ޖުޑީޝަލް ސާވިސަސް ކޮމިޝަން (ޖޭއެސްސީ)ގެ ރައީސް ކަމުން ސުޕްރީމް ކޯޓްގެ ފަނޑިޔާރު އަބްދުﷲ އަރީފް މިއަދު އިސްތިއުފާ ދެއްވުމާއި ގުޅިގެން، އެ ކޮމިޝަނުގެ ރައީސް ކަމަށް ތުޅާދޫ ދާއިރާގެ މެންބަރު ހިސާން ހުސެއިން އައްޔަނުކޮށްފިއެވެ.
ޖޭއެސްސީން ދެންމެ ނެރުނު ނޫސްބަޔާނުގައި ބުނީ، އެ ކޮމިޝަނުގެ ރައީސް ކަމަށް ހިސާން އައްޔަނުކޮށްފައިވަނީ އެ ކޮމިޝަނުގެ ގާނޫނުގެ 7 ވަނަ މާއްދާގައިވާ ގޮތުގެ މަތިން ކަމަށެވެ.
ޖޭއެސްސީގެ ރައީސް ކަމުން އަރީފް އިސްތިއުފާ ދެއްވި ސަބަބެއް އަދި ހާމަކޮށްފައިނުވާއިރު، އޭނާ ޖޭއެސްސީގައި ހުންނެވީ ސުޕްރީމް ކޯޓުން ކަނޑައަޅާ ފަނޑިޔާރެއްގެ ގޮތުގައެވެ. އޭނާ ޖޭއެސްސީއަށް އައްޔަން ކޮށްފައިވަނީ 2017 ވަނަ އަހަރުގެ ޖުލައި މަހުގައެވެ. އަރީފަށް އެ މަގާމު ދެއްވީ އެ މަގާމުގައި ހުންނެވި ކުރީގެ ސުޕްރީމް ކޯޓުގެ ފަނޑިޔާރު އަލީ ހަމީދު މުހައްމަދު އެ މަގާމުން ވަކިކުރުމަށް ފަހުއެވެ.
ޖޭއެސްސީގެ ރައީސްކަމުން އަރީފް އިސްތިއުފާ ދެއްވާފައިވާއިރު، އެ ކޮމިޝަނުން ދަނީ، އޭނާވެސް ހިމެނިވަޑައިގަންނަވާ ގޮތަށް ސުޕްރީމް ކޯޓުގެ ހަތަރު ފަނޑިޔާރެއްގެ މައްސަލަތައް ބަލަމުންނެވެ. އޭގެ ތެރޭގައި އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ، ފަނޑިޔާރު އާދަމް މުހައްމަދު އަބްދުﷲ އަދި ފަނޑިޔާރު އަބްދުލް ޣަނީ މުހައްމަދު ވެސް ހިމެނިވަޑައިގަންނަވައެވެ.
ޖޭއެސްސީ އެކުލެވިގެން ވަނީ ރައްޔިތުންގެ މަޖިލީހުގެ ރައީސާއި ރައްޔިތުންގެ މަޖިލިހުން ކަނޑައަޅާ މެންބަރަކާއި ސިވިލް ސާވިސް ކޮމިޝަންގެ ރައީސާއި ބަންޑާރަ ނާއިބާއި ރައީސް އިބްރާހިމް މުހައްމަދު ސޯލިހް ކަނޑައަޅުއްވާ މެންބަރަކާއި ގާނޫނީ ވަކީލުންގެ ތެރެއިން ކަނޑައަޅާ ވަކީލަކާއި ދަށު ކޯޓުތަކުން ކަނޑައަޅާ ފަނޑިޔާރަކާއި ހައި ކޯޓުން ކަނޑައަޅާ ފަނޑިޔާރެއްގެ އިތުރުން ސުޕްރީމް ކޯޓުން ކަނޑައަޅާ އެ ކޯޓުގެ ފަނޑިޔާރެއް އަދި އާންމުންގެ ތެރެއިން ކަނޑައަޅާ މެންބަރެއްގެ މައްޗަށެވެ.
