މާލެ ޓީ ޖެޓީ ސަރަހައްދުގައި އިއްޔެ 3:40 ހާއިރު ހިނގި އަލިފާނުގެ ހާދިސާގައި އަޑިއަށް ދިޔަ މާލެއާއި އއ. އަތޮޅާއި ދެމެދު ދަތުރު ކުރާ 'ނެވި 3' ލޯންޗު ފަޅުތެރެއިން ނަގައިފިއެވެ.
މި ހާދިސާ ހިނގި ގޮތާ ބެހޭ ގޮތުން މައުލޫމާތު ދެމުން ފުލުހުން ބުނީ، މިހާތަނަށް ބެލިބެލުމުން އެނގިފައި ވަނީ އަލިފާން ފުރަތަމަ ރޯވެފައި ވަނީ 'ނެވި 3' ލޯންޗުގައި ކަމަށެވެ. އަދި އަލިފާން ގަނޑު ފެތުރި، 10 ތެޔޮ ބައުޒަރަށް އެކިވަރުގެ ގެއްލުން ލިބިފައިިވާ ކަމަށެވެ. މީގެ ތެރެއިން ފަސް ތެޔޮ ބައުޒަރު ވަނީ ބޭނުން ނުކުރެެވޭ ވަރަށް އަނދައި ހުލިވެފައި ކަމަށާއި، އަދި 'ނެވި 3' ލޯންޗު ވެސް ވަނީ ބޭނުން ނުކުރެވޭ ވަަރަށް އަނދައި، ފަޅު ތެރެއަށް އަޑިއަށް ގޮސްފައެވެ.
މި ހާދިސާގައި ޓީ ޖެޓީ ސަރަހައްދު ފަޅުތެރެއަށް އަޑިއަށްދިޔަ ލޯންޗު ފުލުހުން ވަނީ މިއަދު 2:15 ހާއިރު ލޯންޗު ފަޅުތެރެއިން ނަގާފައި ކަމަށް ފުލުހުން ބުނެއެވެ. މި ހާދިސާގައި ފުރަތަމަ އަލިފާން ރޯވީ، ލޯންޗުގައި ކަމަށް ފުލުހުން ބުނާއިރު، ލޯންޗުގެ ވެރި ފަރާތާއި ހަވާލާދީ ބައެއް މީޑިއާ ރިޕޯޓުތަކުގައި ބުނެފައިވާ ގޮތުން، އަލިފާން ރޯވީ ތެޔޮއަޅާ ނިމި ލޯންޗުގެ މަރާމާތެއްގެ މަސައްކަތް ކުރަން އުޅެނިކޮށް ތެޔޮ ބައުޒަރުގައި ކަމަށެވެ. އަދި އަލިފާން ރޯވާން ދިމާވީ، ދުންފަތުގެ އިސްތިއުމާލު ކުރުމަށް ސިނގިރޭޓް ރޯކޮށްގެން އުޅެނިކޮށް ކަމަށްވެސް މަންޒަރު ދުއް ބައެއް މީހުން ބުނެފައިވެއެވެ.
މިހާދިސާގައި ޖުމްލަ 9 މީހަކަށް އަނިޔާވެފައިވާއިރު، އޭގެ ތެރެއިން ނެވި ލޯންޗުގައި ތިބި ދެ މީހަކު ވަނީ 50 ޕަސެންޓް ފިހިފައެވެ. އެ ލޯންޗުގައި ޖުމްލަ 4 ދިވެހިން ތިބި އިރު، ބާކީ ތިބި ދެ ދިވެހިންނާއި، އެ ލޯންޗު ކައިރީ އޮތް މުދާ އުފުލާ ދޯންޏެއްގައި ތިބި ދެ ބިދޭސީއަކަށް ވެސް އަނިޔާ ލިބިފައިވެއެވެ. މީގެ އިތުރުން ވެސް އެތާ ކައިރީ އޮތް ތެޔޮ ބޯޓެއްގައި ހުރި މީހަކު ފިހިފައިވާއިރު، އެތާ ކައިރީ އޮތް އެހެން ލޯންޗެއްގެ މީހަކު އެހީވާން އުޅުމުގެ ތެރޭގައި ދުމުގެ އަސަރު ކޮށްގެން ވެސް ހޮސްޕިޓަލަށް ގެންގޮސްފައިވެއެވެ. އަދި ތެޔޮ ބައުޒަރުތައް ދުރަށް ޖައްސަން އުޅުނު މީހެއްގެ އަތް ފިހިފައިވާއިރު، އަނިޔާވި ދެ ބިދޭސީންގެ ތެރެއިން އެކަކު ވަނީ ކުޑަކޮށް ފިހިފައެވެ. އަނެއް މީހާ ހޮސްޕިޓަލަށް ގެންދިޔައީ ދުމުގެ އަސަރުކޮށްގެންނެވެ.
މި އަލިފާންގަނޑު އިއްޔެ 5:05 ހާއިރު ކޮންޓްރޯލް ކުރެވިފައިވާއިރު، ފުލުހުން ބުނީ މި މައްސަލާގައި އިތުރަށް ސާފުކޮށް ޔަގީން ކުރަން ޖެހޭ ކަންތައްތައް ޔަގީންކޮށް މައްސަލައިގެ ތަހުގީގު ކުރިއަށް ގެންދާނެ ކަމަށެވެ.
