ހދ. ކުުޅުދުއްފުށީ ގެއެއްގެ ތެރޭގައި ހުރި ސައިކަލުގައި ބަޔަކު މީހުން ގަސްދުގައި ރޯކޮށްލި ކަމަށް ބެލެވޭ ކަމަށް ފުލުހުން ބުނެފިއެވެ.
އެމްއެންޑީއެފްއިން މިއަދު ބުނީ ކުޅުދުއްފުށީ ކަކާގޭގެ އެތެރޭގައި ބަހައްޓާފައި ހުރި ސައިކަލެއްގައި ރޯވެގެން އެމްއެންޑީއެފް ފަޔާ އެންޑް ރެސްކިއު ސަރވިސްއިން ހަރަކާތްތެރިވެ އަލިފާންގަނޑު ނިއްވާލާފައި ވާކަމަށާއި އެ ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވާ ކަމަށެވެ.
މި މައްސަލަ އެމްއެންޑީއެފް އެފްއާރުއެސް އަށް ރިޕޯޓްކޮށްފައި ވަނީ ރޭ ފަތިހު 4:10 ކަށް ހާއިރު ކަމަށް އެމްއެންޑީއެފް އިން ބުނެއެވެ. އެމްއެންޑީއެފް އިން ބުނި ގޮތުގައި ކުޅުދުއްފުށީ ފަޔާ ސްޓޭޝަންގެ ސިފައިން ކުރި މަސައްކަތުން އަލިފާން މުޅިން ނިއްވާލެވުނީ ފަތިހު، 4:40 އެހާއިރު އެވެ.
މި މައްސަލައާ ގުޅިގެން ފުލުހުން ބުނީ މިހާތަނަށް ބެލި ބެލުމުން އެކަމަކީ ގަސްދުގައި ކުރި ކަމަކަށް ބެލެވޭ ކަމަށެވެ. އެހެންނަމަވެސް އަދި މިހާތަނަށް މި މައްސަލައާ ގުޅިގެން މީހަކު ހައްޔަރު ކުރެވިފައި ނުވާ ކަމަށް ފުލުހުން ބުންޏެވެ.
ފުލުހުން މީގެކުރިން ބުނީ ސައިކަލެއްގައި ރޯވެފައި ވާ ކަމުގެ މައުލޫމާތު ފުލުހުނަނަށް ލިބުމާއެކު ފުލުހުން އެ ސަރަހައްދަށް ދިޔައިރު، ސައިކަލުގައި ރޯވެފައި ވާ އަލިފާންގަނޑު ބޮޑުވެ، ކަކާގެ ފުރާޅުގައި ވެސް ރޯވެ، ސައިކަލުގެ ކައިރީގައި އޮތް ރަށު ޕިކަޕެއްގައި ވެސް އަލިފާން ހިފާފައިވާ ކަމަށެވެ.
ފުލުހުން ބުނީ، އަލިފާން ނިއްވާލެވުނު އިރު އެ އަލިފާނުގެ އަސަރު، ކަކާގެއާ އިންވެގެން ހުރި، ނަހާގެއަށް ވެސް ކޮންމެވެސް ވަރަކަށް ކޮށްފައިވާ ކަމަށެވެ.
