އެމެރިކާގެ މަޝްހޫރު ރިއާލިޓީ ސްޓާ ކިމް ކާޑޭޝިއަން، ފަރަންސޭސިވިލާތުގެ ވެރިރަށް ޕެރިހުގައި ހުއްޓާ ކުރިމަތިލާންޖެހުނު ވައްކަމާ ފޭރުމުގެ ބޮޑު ހާދިސާގެ މައްޗަށް ފިލްމެއް ހަދަން ނިންމައިފިއެވެ.
9 މިލިއަން ޔޫރޯގެ އަގުހުރި ގަހަނާތަކެއް ވަގަށް ނަގި ހާދިސާގެ މައްޗަށް ބިނާކޮށް "ފެޝަން ވީކް"ގެ ނަމުގައި ފިލްމެއް އުފައްދަނީ ފަރަންސޭސިވިލާތުގެ ލިޔުންތެރިޔާ އަދި ޑައިރެކްޓާ ހޮއާން ސްފާ ލިޔެފައިވާ ވާހަކައެއްގެ މައްޗަށް ބިނާކޮށެވެ. މި ވާހަކަވެސް އަދި ޝާއިއުކޮށްފައެއް ނުވެއެވެ.
2016 ވަނަ އަހަރު ހިނގި މި ހާދިސާގައި ކިމް އަތުން ގިނަ އަދަދެއްގެ ގަހަނާތައް ފޭރިގެންފައިވަނީ ބަޑިން ބިރުދައްކާ، ފާހަނާއެއްގެ ތެރޭގައި ކިމް ހައްޔަރުކުރުމަށް ފަހުގައެވެ. މިއީ ފާއިތުވީ 20 އަހަރު ދުވަހުގެ ތެރޭގައިވެސް ފަރަންސޭސިވިލާތުގައި ހިނގި މިފަދަ އެންމެ ބޮޑު ހާދިސާއަށް ވާއިރު، މިހާރުވެސް މިމައްސަލާގައި 11 މީހެއްގެ މައްޗަށް ދަނީ ދައުވާ ކުރަމުންނެވެ.
ފަރަންސޭސި ފުލުހުން އަދިވެސް ދަނީ އެ ގަހަނާތައް ހޯދުމުގެ މަސައްކަތް ކުރަމުންނެވެ. ބެލެވޭ ގޮތުގައި މީގެ ބޮޑު ބައެއް މިހާރު ވަނީ ބެލްޖިއަމްއަށްވެސް ގެންގޮސްފައެވެ.
ކިމް ގެ އިންޝުއަރަންސް ކުންފުނިން ވަނީ އޭނާގެ ބޮޑީ ގާޑާ، އެ ބޮޑީ ގާޑު ނިސްބަތްވާ ކުންފުންޏާއި ދެކޮޅަށް 6.1 މިލިއަން ޑޮލަރުގެ ދައުވާއެއްވެސް އުފުލާފައެވެ.
