އދގެ ސްޕެޝަލް ރެޕަޓުއާ އޮން ޓޯޗާ ނިލްސް މެލްޒާގެ ހާއްސަ ދަތުރެއް ދިވެހި ރާއްޖެއަށް ކުރެއްވުމަށް ހަމަޖެހިފައިވާކަން، އިންސާނީ ހައްގުތަކާ ބެހޭ އދގެ ހައިކޮމިޝަނަރުގެ އޮފީހުން ހާމަކޮށްފިއެވެ.
ލާއިންސާނީ އަނިޔާއާ ބެހޭ އދގެ ހާއްސަ ރެޕަޓުއާގެ މިޝަންއެއް ދިވެހިރާއްޖޭގައި ކުރިއަށް ގެންދަވާނީ މި ހިނގާ ނޮވެމްބަރު މަހުގެ 17 އިން 24 ގެ ނިޔަލަށް ކަމަށް މައުލޫމާތު ލިބެއެވެ.
ސްޕެޝަލް ރެޕަޓުއާގެ މިޝަން ރާއްޖެ ވަޑައިގަތުމަށް ހަމަޖެހިފައި މި ވަނީ ރާއްޖޭގައި މީގެ ކުރިން ހިންގާފައިވާ ރަހުމުކުޑަ، ލާއިންސާނީ، އަދި ދަށުދަރަޖައިގެ އަދަބުތަކާ އަމަލުތައް ހުއްޓުވުމަށާ، އެފަދަ އަމަލުތައް ކުރިއަށް އޮތް ތާނގައި ނުހިގާނެކަން ޔަގީންކުރުމަށް އަޅަންޖެހޭ ފިޔަވަޅުތައް އެޅުމަށް ވަރަށް ބޮޑު އަހައްމިއްޔަތުކަމެއް ދޭނެކަމަށް ދިވެހިރާއްޖޭގެ ސަރުކާރުން ވައުދުވެ، ދިވެހިރާއްޖޭގެ ސަރުކާރުން ދީފައިވާ ދައުވަތަކަށް ކަމަށްވެސް ހައި ކޮމިޝަނަރުގެ އޮފީހުން މައުލޫމާތު ދެއެވެ.
ސްޕެޝަލް ރެޕަޓުއާ މެލްޒާ ގެ މިދަތުރުގައި މިފަދަ އަމަލުތައް ހުއްޓުވުމަށް އެޅިފައިވާ ފިޔަވަޅުތަކަކީ ކޮބައިތޯއާއި، ކުރިއަށް އޮތްތާނގައި ރަނގަޅުކުރަންވީ ކަންތައްތަކަކީ ކޮބައިކަން ބައްލަވާނެކަމަށް ޚަބަރު ލިބެއެވެ.
ދިވެހިރާއްޖޭގެ ޖަލުތަކުގެ ހާލަތު ރަނގަޅުކުރަން ފަށާފައިވާ މަސައްކަތުގައި އިންސާނީ ހައްގުތަކުގެ ބައިނަލްއަގުވާމީ މިންގަނޑުތައް ހަރުދަނާ ގޮތެއްގައި ގާއިމުކުރެވޭތޯ ކަމާބެހޭފަރާތްތަކާ އެހެނިހެން އެކިއެކި ގްރޫޕްތަކާއެކު، ބިނާކުރަނިވި ވާހަކަތަކެއް ދެކެވިގެންދާނެ ކަމުގެ ބޮޑު އުއްމީދެއް އެބައޮތް ކަމަށް ރެޕަޓުއާ މެލްޒާ ވަނީ ވިދާޅުވެފައެވެ.
މި މިޝަންގައި ސަރުކާރުގެ އިސް ފަރާތްތަކާއި، ރައްޔިތުންގެ މަޖިލީހުގެ މެމްބަރުންނާއި، ޖުޑީޝިއަރީ ގެ އެކިއެކި ފަރާތްތަކުގެ އިތުރުން މަދަނީ ޖަމިއްޔާތަކާއި، ނެޝަނަލް ހިއުމަން ރައިޓްސް މެކޭނިޒަމްގެ އެކިއެކި ދާއިރާތަކުގައި މަސައްކަތް ކުރާ ފަރާތްތަކާއި، ގާނޫނީ ވަކީލުންނާއި، އިލްމުވެރިންނާއި، އެކްޓިވިސްޓުންނާއި، އަނިޔާ ލިބިފައިވާ ފަރާތްތަކާއި އެ ފަރާޓްތަކުގެ އާއިލާތަކާވެސް ސްޕެޝަލް ރެޕަޓުއާ ބައްދަލުކުރައްވަން ހަމަޖެހިފައިވާކަމަށް އިންސާނީ ހައްގުތަކާ ބެހޭ އދގެ ހައި ކޮމިޝަނަރުގެ އޮފީހުން މައުލޫމާތު ދެއެވެ.
ސްޕެޝަލް ރެޕަޓުއާ ގެ މި ދަތުރުގައި ޖިނާއީ އަދުލުގެ ނިޒާމުގެ ތެރޭގައްޔާއި، އިމިގްރޭޝަންއާއި، ސިއްހީ ދާއިރާގެ އިތުރުން އިޖްތިމާއި ހާއްސަ އެހީ ބޭނުންވާ ފަރާތްތައް ފަދަ، މިނިވަންކަމުން މަހުރޫމްވެފައިވާ މީހުން ބޭތިއްބުމަށް ހާއްސަ ތަންތަނަށް ޒިޔާރަތްކުރައްވާނެ ކަމަށް މައުލޫމާތު ލިބެއެވެ.
މި މިޝަންއިން ފާހަގަކުރެވޭ ކަންތައްތައް ހިއްސާކުރުމަށްޓަކައި 24 ނޮވެމްބަރު 2019 ވަނަ ދުވަހުގެ 13:30 ގައި މާގިރި ހޮޓެލްގައި ޕްރެސް ކޮންފަރަންސެއް ބޭއްވުމަށް ހަމަޖެހިފައިވާކަމަށްވެސް ހައި ކޮމިޝަނަރުގެ އޮފީހުން މައުލޫމާތު ދެއެވެ. އަދި ދަތުރުން ފާހަގަ ކުރެވޭ ކަންކަމުގެ ފުރިހަމަ ރިޕޯޓް، މާޗް 2021 ގައި އދގެ ހިއުމަން ރައިޓްސް ކައުންސިލް އަށް ހުށަހަޅަން ހަމަޖެހިފައިވާކަމަށްވެސް އިންސާނީ ހައްގުތަކާ ބެހޭ އދގެ ހައި ކޮމިޝަނަރުގެ އޮފީހުން މައުލޫމާތު ދެއެވެ.
މިއީ އދގެ ސްޕެޝަލް ރެޕަޓުއާ އޮން ޓޯޗާގެ ހައިސިއްޔަތުން މެލްޒާ ރާއްޖެއަށް ކުރައްވާ ފުރަތަމަ ރަސްމީ ދަތުރެކެވެ.
