްލާމްދީނެއްނޫން... ޢެއީ ޝައިތާނާއަށް ތަބަޢަވުން.