ސީޑަބްލިއުގެ މަޝްހޫރޫ ޓީވީ ސީރީޒް "ރިވާޑޭލް"ގައި ފްރެޑް އެންޑްރޫޒްގެ ރޯލު އަދާކޮށްދިން ލޫކް ޕެރީއަށް އެ ސީރީޒްއިން އަބަދުގެ އަބަދަށް ވަދާއީ ސަލާމްކޮށްފިއެވެ.
އާޗީ އެންޑްރޫޒްގެ ބައްޕަ 'ފްރެޑް އެންޑްރޫޒް'ގެ ރޯލު ކުޅެމުންދިޔަ، އުމުރުން 52 އަހަރުގެ ލޫކް ޕެރީއަށް ކުއްލި ގޮތަކަށް ސްޓްރޯކެއް ޖެހި އޭނާ މަރުވީ މިއަހަރުގެ މާޗްމަހުގެ ތެރޭގައި ކަމަށްވާއިރު، "ރީވާޑޭލް" ސީރީޒްގައި އޭނާއަށް ވަދާއީ ސަލާމްކޮށްފައި މިވަނީ ބުދަ ދުވަހު އާންމުކުރި އެޕިސޯޑްގައެވެ.
މި އެޕިސޯޑްގައި ފްރެޑް އެންޑްރޫޒް މަރުވެއެވެ. އޭނާ މަރުވަނީ މަގުމަތީގެ އެކްސިޑެންޓެއްގައެވެ. މި ސީންގައި، ލޫކް ޕެރީއާއިއެކު "ބެވާލީ ހިލްސް 90210"ގައި ހަރަކާތްތެރިވި ހާއްސަ ތަރިއެއްވެސް ފެނިގެންދެއެވެ.
ފްރެޑް މަރުވަނީ ކުޑަކުއްޖެގެ އަތުން ކަމަށްވާއިރު، މިކަމާ ގުޅިގެންވެސް ބައްޕަގެ ހަނދާންތަކެއް އާޗީ ކުރެއެވެ. އަދި ބައްޕަ ނެތެއްކަމަކު އޭނާގެ ހަނދާންތައް އަބަދުވެސް ރިވާޑޭލްގައި އޮންނާނެ ކަމަށް އާޗީ ބުނާއިރު، ލޫކް ޕެރީގެ ހަނދާންތައް އަދުވެސް "ރިވާޑޭލް" ސީރީޒްއާއިއެކުގައިވާނެ ކަމަށް އޭނާގެ ފޭނުންވެސް އިއްތިފާގުވެއެވެ.
