ސުޕްރީމް ކޯޓުގެ ޑިރެކްޓަރު އާތިކާ އިބްރާހިމްގެ މައްސަލަތަކެއް ތަހުގީގުކުރަމުން ދާތީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން އޭނާ ސަސްޕެންޑްކޮށްފައި ވަނީ ގަވައިދާ ހިލާފަށް ކަމަށް ދިވެހިރާއްޖޭގެ އުއްތަމަ ފަނޑިޔާރު ވިދާޅުވެއްޖެއެވެ.
އުއްތަމަ ފަނޑިޔާރު މިހެން ވިދާޅުވީ މިއަދު ނެރުއްވި ބަޔާނެއްގައެވެ. އެ ބަޔާނުގައި ވަނީ ޝަރުއީ ދާއިރާގެ މުވައްޒަފުންގެ ގަވައިދުގެ އެއްވެސް މާއްދާ އަކާ އާތިކާ ހިލާފުވެވަޑައިގެންފައި ނުވާ ކަމަށާއި އެކަމުގެ އެއްވެސް ޝަކުވާއެއްވެސް ހުށަހެޅިފައި ނެތް ކަމަށެވެ. އަދި ހަމަ އެހެންމެ އާތިކާ، ގަވައިދާ ހިލާފުވި އެއްވެސް މައްސަލަ އެއް ބަލަމުން ނުދާ ކަމަށާއި އާތިކާ ސަސްޕެންޑް ކޮށް ފިޔަވަޅު އަޅުއްވާފައި ވަނީ ޝަރުއީ ދާއިރާގެ ވަރަށް ގިނަ އުސޫލުތަކާއި ގަވައިދާ ހިލާފަށް ކަމަށްވެސް އެ ބަޔާނުގައި ވެއެވެ.
މީގެ އިތުރުން އެ ބަޔާނުގައި ވަނީ ކޯޓުތަކުން ގަވައިދާ ހިލާފަށް މަސައްކަތް ކުރަމުން ގެންދާތީ އެކަމާ ދެރެވެ ހިތާމަ ކުރައްވާ ކަމަށާއި މުވައްޒަފުންގެ ކަންކަމުގައި ފިޔަވަޅު އަޅުންވަން ޖެހޭނީ އަދުލުވެރި ގޮތަށް ކަމަށް ވެސް އުއްތަމަފަނޑިޔާރު ވިދާޅުވެފައި ވެއެވެ.
އާތިފާގެ މައްޗަށް ކުރެވިފައި ވާ ތުހުމަތަކީ ކޮބައިކަމާއި ހުށަހެޅިފައިވާ މައްސަލަ އަކީ ކޮބައިކަމެއް އެންގުމަކާ ނުލައި ސަސްޕެންޑް ކޮށްފައި ވާ ކަމަށާ، އަމިއްލަ ދިފާއުގައި ވާހަކަ ދެއްކުމުގެ އެއްވެސް ފުރުސަތެއް ދީފާ ނުވާކަން އުއްތަމަ ފަނޑިޔާރުގެ ސިޓީގައި ފާހަގަ ކުރައްވައިފައި ވެއެވެ. އަދި ހަމަ އެހެންމެ މި ސަސްޕެންޝަނަކީ ނެޗުރަލް ޖަސްޓިސްއާ ހިލާފަށް ނާޖާއިޒް ގޮތުގައި ބާރުގެ ބޭނުން ކޮށްގެން ކޮށްފައި ވާ އަމަލެއް ކަމަށާ މިއި ބުލީ ކުރުމުގެ އަމަލެއް ކަމަށްވެސް އެ ސިޓީގައި ވިދާޚުވެފައި ވެއެވެ. މި ކަމުގެ ސަބަބުން ކޯޓު ތަކުގެ މުވައްޒަފުންގެ ހިތްތަކުގައި ބިރުވެރިކަމާއި ނުތަނަވަސްކަން އުފެދި ކޯޓު ތަކުގެ މަސްލަހަތު ގެއްލިގެން ހިނގައި ދާނެ ކަމުގެ ބިރު، އޮތް ކަމަށް ވެސް އުއްތަމަ ފަނޑިޔާރު ވިދާޅުވެފައި ވެއެވެ.
އެ ބަޔާނުގައި ވަނީ ސްޕްރީމް ކޯޓުގެ މުވައްޒަފަކާ މެދު ވެސް އަދި އެހެން އެއްވެސް ކޯޓެއްގެ މުވައްޒަފަކާ މެދުވެސް ޑީޖޭއޭ އަށްއެއްވެސް މައްސަލަ އެއް ބަލާ ފިޔަވަޅު އެޅެނީ، ވަޒީފާ އަދާކުރާ ކޯޓަށް އެ މައްސަލަ ހުށަހެޅި، ކޯޓުން ނުވަތަ ކޯޓުގެ އިދާރީ ނިޒާމުގެ ތެރެއިން އެ މައްސަލައަށް ގޮތެއް ނިންމުމަށްފަހު، އެ ނިނަމުމާ މެދު ހިތްހަމަ ނުޖެހޭ ނަމަ ކަމަށެވެ. ހަމަ އެހެންމެ އެއްވެސް މުވައްޒަފަކު ވަގުތީ ގޮތުން ވަޒީފާއަށް ނުކުތުން މަނާ ކުރެވޭނީ އެ ކޯޓެއް ނުވަތަ އެ އިދާރާއެއްގެ މަޝްވަރާ އާއެކު ކަމަށްވެސް އެ ބަޔާނުގައި ވެއެވެ.
ޑީޖޭއޭ އިން ދުސްތޫރީ އަދި ގާނޫނީ ބާރުތަށް ކަނޑުވާލައި ޝަރުއީ ދާއިރާގެ ގަވައިދާ ހިލާފަށް އަމަލު ކުރަމުން ގެންދާތީ އުއްތަމަ ފަނޑިޔާރުގެ ގާނޫނީ ވާޖިބުތަކާއި ވަޒީފާގެ މައްސޫލިޔަތަށް ހުރެސް އެޅޭ ކަމަށްވެސް އެ ބަޔާނު ވެއެވެ. މި އަމަލަކީ ކޯޓުތަކުގެ މިނިވަންކަން ނިގުޅައިގަނެ ކޯޓުތަކުގައި ނުފޫޒާއި ބާރު ހިންގުމުގެ ސަގާފަތެއް އުފައްދާ ފަނޑިޔާރުންނަށް މަސައްކަތް ނުކުރެވޭނޭ ފަދަ މާހައުލެއް އުފެއްދެވުމަށް ޓަކައި ކަމަށްވެސް އުއްތަކަ ފަނޑިޔާރު ވިދާޅު ވެފައި ވެއެވެ. މި އަމަލު ތަކަކީ ޣައިރު ގާނޫނީ، ލަދުވެތި، ދަށުދަރަޖައިގެ އަމަލުތަކެއް ކަމަށް ބުނެފައި ވެއެވެ.
