ދަތުރު ކުރަމުން ދިޔަ ޑިންގީއަކުން ކަނޑަށް ފުންމާލި ޒުވާނެއް މަރުވެއްޖެއެވެ. އެމްއެންޑީއެފުން ބުނީ އެ ހާދިސާގައި މަރުވެފައިވަނީ ގ. މާލެހިޔާ 1، 13-2، 33 އަަހަރުގެ އަހުމަދު އަނީސް ކަމަށެވެ. އޭނާ ޑިންގީން ފުންމާލަން މެދުވެރިވި ސަބަބެއް އަދި ސާފުވާގޮތެއް ނުވެއެވެ.
އެމްއެންޑީއެފުން ބުނީ އޭނާ ކަނޑަށް ފުންމާލީ ގުޅީފަޅު ބައްތިޔާ ދިމާ ބޭރުން ކަމަށެވެ. އަދި އޭނާ ދިޔަ ޑިންގީގައި 10 މީހުން ތިބި ކަމަށާއި ފުންމާލީ ދިވެހި ފިރިހެނެއް ކަމަށްވެސް އެމްއެންޑީއެފުން ބުނެއެވެ.
ކޯސްޓްގާޑާ ހަވާލާދީ އެމްއެންޑީއެފުން ބުނީ، އެ ޑިންގީ 10 މީހުނާއެކު ދަތުރު ކުރަމުން ދިޔައީ ތިލަފުއްޓަށް ކަމަށެވެ. މިއަދު މެންދުރު ފަހު ހިނގި އެ ހާދިސާގެ ރިޕޯޓު އެމްއެންޑީއެފަށް ލިބުމާއެކު އޭނާ ހޯދުމުގެ މަސައްކަތް ކުރަމުން ދަނިކޮށް މަރުވެފައިވާ މީހާގެ ހަށިގަނޑު ފެނުނީ ރިޕޯޓު ކުރިތާ ގަޑިއެއްހާ އިރު ފަހުން ހަވީރު 4:10 ހާއިރު ކަމަށް އެމްއެންޑީއެފުން ބުނެއެވެ.
އެމީހާގެ ހަށިގަނޑޫ ފެނުނީ ކަނޑުގެ އަޑިން ކަމަށާ މިހާރު އޭނާ މާލެ ގެެނެސް އޭޑީކޭ ހޮސްޕިޓަލަށް ގެންގޮސްފައި ވާކަމަށް އެމްއެންޑީއެފުން ބުނެއެވެ.
އެމްއެންޑީއެފުން ބުނީ އޭނާގެ ހަށިގަނޑު ނެގީ 44 މީޓަރު އަޑިން ކަމަށެވެ.
މަރްހޫމްގެ ފާފަތައް ފުއްސަވައިދީ އާއިލާއަށް ކެތްތެރިކަން ދެއްވާށި. ????