ރާއްޖޭގެ ކަނޑުގެ ސަރަހައްދުން އިންޑިއާގެ ދިދަ ނަގާފައިވާ 2 ބޯޓު ހިފަހައްޓައިފިއެވެ.
އެމްއެންޑީއެފުން ބުނީ، ހއ. ތުރާކުރުނުގެ ހުޅަނގު އުތުރުން 29 ނޯޓިކަލް މޭލު ބޭރުން އިންޑިއާގެ ދިދަ ނަގާފައިވާ މަސްވެރިކަން ކުރާ ވައްތަރުގެ ބޭރުގެ ދެ ބޯޓެއް ފެނިގެން އެމްއެންޑީއެފް ކޯސްޓްގާޑްގެ ބެލުމުގެ ދަށަށް ގެންގޮސްފައިވާ ކަމަށެވެ. އަދި މި ދެ ބޯޓުވަނީ ކޯސްޓްގާޑްގެ ބެލުމުގެ ދަށުން ހއ. އުލިގަމު ބޭރުގައި ބަނދަރުކޮށްފައިވާ ކަމަށް އެމްއެންޑީއެފުން މައުލޫމާތުދެއެވެ.
އެންއެންޑީއެފުން ބުނީ، މި ދެ ބޯޓުގައި ޖުމްލަ 19 މީހުން ތިބި އިރު، އެއް ބޯޓުގައި 9 މީހުން އަދި އަނެއް ބޯޓުގައި 10 މީހުން ތިބި ކަމަށެވެ.
އެންއެންޑީއެފުން ދަނީ މިހާރަކަށް އައިސް ރާއްޖޭގެ ކަނޑުގެ ސަރަހައްދުން ބޭރުގެ ބޯޓުތައް އަތުލައިގަންނަމުންނެވެ. އޭގެ ތެރޭގައި ރާއްޖޭގެ ކަނޑުގެ ސަރަހައްދުން ގަވާއިދާ ހިލާފަށް މަސްވެރިކަން ކުރަން އުޅޭ ބޯޓާއި، ރާއްޖެއަށް މަސްތުވާތަކެތި އެތެރެކުރަން އުޅޭ ބޯޓުތައް އެމްއެންޑީއެފުން މީގެ ކުރިން އަތުލައިގެންފައިވެއެވެ.
