ސޯޝަލް މީޑިއާ އެކްޓިވިސްޓް އަހުމަދު އަޝްރަފް (ޝުމްބާ) މަރު ކޮމިޝަނަށް ހާޒިރުވާން އަންގައިފި ކަމަށް އޭނާ ބުނެފިއެވެ.
މަރު ކޮމިޝަނަށް ހާޒިރުވުމަށް އޭނާ އަށް އަންގާފައި ވަނީ މިރޭ 8:30 އަށް ކަމަށް އޭނާ ވަނީ ބުނެފައެވެ. ޝުމްބާ ހާޒިރުވުމަށް އަންގާފައި ވަނީ ކޮން ކަމަކާ ކަން ނޭނގޭ ކަމަށްވެސް އޭނާ ބުނެއެވެ.
މިކަމާ ގުޅިގެން ޝުމްބާ ބުނީ އޭނާ ގަޑިއަށް ރިޔާސީ ކޮމިޝަނަށް ހާޒިރުވާނެ ކަމަށާއި އަދި އޭނާގެ މައްޗަށް އެއްވެސް ކުށެއްގެ ތުހުމަތު އުފުލިފައި ނުވާ ކަމަށާއި ކުށެއް އޭނާ ކޮށްފައިވެސް ނުވާކަމަށެވެ.
މިދިޔަ އޭޕްރީލް މަހުގެ 11 ވަނަ ދުވަހު ވެސް ޝުމްބާ ވަނީ މަރު ކޮމިޝަނަށް ހާޒިރު ކޮށްފައެވެ. އޭރު އޭނާ އެ ކޮމިޝަނަށް ހާޒިރުކޮށްފައި ވަނީ އެ ކޮމިޝަނުން ތަހުގީގު ކުރަމުން ދިޔަ ނޫސްވެރިޔާ އަހުމަދު ރިޟްވާންގެ މައްސަލައާ ގުޅިގެންނެވެ.
2014 ވަނަ އަހަރުގެ އޮގަސްޓް މަހުގެ 18 ވަނަ ދުވަހު ރިޟްވާން ކަނޑު ފައްތާފައި ވާކަމަށް ބުނެ ޝުމްބާ ކުރި ޓްވީޓަކާ ގުޅިގެން އެކޮމިޝަނުން ވަނީ އޭނާ ގެންގޮސް ބަޔާން ނަގާފައި ކަމަށް ޝުމްބާ ބުނެއެވެ. އަދި އޭނާއާ ސުވާލުކޮށްފައި ވަނީ އެ ޓްވީޓުގެ ސްކްރީން ޝޮޓަކާ ބެހޭގޮތުން ކަމަށާއި، އަދި އެ ކޮމިޝަންގެ ފަރާތުން ތަހުގީގުގައި އަމަލުކޮށްފައި ވަނީ ވަރަށް ޕްރޮފެޝަނަލް ކޮށް ކަމަށް އޭނާ ބުނެފައި ވެއެވެ.
