ޓްރޭޑްނެޓް މޯލްޑިވްސް ކޯޕަރޭޝަނުގެ ނަމުގައި ރައީސް އިބްރާހީމް މުހައްމަދު ސޯލިހް، މިއަދު ކުންފުންޏެއް އުފައްދަވައިފިއެވެ.
ރައީސްގެ ގަރާރަކުން އުފެއްދެވި މި ކުންފުންޏަކީ ދިވެހިރާއްޖޭގައި ވިޔަފާރިކުރުމާ ގުޅޭ އެކިއެކި ހިދުމަތްތައް އެއް ވިޔުގައަކުން ފޯރުކޮށްދިނުމަށްޓަކައި "ސިންގަލް ވިންޑޯ" އޮޕަރޭޓަރުގެ ޒިންމާ އަދާކުރާ، ސަރުކާރުގެ ސައްތައިން ސައްތަ ހިއްސާ އެކުލެވިގެންވާ ކުންފުންޏެކެވެ.
މިދިޔަ ޖޫން މަހުގެ 9 ވަނަ ދުވަހު ރައީސް ސޯލިހު ވަނީ، މަގުތައް ހަދާ ބަލަހެއްޓުމަށް "ރޯޑް ޑިވެލޮޕްމެންޓަ ކޯޕަރޭޝަން ލިމިޓެޑް" ގެ ނަމުގައި ވެސް ކުންފުންޏެއް އުފައްދަވާފައެވެ. މީގެ އިތުރުން މިދިޔަ މާޗް މަހުގެ 12 ވަނަ ދުވަހު ރައީސް ވަނީ ބޯހިޔާވަހިކަމުގެ މަޝްރޫއުތައް ކުރިއަށް ގެންދިޔުމުގެ ގޮތުން "ފަހި ދިރިއުޅުން ކޯޕަރޭޝަން ލިމިޓެޑް"ގެ ނަމުގައި ވެސް ކުންފުންޏެއް އުފައްދަވާފައެވެ.
މީގެ އިތުރުން ގިނަ ކުންފުނިތަކެއް މިވީ އަހަރެއްހާ ދުވަހުގެ ތެރޭގައި ރައީސް ވަނީ އުފައްދަވާފައެވެ.
