މިއުޒިލް އަލްބަމް ޗާޓުތަކުގެ އެންމެ ކުރިން ޖާގަ ހޯދިތާ 50 އަހަރު ފަހުން، މަޝްހޫރު އިނގިރޭސި މިއުޒިކް ބޭންޑް "ދަ ބީޓްލްސް"ގެ "އެބީ ރޯޑް"، އިނގިރޭސިވިލާތުގެ މިއުޒިކް ޗާޓުތަކުގެ 1 ވަނަ މަގާމުން ޖާގަ ހޯދައިފިއެވެ.
މިއީ 1 ވަނާގައި އޮތް އަލްބަމަކަށް އެ މަގާމު ގެއްލުމަށްފަހު މިހާ ދިގު މުއްދަތަކަށް ފަހު 1 ވަނަ މާގަމު އަލުން ދިފާއުކުރި ފުރަތަމަ ފަހަރުވެސް މެއެވެ.
މިކަމާ ގުޅިގެން ޕޯލް މެކާޓްނީ ކުރި ޓްވީޓެއްގައި އޭނާ ބުނީ، މި އަލްބަމް މިހާ ކުރީގައި އުޅޭކަން ގަބޫލުކުރަންވެސް ދަތިކަމަށެވެ. އެހެންނަމަވެސް، އެއީ "ފިސާރި ކޫލް" އަލްބަމެއް ކަމަށްވެސް އޭނާ ވަނީ ބުނެފައެވެ.
ފާއިތުވީ ހަފުތާއަށް ބަލާއިރު މިއުޒިކީ ބާޒާރުގައި އެންމެ ގަދައަށް ވިކިފައިވާ އަލްބަމަކީވެސް "އެބީ ރޯޑް"އެވެ. އެގޮތުން ހުސްވި ހަފުތާ ތެރޭގައި އެކަނިވެސް މި އަލްބަމްގެ 9000އެއްހާ ކޮޕީ ވަނީ ވިކިފައެވެ.
"އެބީ ރޯޑް"އަކީ ބޭންޑެއްގެ ގޮތުގައި ދަ ބީޓްލްސްއިން ރެކޯޑްކޮށް ރިލީޒްކުރި އެންމެ ފަހު އަލްބަމެވެ.
ދަ ބީޓްލްސްގެ 11 ވަނަ އަލްބަމްގެ ގޮތުގައި "އެބީ ރޯޑް" ރިލީޒްކުރީ 1969 ވަނަ އަހަރުގެ ސެޕްޓެމްބަރު މަހުގެ 26 ވަނަ ދުވަހުއެވެ.
